ရမ် 12 سے مشہور بائبلی آیات

شئیر

ကွဲ့ ဟူ တဲး ဘေ ဘူင် ပီ ဂေ ဒူအီ အီ တူ ညှိုမ် ဇဝ်ဖြာ။ တဲး ဘေ ခမ် ဒီ ဘျွင် ပီ ဇေန့်ဇာ ဘေ၊ တဲး န့ ဘဲန် အီ ကာမာယ်။ ဆေ ဘေ ဘူင် ပါယ် တီ၊ ဘေ ဒီ နပ် ပီ အိုင် ဇဝ်ဖြာ၊ နပ် ဘော အီ ဘွတ် အီ မွှိုမ် အီ လဝ့် နဝ်း ဇဝ်ဖြာ အီ ကျ ကာဆဝ်။

အိုယ် ဘေ ဘီနွင်၊ ပီ ဂေဇူ ဇဝ်ဖြာ ဒီ အေ၊ န့ ဟဲ့ ကိူန် ကာဆဝ်။ ခုဝ်၊ အုဝ် ဆီ မှာန့်၊ တဲး ဘေ အာပ် ဒုဝ် ဘေ ဒီ ဇဝ်ဖြာ၊ တဲး န့ ပီ ပီ လှူ အီ မိုဝ်း အာဆာက်၊ အီ ဆီငါ ဘွတ် အီ လဝ့် နဝ်း ဇဝ်ဖြာ။ ဟဲ့ ကာအာပ် ဘေ ဘူင် ပါယ် တီ။

တဲး နဝ်း ဘေ ဘော ဘျုဝ် ဒါခိုယ် ကူပ် ပီ နှဝ့် န့ဒဝ့် ဘေ။ ဆေ ဘေ လုဝ် ခမ် အီ ဒုက် အီ ညှာပ်၊ တဲး ဘေ ခမ် ဒီ ယိူန် လှေန့်။ တဲး ဘေ ဘော ဆာခိုဝ် ဆေဆေ။

ကွဲ့ တဲး နာ ဟာယ် နာ မိူက် ပဲ ဘေ၊ တဲး နာ ဘွတ် နာ မွှိုမ် ပဲ နာ ဟာယ် နာ မိူက်။

တဲး ဘေ လာယ် ရွက့် ပီ အူ ကတ် အူ ဝါ။ တဲး ဘေ ရုဝ်ဆေ အီ ဟဝ် လွှိုမ် ဒုဝ် ဘြိမ် ဘေ။

တဲး ဘေ မိုဝ်း နဝ်း ဆိူဝ် နဝ်း မှာန် ဒီ ရွက့် ဒူအီ။ တဲး ဘေ ဘော ကာအိး အီ ဟာယ် အီ မိူက် ဘော ဘူင် နာ ဘွတ် နာ မွှိုမ် ဆေဆေ။

ခဲ့ ပီ ပွိုန် ဘေ ဘူင်၊ တဲး ဘေ ဘော ဂျုဝ်ဂျာ ဒီ လာယ် ကာလဝ့် ဒီ ဒူအီ ဒွန် အီ။

အိုယ် ဘေ ဂိုက် အုဝ်၊ ကွဲ့ တဲး ဘေ ဘူင် ဝျီ့ ဒီ အီ။ တဲး ဘေ တဲး ဇဝ် ယေဆူ ရူ ဒီ ဂေ။ ခုဝ်၊ န့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “န့ မုး အုဝ်၊ အီ ဒီ ဘူင် ဝျီ့ ဒီ အီ။ န့ မုး အုဝ်၊ အီ ဒီ ဒမ် မှာပ် ဒီ ဂေ။”

တဲး ဘေ အွန် ဒီ ဘူင် ဂါန် ဇဝ်ဖြာ။ ကွဲ့ တဲး ဘေ ကြာန်။ တဲး ဘော နဝ်း ဘော ဖွိုမ် ဘေ ဘူင် ဂါန် ဇဝ်ဖြာ ဆေဆေ။

ကူပ် ပီ ဂေဇူ ဇဝ်ဖြာ ဒီ အုဝ်၊ အုဝ် ဝီ ကာလာင် ဒီ ဘေ ဒွန် အီ၊ ကွဲ့ တဲး ဘေ အာထာင် တာင် ဒုဝ် ဘြိမ် ဘေ လွှိုမ် ခဲ့ ပီ ကာအာပ် ထာင်။ တဲး ဘေ ဝီ ဇေန့်ဇာ ဆီချာ၊ တဲး ပီ ထာင် ဘေ ကာဒါန် ဒီ နဝ်း ညှိုမ် ပဲ့ ဟဲ့ ဒွါ ဇဝ်ဖြာ ဒီ ဘေ ရာင် အာဆေ ရာင် အန်။

ဆေ အီ ဟဝ် ဘူင် နာ ဟာယ် နာ မိူက် ဒီ ဘေ၊ ကွဲ့ ဝီ ဘူင် ဝျီ့ နာ ဟာယ် နာ မိူက် ဒီ ဂေ။ ခဲ့ ပီ ဘူင် ဘေ ဒွန် မျုဝ်၊ ကွဲ့ တဲး အီ ဟဝ် မိုဝ်း ဒီ ကာလာင်၊ န့ တူ မွှိုမ်။

တဲး ဘေ လာယ် ဖြူမ် ရိုမ် ဘဲန် အူ နဝ်း။ ကွဲ့ တဲး ဘေ ပီခိုက် နဝ်း ဘေ။ တဲး ဘေ ခမ် ဒီ ဘူင် ဂါန် အီ စုဝ်း တျီမ်။ ကွဲ့ တဲး ဘေ ထာင် ဘေ ဟဲ့ မိုဝ်း အာငျာန် လွှိုမ် အီ။

အာဝ် ဝန် မီ ခဲ့ တူ ဘူင် ဝျီ့ ဒီ အီ တီ။ ဘေ လုဝ် ဘူင် ဒူပ် ပီ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဆေ ရန်ဆူ မဲ ကာပြာန့် ဘူမ်၊ တဲး မဲ ဟျီင် အန် ဟူမ်။ ဆေ အန် ဆီ ဒျီင် အိုမ်၊ တဲး မဲ ဒွါ အန် ဒျီင်။ ဆေ မဲ ဘူင် ပါယ် တီ၊ ယုဝ် အန် ဒီ ဘော ဝီ ဆာယ် မဲ၊ ဝီ လှုဝ်း မှာပ် အန်၊ ဝီ ဆီ ဘဲန် ဂိုက် မဲ။”

တဲး ဘေ ဆာခိုဝ် ဒါင် ဂေ အီ ဘူင် နာ စီစိဝ် ဒီ ဘေ။ ကွဲ့ ဒိူင် ဂေ၊ မွင့်ကာရာ ဒွါ ဒီ ဂေ။ တဲး ဘေ ခူယ် ဒါခိုယ် ဒူပ် ဂေ အီ ခူယ် ဒါခိုယ်။ တဲး ဘေ ဘော ယာမ် ဒူပ် ဂေ အီ ဟဲ့ ယာမ်။

ဆေ ဒူအီ အီ ညှိုမ် ဇဝ် ယေဆူ ဘော အေတ့် တူ မိုဝ်း ခဲ့ ပီ လုဝ် ဂေ၊ တဲး ဘေ ကာဆာင် ဒွါ ဒီ ဂေ။ တဲး ဘေ ဘော ဒါခိုယ် ဒီ ယွတ် လိုမ်လာ ခဲတ့်။

န့ ပီ ဒုဝ် ဘူင့် အေ နီ။ ခဲင် ဒုဝ် ဘူင့် အေ၊ န့ ဘော ဟဲ့ မိုဝ်း ဘဲန် မျုဝ် ဘဲန် မျုဝ်။ ဒွန် မျုဝ် ဘော မိုဝ်း အာဂျိုဝ် ရာင် အာဆေ ရာင် အန်။ န့ ဘော ပါယ် တီ၊ အေ ပီ ဘော ဟဲ့ မိုဝ်း ဘဲန် ဝီ ဘဲန် ဝီ မိူဝ်၊ ကူပ် ညှိုမ် အေ ဇဝ် ယေဆူ အေ ဟဲ့ ပီ ဒုဝ် ဘူင့် အူ ဘူင့်။ န့ ဘော လာယ် ဘာ့ ဒွန် အီ ခဲင် ဒုဝ် ဘူင့် တီ။