Romános 14 سے مشہور بائبلی آیات

شئیر

Uje yisígo Dupade gai ome uté úringai Eduguéjna Cuchape, mu que cucha ibijógode u cucha pibosode jeoga cucha pijódode gotique iji Dupade edominone. E mu cuchadatéode u pisocade udore uje chajna cucha ujñapetade quigode iji jnumone, jé aja pininaquei adode udore, jé aja pajesereringai uté. Enga cucha omone udojo u uje yocaríjogoto Dupade Ujopié uaté gueranome uyoque. Uje gosi chejna raja pisocade udore iji dáringai Crísto iroque, enga qui u uje Dupade irasique re ome uté gosi adode udore. Mu a jé ca chedu Dupade irasitigade ome re, mu ujode ayoré ore chimesẽre uté to.

Jecute ujetiga yiquecágo jeoga yitogoi marínga, jé qui chojmara uje yugúcoji yocajnesṍri Pangarádejnai Dupade jmainie gatuaque. Enga uté gajneque yocucuecaringuei, yoquitoringai jnese, jeta pisi uté gai ome pisocade udore jnese.

Jecute yicoi enga yójigoi gaté ujetiga yucuegoi pajesereringai gajnéone cucha, ga yajnérango udore údi ome ñane. Enga yoquigaidi u ujetiga yagutíyangome ñane uje yiquérango iji Dupade adode ome yocúringane uajádiji gaté.

Jé ũrepise uje Dupade gajneque jeta chajire yocadode aja quigode jne, jecute yicoi ga yiyágo yoquijmapié uaté uje yucuegoi yocujórigo Jesús anguresõre iyoguérigo. Ga yipécorásu yocáyipiedie jeta jé ca yoquipesudode cucha uñeque gajnui turásu cucarané pucuáya jeoga pujuya ome gosi. Enga yoquigaidi turásu jetiga jé ca yoquisocárique pésu ga gosi basája pisijnaringuérique.

Uje purusãracho udore quigode ome Dupade uruode urusãrasõre uñai icaite, uje chojninga: "Ome yúringai Pangarádejna Ueca udé," Pangarádejnai chojninga, "yajo yuja yuruode udojo uje ayoré ponáyone udore jnese a ore chichaga dagataidie aja jnumi jne iji yiquei ome yúringai pisígai. Enga a ore jnese chatata jne iji pedominone uje gusúpusu yu ome yúringai Dupa." Jecute que potigayaquérique déji ome Pangarádejnai uruode udore uje Jesús anguresõre chojmara, chojmarane iji yoque a jé chatata dapesutígo cucha jnese jne ome Dupade iji edominone. ¡A jé yingongo yógaja uté jnese jne!

Pijoque uje Jesús anguresõre uñane déji uje cáma etoque ore iji danguretigai. Mu jeta udore uñeque chise uaque, enga uacajnepídi u ujetiga amesẽcho uté gosi enga anejecho údode ujetiga cháta raja uaque to. E mu que uacagaidi urásu gotique ujetiga abóso uté ome caranguenie dáyipiei ome uaque.

¿Ama gosi ua ya, ujetiga acué uñeque irótique iyoguérique cucha? Uté irósõri u Dupade arĩa, enga que ua u. Jecute, ujetiga jé uajate gosi iji gaté ome danguretigai jeoga cṍra ome bajéode, mu uté irósõri Dupade gajneque jeta pésu dajéode ome daroi uté ipesudode cucha ome re, jetiga ueracho, jeoga gajnarécho. Enga pijoque uje iroi uté a uajádiji gaté jne. Chamáñaje Pangarádejnai etotiguei cuse jeta chátaja uté, ga a pésu uté úringai etóguiji gaté jne ome dáringai Dupade iroque.