Popera ga Rómawa yexmagüxü̃ ga yaxõgüxü̃tanüwa namuxü̃ ga Pauru 5 سے مشہور بائبلی آیات

شئیر

Natürü Tupana tüxü̃ nüxü̃ nadauxẽxẽ nax tüxü̃ nangechaü̃xü̃ yerü yexguma ipecaduã̱xgügu nixĩ ga taxca̱x nayuxü̃ ga Cristu.

Rü ñu̱xma nax ínangu̱xẽẽxü̃ nax tüxü̃́ tá nangẽxmaxü̃ i tachica i Tupanaxü̃tawa, rü ngẽmaca̱x taxuca̱xma tangechaü̃gü. Erü Tupana rü poraãcü tüxü̃ nangechaü̃. Rü ngẽma Naãxẽ ya Üünexü̃ i tüxna namuxü̃ nixĩ i tüxü̃ nüxü̃ cua̱xẽẽxü̃ i ngẽma.

Rü ngẽxgumarüxü̃ ta tataãẽgü i woo ngúxü̃ ingegügu. Erü nüxü̃ tacua̱x rü ngẽma ngúxü̃ rü tüxü̃ narüngü̃xẽxẽ nax yexeraãcü iporaexü̃ rü yáxna namaxã ixĩnüexü̃ca̱x. Rü ngẽxguma yáxna namaxã ixĩnüegu i ngẽma ngúxü̃ rü Tupana rü tamaxã nataãxẽ. Rü ngẽma nax tamaxã nataãẽxü̃ rü ngẽmaca̱x mea ítanangu̱xẽxẽ nax tüxü̃́ tá nangẽxmaxü̃ i tachica i mexü̃ i Tupanaxü̃tawa.

Rü ñu̱xma rü Tupanape̱xewa time erü tayaxõgü. Rü ngẽmaca̱x marü tama Tupanamaxã taxuanüã̱xgü i ñu̱xmax, erü tórü Cori ya Ngechuchu ya Cristu rü marü tamaxã nanangüxmüexẽxẽ ya Tupana. Rü Cristugagu nixĩ nax tamaxã namecümaxü̃ ya Tupana i ñu̱xmax erü tayaxõgü. Rü nüxü̃ tacua̱x rü guxü̃gutáma tamaxã namecüma. Rü tataãẽgü erü nüxü̃ tacua̱x nax tüxü̃́ tá nangẽxmaxü̃ i tachica i mexü̃ i Tupanaxü̃tawa.

Rü yexguma taxucürüwama yigütama imaxẽxẽẽgu, rü nawa nangu nax Tupana yanguxẽẽxü̃ ga yema norü uneta. Rü yexguma nixĩ ga ñoma ga naanewa namuaxü̃ ga Cristu nax pecaduã̱xgüxü̃ca̱x nayuxü̃ca̱x.

Rü ñu̱xma rü Tupanape̱xewa time yerü taxca̱x nayu ga Cristu. Rü ngẽmaca̱x meama nüxü̃ tacua̱x nax nüma rü aixcüma tá tüxü̃ ínanguxü̃xẽxẽxü̃ nax tama ipoxcuexü̃ca̱x.

Rü gumá nüxíraü̃cü ga yatü ga Adáü̃ rü tama Tupanaga naxĩnü. Rü yemaacü wüxitama ga yatügagu rü muxü̃ma ga duü̃xü̃gü rü nipecaduã̱x. Natürü gumá yatü ga Ngechuchu, rü mea Tupanaga naxĩnü. Rü gumágagu rü muxü̃ma i duü̃xü̃gü rü tá nime i Tupanape̱xewa.

Rü tama ngexicatama nixĩ. Natürü i ñu̱xma rü tórü Cori ya Ngechuchu ya Cristugagu rü Tupanamaxã tataãẽgü, yerü Cristugagu nixĩ ga Tupana ga tamaxã nangüxmüxü̃.