Arabic, North Levantine Spoken: العامية اللبنانية بالقافية (Portions)

العامية اللبنانية بالقافية

بالوقت يلّي إجا موعد رفع النبي الياس (عليه السلام) عالسما، عن طريق زوبعة. وبأمر من ربّ العالمين، طلع النبي الياس ومرافقُه النبي أليسَع (عليه السلام) من بلدة الجلجال بالسامرة. وقبلا كان طلب النبي الياس من أليَسَع أنّه يبقى بالجلجال وقلّه: "إنتَ إبق هون، لأنّه الله أمرني روح على بيت إيل". ولكن وقتا أليَسَع رفض وقلُّه: "أقسم بالله وبحياتَك عندي، إنّي ما بفارقَك". وهيك رافقُه عبيت إيل. وطلعوا جماعة أصحاب الأنبيا من بيت إيل تيتلاقوا مع أليسَع وقالولُه: "إنتَ عندَك علِم إنّه الله رح يرفَع عنّك سيِّدَك اليوم؟" فجاوبُن: "إي نعم، عندي علم، وإنتو سكروا عالموضوع!"
ومن بعدا رجع طلب النبي الياس من أليسَع وقلُّه: "يا أليسَع إنتَ إبق هون، لأنّه الله أمرني روح على أريحا." وكمان أليسَع قلُّه: "أقسم بالله وبحياتَك عندي، إنّي ما بفارقَك". وهيك راحوا سوا عأريحا. وهونيك، طلعوا جماعة أصحاب الأنبيا يلّي من أريحا تتلاقى مع أليَسَع وكمان قالولُه: "إنتَ عندَك علِم إنّه الله رح يرفَع عنّك سيِّدَك اليوم؟" وذات الجواب رد أليسَع: "إي نعم، عندي علم، وإنتو سكروا عالموضوع!" وكمان مرّة قلُّه النبي الياس لأليسَع: "يا أليسَع إنتَ إبق هون، لأنّه الله أمرني روح عنهر الأردن." وما كان من أليسَع إلّا هالجواب: "أقسم بالله وبحياتَك عندي، إنّي ما بفارقَك". وهيك راحوا تنيناتُن سوا. ووقتا لحقُن خمسين واحد من جماعة أصحاب الأنبيا بأريحا، وبس وصلوا عنهر الأردن، وقّفوا الخمسين واحد بعيد شوي من الياس وأليسَع يراقبوهن. وهونيك شال النبي الياس عبايتُه، ولفّا وضرب فيا النهر وقامت انشقِّت ميّة النهر، وعبروا النبي الياس والنبي أليسَع عأرض جافّة. وبعد ما عبروا، سألُه الياس لأليسَع: "وهلأ، طلوب منّي شو ما بدّك، قبل ما يأمر الله، وروح عنّك؟" فجاوبُه أليسَع: "بُطلب تمنحني نصيب من قدرتَك الروحيّة بتخلّيني الخلف إلَك." فقلّه النبي الياس: "طلبت شي كتير صعب، ولكن إذا تمّ رفعي إدّامَك فبيتحقّق طلبَك، وإذا ما كنت وشفت صعودي فما بيتحقّق."
وهنّ وماشيين عم يحكوا، ظهرِت مركبة من نار جارّينا أحصنة من نار وفصلت بيناتُن، وبهاللحظة، ارتفع النبي الياس (عليه السلام) عن طريق زوبعة عالسما. وبس شاف أليسَع هالمنظر صار يصرّخ: "يا سيّدي، يا سيدي، بيلبقلَك أقوى المركبات والأحصنة تترفعَك!" ولمّا اختفى النبي الياس عن نظرُه قام شقّ تيابُه تعبيراً عن حزنُه. وبعدين أخد عباية النبي الياس الّي وقعت منّه، ورجع أليسَع وقف عضفّة النهر، وضرب بالعباية ميّة النهر وقال: "يا الله دخيلَك، يا ربّ الياس وين القدرة لّي رح تمنحني ياها؟" ورجع ضرب الميّ مرّة تانية، وقامت هالمرّة انشقّت الميّ نصّين، وعبَر أليسَع عالميلة التانية. ولمّا شافوا جماعة أصحاب الأنبيا الخمسين الّي صار، الّي كانوا قبالتُه واقفين، قالوا "من كلّ بدّ أليسَع نال قدرة ومعجزة النبي الياس." وقاموا إجوا لعندُه وانحنوا إدّامُه إحتراماً إلُه.

سنیں من قصّة إلياس واليسع (2 ملوك) 2