1 Peter 1 سے مشہور بائبلی آیات

شئیر

ကျွန်ုပ်တို့၏ အရှင်ဖြစ်တော်မူသော ယေရှုခရစ်တော်၏ အဖဘုရားရှင်ဂုဏ်အား ချီးမွှမ်းကြပါစို့။ အဖဘုရားရှင်၏ မဟာကရုဏာတော်ကြောင့် ကိုယ်တော်ယေရှုအား သေခြင်းမှအသက်ပြန်ရှင်စေခြင်း အားဖြင့် ကျွန်ုပ်တို့အား အသစ်တစ်ဖန်ပြန်လည်မွေးဖွားခြင်းဟူသော မျှော်လင့်ချက်တို့ကို ရှင်သန်စေသည်။ ထို့အပြင် ပျက်စီးယိုယွင်းခြင်း၊ ညစ်ညူးခြင်း၊ မညှိုးနွမ်းစေတတ်သော အမွေကိုလည်း ရရှိစေတော်မူသည်။ အဖဘုရားရှင်သည် ဤအမွေအား သင်တို့အတွက် ရွှေမြို့တော်၌ ထိန်းသိမ်းထားတော်မူသည်။

သင်တို့သည် အမျိုးမျိုးသော ဆင်းရဲဒုက္ခအပေါင်းတို့အတွက် ခဏတာမျှဝမ်းနည်းကြေကွဲရသော်လည်း ယခုပင် ဤအကြောင်းအရာများကြောင့် ဝမ်းမြောက်ပျော်ရွှင်ကြပါ။ ဤဆင်းရဲဒက္ခအမျိုးမျိုးကိုခံရခြင်းသည် သင်တို့၏စစ်မှန်သည့် ယုံကြည်ခြင်းကို ဖော်ပြရန်ဖြစ်သည်။ ပျက်စီးနိုင်သော ရွှေကိုပင်လျှင် မီးဖြင့်သန့်စင်၍ စစ်ဆေးရသည်။ စစ်မှန်သည့်ယုံကြည်ခြင်းသည် ထိုရွှေထက် များစွာ ပိုအဖိုးတန်သည်။ ထို့ကြောင့် သင်တို့၏ယုံကြည်ခြင်းသည် စစ်မှန်လျှင် ယေရှုခရစ်တော်ကြွလာသောအချိန်တွင် ချီးမွမ်းခြင်းခံရလျက် ဘုန်းအသရေနှင့် ဂုဏ်အသရေကို ရရှိကြလိမ့်မည်။

သင်တို့အား ရွေးကောက်တော်မူသော အရှင်သည် မြင့်မြတ်တော်မူသကဲ့သို့ သင်တို့သည်လည်း အရာရာအား ကျင့်ကြံပြုမူရာ၌ မြင့်မြတ်စွာ ပြုမူကြပါ။ အကြောင်းမူကား ကျမ်းစာတော်တွင်”ငါဘုရားသည် မြင့်မြတ်သကဲ့သို့ သင်တို့သည်လည်း မြင့်မြတ်ရမည်” ဟု ရေးသားဖော်ပြထားသောကြောင့်ဖြစ်သည်။

သင်တို့သည် ဘုရားရှင်၏စကားကို နားခံသောသားသမီးများဖြစ်သောကြောင့် သင်တို့မသိနားမလည်ခဲ့စဥ်က မိမိတို့၏စိတ်ဆန္ဒအလျောက်ပြုကျင့်သကဲ့သို့ ဆက်လက်၍မပြုကျင့်ကြလေနှင့်။

ထို့ကြောင့် သင်တို့၏စိတ်နှလုံးသား ကို သမ္မာသတိဖြင့် ဆင်ခြင်သုံးသပ်၍ ယေရှုခရစ်တော် ကြွလာတော်မူသောအခါ သင်တို့ခံစားရမည့် ကျေးဇူးတော်ကို အပြည့်အဝစောင့်မျှော်လျက်နေကြပါ။

ထို့ကြောင့် ကျမ်းစာ၌ “လူသားတို့သည် မြက်ပင်နှင့်တူပြီး သူတို့၏ဘုန်းကျက်သရေတို့သည်လည်း တောပန်းနှင့်တူသည်။ မြက်ပင်သည် ညှိုးနွမ်းခြောက်သွေ့ တတ်ပြီး၊ တောပန်းများသည်လည်း ကြွေကျ သွားတတ်သည်။ သို့သော် အရှင်၏နှုတ်ကပတ်တော်သည်ကား ထာဝရတည်တံ့ခိုင်မြဲ၏” ဟူ၍ ဖော်ပြထားသည်။ ထို နှုတ်ကပတ်တော်သည် သင်တို့ကို ကြေညာဟောပြောသော သတင်းကောင်းပင်ဖြစ်သည်။