© 2008, Wycliffe Bible Translators, Inc. All rights reserved.
℗ 2010 Hosanna

Ticuna - 1986 WBT (NT) Drama

Ĩane ga Checharéawa nayexma ga wüxi ga yatü ga Cornériugu ãégacü. Rü nüma rü norü capitáü̃ nixĩ ga 100 ga churaragü ga Itáriaanetücumügu ãégaxü̃.
Rü nüma nixĩ ga wüxi ga yatü ga meama Tupanaaxü̃́ yaxõcü. Rü wüxigu naxma̱xmaxã rü naxacügümaxã Tupanaxü̃ nangechaü̃gü. Rü mucüma ga norü diẽrumaxã nüxü̃ narüngü̃xẽxẽ ga duü̃xü̃gü ga Yudíugü ga ingearü diẽruã̱xgüxü̃. Rü guxü̃guma nayumüxẽ rü Tupanamaxã nidexa.
Rü wüxi ga ngunexü̃ ga yexguma tomaepü̱xarü orawa nanguxchaü̃gu ga yáuanecü, rü nango̱xetü. Rü meama nüxü̃ nadau ga wüxi ga Tupanaarü orearü ngeruxü̃ ga daxũcüã̱x ga yema ucapu ga nawa nayexmaxü̃gu ücuxü̃. Rü ñanagürü nüxü̃: —Pa Cornériux —﻿ñanagürü.
Rü nüma ga Cornériu rü meama nüxü̃ nadawenü, rü poraãcü namuü̃ãcüma nüxna naca, rü ñanagürü: —¿Ta̱xacü cunaxwa̱xe, Pa Corix? —﻿ñanagürü. Rü nanangãxü̃ ga yema orearü ngeruxü̃ ga daxũcüã̱x, rü ñanagürü: —Curü yumüxẽgü rü Tupana marü cuxü̃́ nüxü̃ naxĩnü, rü cumaxã nataãxẽ nax nüxü̃ curüngü̃xẽẽxü̃ i duü̃xü̃gü i ngearü diẽruã̱xgüxü̃.
¡Rü chanaxwa̱xe i Yópewa cunamugü i ñuxre i yatügü nax naxca̱x yacagüxü̃ca̱x i wüxi i yatü i Chimóü̃ i Pedrugu ãégaxü̃!
Rü to i Chimóü̃ i naxcha̱xmüarü paxẽẽwa puracüxü̃patawa nangẽxma rü ngẽxma nape. Rü yimá napata rü márcutüwa nangẽxma —﻿ñanagürü.
Rü yexguma nüxna iyanataxuxgu ga yema orearü ngeruxü̃ ga namaxã yéma idexaxü̃, rü Cornériu rü naxca̱x naca ga taxre ga norü puracütanüxü̃ rü wüxi ga churara ga mea naga ĩnüxü̃ rü aixcüma Tupanaaxü̃́ yaxõxü̃.
Rü namaxã nüxü̃ nixu ga guxü̃ma ga yema nüxü̃ nadauxü̃, rü ñu̱xũchi Yópewa nanamugü.
Rü moxü̃ãcü ga yexguma namagu naxĩyane ga yema duü̃xü̃gü ga Cornériu yéma mugüxü̃, rü yexguma marü Yópexü̃ yangaicagügu, rü Pedru rü daxũ naxĩ ga ĩpataétüwa nax yéma nayumüxẽxü̃ca̱x. Rü tocuchiarü oragu nixĩ ga yexguma.
Rü nataiya, rü nüxü̃́ nachi̱xéga ga nax nachibüxü̃. Rü yexguma norü õna ínaxügüyane, rü nango̱xetü ga Pedru.
Rü nüxü̃ nadau ga nax yango̱xnaxü̃ ga naanetüwe, rü yéma ínarüxĩ ga wüxi ga ñoma naxchápenüxü̃rüxü̃ ixĩxü̃. Rü norü ãgümücüpe̱xewa naxãtü̱xü, rü yemaacü ínarüchüxüe ñu̱xmata ñaxtüanewa nangu.
Rü yemagu ínarüchü̱xüxüetaü̃ ga naguxü̃raü̃xü̃ ga naeü̃gü, rü ãxtapegü, rü werigü i tama nangõ̱xgüxü̃ ga Yudíugü.
Rü Pedru nüxü̃ naxĩnü ga wüxi ga naga ga nüxü̃ ñaxü̃: —Pa Pedrux ¡Inachi, rü ta ima̱x, rü nangõ̱x! —﻿ñaxü̃.
Rü Pedru nanangãxü̃ rü ñanagürü: —Taxucürüwa nixĩ, Pa Corix, erü taguma chanangõ̱x i ta̱xacü i toxca̱x ãũãchixü̃ —﻿ñanagürü.
Rü yexguma ga yema naga, rü wenaxarü ñanagürü: —Ngẽma choma chamexẽẽxü̃ rü tama name i ãũãchi nüxü̃ cuwogü —﻿ñanagürü.
Rü tomaepü̱xcüna yemaacü nangupetü. Rü yexguma wenaxarü daxũ nachü̱xüxnagü ga yema naxchápenüxü̃ namaxã ga guxü̃ma ga nawa yexmagüxü̃.
Rü poraãcü nagu narüxĩnü ga Pedru ga ta̱xacüchiga nax yixĩxü̃ ga yema nüxü̃ nadauxü̃ ga yexguma nango̱xetügu. Rü yemagu ínaxĩnüyane, rü gumá ĩpataa̱xwa nangugü ga yema yatügü ga Cornériu yéma mugüxü̃ ga naxca̱x ícaetanüxü̃ ga Chimóü̃pata.
Rü yéma naxca̱x ínacagü rü aixcüma yexma nape ga wüxi ga yatü ga Chimóü̃ ga Pedrugu ãégaxü̃.
Rü Pedru nagu írüxĩnüyane ga yema nüxü̃ nadauxü̃ ga yexguma nango̱xetügu, rü Tupanaãxẽ ya Üünecü rü ñanagürü nüxü̃: —Ngẽãgü nixĩ i tomaepü̱x i yatügü i cuxca̱x daugüxü̃.
¡Inachi, rü írüxĩ, rü tama cuxoegaãẽãcüma nawe rüxũ! Erü choma nixĩ i núma chanamugüxü̃ —﻿ñanagürü.
Rü yexguma naxca̱x ínarüxĩ ga Pedru, rü ñanagürü nüxü̃ ga yema yatügü: —Choma nixĩ i cha̱u̱xca̱x pedaugüxü̃. ¿Rü ta̱xacüwa nua pexĩ? —﻿ñanagürü.
Rü nümagü nanangãxü̃gü, rü ñanagürügü: —Capitáü̃ ya Cornériuxü̃tawa ne taxĩ rü nüma nixĩ i nua toxü̃ namugüxü̃. Rü wüxi ya yatü ya mecü nixĩ, rü Tupanaxü̃ nangechaü̃. Rü guxü̃ma i Yudíugü nüxü̃ nangechaü̃ i nümax. Rü wüxi ga Tupanaarü orearü ngeruxü̃ ga daxũcüã̱x nanamu nax cuxca̱x toxü̃ yacaxẽẽxü̃ca̱x ga Cornériu rü napatawa cuxũxü̃ca̱x rü nüxü̃ nax naxĩnüxü̃ca̱x i curü ore —﻿ñanagürügü.
Rü yexguma nanachocuxẽxẽ ga Pedru, rü yexma nanapegüxẽxẽ ga yema chütaxü̃gu. Rü moxü̃ãcü inaxĩãchi rü nawe narüxũ ga Pedru. Rü ínayaxümücügü ga ñuxre ga Yópecüã̱x ga yaxõgüxü̃.
Rü moxü̃ãcü Checharéawa nangugü ga ngextá Cornériu ínanguxẽẽxü̃wa namaxã ga guxü̃ma ga natanüxü̃ rü namücügü ga nüxü̃ nangechaü̃güxü̃ ga nüxna naxuxü̃.
Rü yexguma Cornériupatawa nanguxgu ga Pedru, rü ĩã̱xtüwa naxca̱x naxũ ga Cornériu, rü Pedrupe̱xegu nayacaxã́pü̱xü, rü nüxü̃ nicua̱xüxü̃.
Natürü ga Pedru rü inanachixẽxẽ rü ñanagürü: —¡Inachi! Rü choma rü ta cuxrüxü̃ duü̃xü̃mare chixĩ rü tama Tupana chixĩ —﻿ñanagürü.
Rü nügümaxã yadexagüãcüma rü wüxigu nichocu. Rü Pedru yéma namaxã inayarüxũ ga muxü̃ma ga duü̃xü̃gü ga yexma ngutaque̱xegüxü̃.
Rü yexguma ga Pedru rü ñanagürü nüxü̃ ga yema duü̃xü̃gü ga yexma ngutaque̱xegüxü̃: —Pema nüxü̃ pecua̱x i toma i Yudíugüca̱x rü nangẽxma i torü mugü i toxna nachu̱xuxü̃ nax pemaxã tangutaque̱xegüxü̃, rü pepatagu nax tachocuxü̃. Natürü Tupana choxü̃ nango̱xetüxẽxẽ rü choxü̃ nüxü̃ nadauxẽxẽ nax tama namexü̃ nax nagu charüxĩnüxü̃ nax tama Tupanape̱xewa timexü̃ ya yíxema tama Yudíugü ixĩgüxe.
Rü ngẽmaca̱x tama chaxoõcüma núma chaxũ i ngẽxguma cha̱u̱xca̱x pengemagu. Rü ñu̱xma rü chanaxwa̱xe i chomaxã nüxü̃ pixu nax ta̱xacüca̱x cha̱u̱xca̱x pengemaxü̃ —﻿ñanagürü.
Rü Cornériu nanangãxü̃, rü ñanagürü: —Marü ãgümücü i ngunexü̃ nangupetü ga ñúxgumaãcü ga tomaepü̱xarü oragu ga yáuanecü, rü nua chopatawa chayumüxẽ erü guxü̃guma ngẽmaãcü chanaxü. Rü yexguma chayumüxẽgu rü chango̱xetü, rü cha̱u̱xca̱x nango̱x ga wüxi ga yatü ga iyaurachirucüüxü̃.
Rü ñanagürü choxü̃: “Pa Cornériux, Tupana marü nüxü̃ naxĩnü i curü yumüxẽ rü cumaxã nataãxẽ naxca̱x nax nüxü̃ curüngü̃xẽẽxü̃ i ngẽma duü̃xü̃gü i ngearü diẽruã̱xgüxü̃.
¡Rü Yópewa namugü i ñuxre i yatügü nax naxca̱x yacagüxü̃ca̱x i Chimóü̃ i Pedrugu ãégaxü̃! Rü to i Chimóü̃ i naxcha̱xmüarü paxẽẽwa puracüxü̃patagu pexü̃. Rü yimá napata rü márcutüwa nangẽxma”, ñanagürü choxü̃.
Rü yemaca̱x rü yexgumatama paxa cuxca̱x yéma chanamugü, rü cuma rü mexü̃ toxca̱x cuxü erü núma cuxũ. Rü ñu̱xma i guxãma i toma rü Tupanape̱xewa tangexmagü. Rü nüxü̃ taxĩnüechaü̃ i guxü̃ma i ngẽma ore i Cori namaxã núma cuxü̃ muxü̃ nax tomaxã nüxü̃ quixuxü̃ca̱x —﻿ñanagürü ga Cornériu.

Rü yexguma inanaxügü ga Pedru ga nax yadexaxü̃, rü ñanagürü: —Ñu̱xma waxi nixĩ i nüxü̃ chacuáxü̃ nax Tupanaca̱x nawüxiguxü̃ i guxü̃ma i duü̃xü̃gü, rü guxãxü̃ma nangechaxü̃xü̃.
Rü nüma rü wüxichigü i nachixü̃anewa nanade i ngẽma duü̃xü̃gü i naga ĩnüexü̃ rü mexü̃ ügüxü̃.
Rü nüma ga Tupana rü Iraétanüxü̃tanüwaxíra nanamu ga norü ore rü nüxü̃ nixu ga yema ore ga mexü̃ nax nüma rü duü̃xü̃gümaxã nangüxmüxü̃ i ngẽxguma Ngechuchu ya Cristu ya guxãarü Cori ixĩcüaxü̃́ yaxõgüãgu.
Pema rü meama nüxü̃ pecua̱x nax ta̱xacü ngupetüxü̃ ga guxü̃wama ga Yudíugüarü naanewa. Rü noxri ga Cuáü̃ rü nüxü̃ nixu nax Tupana naxwa̱xexü̃ nax ínabaiü̃xü̃ ga duü̃xü̃gü. Rü yemawena ga Ngechuchu rü Gariréaanewa inanaxügü ga duü̃xü̃gümaxã nüxü̃ nax yaxuxü̃ ga ore i mexü̃.
Rü pema nüxü̃ pecua̱x nax Tupana naporaxẽẽxü̃ ga Ngechuchu ya Nacharétucüã̱x rü nüxna namuaxü̃ ga Naãxẽ ya Üünecü. Rü nüma ga Ngechuchu rü mexü̃ naxü ga yema íyaxũgüxü̃wa, rü nanameexẽxẽ ga guxü̃ma ga yema ngo̱xome̱xẽwa yexmagüxü̃, yerü Tupana nüxü̃ narüngü̃xẽxẽ.
Rü toma nixĩ ga nüxü̃ tadaugüxü̃ rü nüxü̃ tixuchigaxü̃ i guxü̃ma ga yema naxüxü̃ ga Ngechuchu ga Yudéaanewa rü Yerucharéü̃arü ĩanewa. Rü yemawena rü curuchawa nayapotagü rü nayama̱xgü.
Natürü ga Tupana rü tomaepü̱x ga ngunexü̃ ngupetügu rü wena nanamaxẽxẽ rü toxca̱x nanango̱xẽxẽ.
Natürü tama guxü̃ ga duü̃xü̃güca̱x nango̱x. Rü toxca̱xicatama nango̱x ga toma ga ü̃pamama Tupana toxü̃ dexe nax nüxü̃ tixuxü̃ca̱x i Ngechuchuchiga. Rü yexguma marü yuwa ínadaxguwena rü namaxã tachibüe rü namaxã taxaxegü.
Rü nümatama ga Ngechuchu toxü̃ nimugü nax duü̃xü̃gümaxã nüxü̃ tixuxü̃ca̱x ga norü ore rü namaxã nüxü̃ tixuxü̃ca̱x nax Tupana marü ãẽ̱xgacüxü̃ yangucuchixẽẽxü̃ nax guxü̃ i duü̃xü̃gü i maxẽxü̃ rü yuexü̃xü̃ yacagüxü̃ naxca̱x i norü maxü̃chiga.
Rü guxü̃ma ga yema nũxcümaü̃güxü̃ ga Tupanaarü orearü uruü̃gü rü Ngechuchuchigaxü̃ nixugü nax yíxema nüxü̃́ yaxõgüxe rü Tupana tá tüxü̃́ nüxü̃ irüngümaxẽ i tümaarü pecadugü —﻿ñanagürügü.

Rü yexguma íyadexayane ga Pedru, rü Tupanaãxẽ ya Üünecü nüxna nangu ga guxü̃ma ga yema yéma irüxĩnüexü̃ ga yema ore.
Rü yema yaxõgüxü̃ ga Yudíugü ga Pedrumaxã yéma ĩxü̃, rü poraãcü naba̱i̱xãchiãẽgü, yerü Tupanaãxẽ ya Üünecü rü nüxna nangu ga yema tama Yudíugü ixĩgüxü̃.
Rü nüxü̃ naxĩnüe nax to ga nagawachigü yadexagüxü̃ rü Tupanaxü̃ yacua̱xüü̃güxü̃.
Rü yexguma ga Pedru rü ñanagürü: —¿Ẽ̱xna nangẽxmaxü̃ nax texé nüxna nachu̱xuxü̃ nax ínabaiü̃xü̃ i ñaa duü̃xü̃gü i marü taxrüxü̃ Tupanaãxẽ ya Üünecü nüxna nguxü̃? —﻿ñanagürü.
Rü nanamu nax Ngechuchu ya Cristuégagu ínabaiü̃xü̃ ga yema duü̃xü̃gü ga yexwacax yaxõgüxü̃. Rü yexguma Pedruxü̃ naca̱a̱xü̃gü nax yexma naxã́ũxü̃ca̱x ga ñuxre ga ngunexü̃.

سنیں Ngechuchuarü ngúexü̃gü ga yamugüxü̃arü puracüchiga 10