1 Bitut 3 سے مشہور بائبلی آیات

شئیر

Da̱ a̱kwonu a̱kya, ku yet ta hwa nyi nwuak Kristi shi, nang A̱tyoli swuan nyin wu a̱ni. A̱wot ka̱ a̱yin lyip nyin tazwa tyia̱ fwuo nyin hu di̱ Kristi, nyi swan ma̱ng la̱p vam nyi nwuak gu shim hu ma̱ cha̱chaat. A̱wot nyi nwuak ba shim ma̱ shonshyon ma̱ng nwuak ba shi. Nyi yok nyia̱ kyang ku na tyia̱ nyin nsum a̱ni bah, da̱nian ka̱ ba̱ lyiat nyin lihyat, ba̱ na fa̱k nsum, ka̱ ba̱ li tangka̱i a̱tsatsak nswat nang nyi swan a̱ni, mat nyi yet á̱niet khwi Kristi bya.

Mat á̱ghyi A̱gwaza ba nwuan á̱niet ba ba̱ nyia̱ tsotswat a̱ni. A̱wot a̱ si̱ myiai a̱fufwuo, a̱ fwuong naai mba hu. A̱wot á̱ghyi A̱gwaza ba lak li á̱niet ba̱ nyia̱ a̱ka̱kpa̱t a̱ni.”

Nyi yok tyia̱ nfwuo nyin na di̱ nkyang a̱gwai nvam, nang bat pyia̱, tyia̱ ná, ku khwi a̱yaatoot ba̱ byia̱ kurum a̱ni bah. Da̱ a̱kwonu a̱kya, nyi kup á̱pyia̱ nyin ma̱ng shisham ji neet mami nfwuo nia a̱ni. Shisham ji̱ nwai tyiai, ji̱ si̱ bu yet a̱shonshyon ma̱ng a̱nyonywang za̱kwa a̱ni. Za̱kwa a̱ja yet a̱tsatsak kyang wa ba̱t da̱ a̱vwuo A̱gwaza.

Mat A̱lyiat A̱gwaza na nyia̱, “Ka̱ a chat fa̱k nyinyang swat ang hu, a̱wot a bu bwuo a̱tan mam ma̱ a̱di̱di̱t, vwuong a̱lyem ang ka lyiat a̱ka̱tuk a̱lyiat. A̱wot a yok bwoi a̱ka̱laa a̱bwonu ang ka bah. Yok a̱ka̱kpa̱t, a̱wot a nyia̱ a̱tan nta̱m. Chat swat nyinyang ma̱ng á̱ghyang ang. A̱wot a bu kwan a ba̱ng a̱nia.

Di̱ ngaan hu, yok a̱di̱dam nyin wu a̱ yet a̱nyiung. Nyi fa̱k kunak á̱ghyang. Nyi chat á̱ghyang nyin nang á̱na̱nyiuk a̱ni. Nyi byia̱ fwuo beang á̱ghyang. Nyi yok nyia̱ gba̱p a̱pyia̱ bah. Nyi yok tan a̱ka̱kpa̱t ma̱ng a̱ka̱kpa̱t bah. Nyi yok fwoi á̱niet ba̱ fwoi nyin a̱ni bah. Da̱ a̱kwonu a̱kya, nyi tyia̱ mba a̱li̱ba̱rka wa. A̱nia wa nang A̱gwaza ngyorong nyin nyi nnyia̱, a̱wot a̱ ma na tyia̱ nyin a̱li̱ba̱rka wu.

Ma̱ninika, ka̱ nyi byia̱ fwuo nyia̱ tsotswat, a̱yin si̱ mi̱n chat a̱ nyia̱ nyin a̱ka̱kpa̱t bah.

Yok a̱ka̱kpa̱t, a̱wot a nyia̱ a̱tan nta̱m. Chat swat nyinyang ma̱ng á̱ghyang ang. A̱wot a bu kwan a ba̱ng a̱nia.

Nyi yok bwung bah; ku na laai lan ki̱ shim A̱gwaza hwa nyi swuo a̱bung mat nyia̱ a̱tan nta̱m, nang nyi na nswuo a̱bung di̱ nyia̱ a̱ka̱tuk a̱ni.