Yambetta - 2016 CABTAL (NT) Non Drama

Yambetta - 2016 CABTAL (NT) Drama

Ná Yə́sus ayɛ́ɛ aáʼkoman kosɔyɔ pɛbán pɛ́ɛb piim na pɔɔd, aáság kodɛ́anɛ na paaʼkan pə́ə́ŋ ɔnɔ́: «Poálɛŋ lɛ́ wɔɔ́n ó Páska ólɛ mədúg mábaan, ngɔ́ɔ́? Áay aa pándagɛndɛgɛɛ́, mɛ Mɔɔ́n o mɔɔd ná pɛ́mbaŋan a ɔmbásá.» Puʼkúm pó payaaganɛʼ pɛfɔny na ponnom pó nigúu póyágɔ́nyɛ́dɛ́ɛ́ a nó Kayíif, Ɔnjaaganɛʼ pɛfɔny nyɔ́ oʼkóʼkóón, pááság kogod unuʼ úmmuʼ lɛ́ pə́əgumin Yə́sus pɔɔd pándɛŋ ná pámoyóon. Náa, páyɛ́ɛ ɔgɔɔ́cɔcɔb kɔ pɔ́lɛ́ na pɔ́lɛ́ pɔ́nɔ́: «Tɛdɛɔ́gɔ pə́gumuúgumin wɔɔ́s ó wɔɔ́n, inyuunyugiʼ yə́ədə́əŋ.»


Yə́sus ayɛ́ɛ a Pɛʼtaníi, a nó Simɔ́ɔŋ, mɔɔd nyummú nyɔ́ ayɛ́ɛ abany nkún. Náa ɔʼkɛ́ɛd nyummú əə́giim alon kɔ. Ayɛ́bobóan pálɛ agonɛ́ɛnɛ, aáság kaáyɛʼtɛnɛ a ɛbá ɛ́ Yə́sus. Yiígóodi isisíg yɛ́ igəd ɛ́ lamɛ́ndaʼ ɛ mɔɔnɛ́ a ombɔg, əə́bə́ə́ kusumənən Yə́sus lamɛ́ndaʼ yɛ́ɛy a oʼto. Ná paaʼkan pɛ́ɛ́dála náan, pə́ə́bə́ə́ komoyɔ́gɔ́dɔ pɔ́nɔ́: «A igə aa nyóon aáyósag lamɛ́ndaʼ yɛ́ɛy náan əə́? Pádɛʼkɛ́ɛ págolɛg yɛ́lɛ́ a mɔɔnɛ́ miíŋ, páyɛɛ́ʼkɛn mɔɔnɛ́ móom na mɔsɔ́gasɔ́gá ə́!» Yə́sus yɛɛ́lɛ́ŋ lɛ́ náan aa pálɛɛ́ agosɔyɔ, náa ɔnɔ́ na pɔ́lɛ́: «A igə aa poágɛɛlɛ lɛ́ ɔʼkɛ́ɛd nyóon yóób ɔʼtɛ́m kogany ə́? Nkə kɛ́ɛnɛ kɛ́ amɛ́ɛ́lɛ na mɛ kɛ́lɛ kisig kɛ́ yoom. Pugóódi pasɔ́gasɔ́gá pɛnɛŋ piim a kɛgaágadɛ kɛáŋan Náa, mɛ ntɛndɛ́ɛ́ kɛɛn na pəŋi pɛnɛŋ piim. Lamɛ́ndaʼ yɛ́ɛy yɛ́ əmísumə́nən, amɛ́ɛ́lɛ náan agoboŋɛn kɛlóŋ kɛ́am wɔnɔ́ ná pálɛ́ɛ́ kinnií. Ndabodɛ́anɛ a fɔ́lɔ́b lɛ́ kɛnɔ kiim kɛ́ pálɛ́ɛ́ kɔlɔɛgɛɛ́ Tɔsɔm Tólaŋ tóonɛ a nsí yɛ́ɛnɛ ngim, pálɛ́ɛ́ kaáyɔ́ɔ́ŋɛ ɔʼkɛ́ɛd nyóonɛ, pɔ́ɔsɔyɔ nkə kɛ́ɛnɛ kɛ́ amɛ́ɛ́lɛ.»


Náan aa, a paaʼkan pá pówád na pábaan, sɔ́g nyummú niiŋ lɛ́ Siudáa Ɛsɛʼkalɛyóod, ayɛ́ɛ́n aboan puʼkúm pó payaaganɛʼ pɛfɔny, ɔnɔ́ na pɔ́lɛ́: «Mbaʼkɛɛlɛ lɛ́ púgumin Yə́sus əə, poagɛnyɛɛ́ʼkɛn nkə ə́?» Náa pɔ́nɔ́ na nyɔ́lɛ́: «Tɛagoyɛ́ʼkɛn pisúg niʼtin na pɛówád» A kəə́bə́ə́ a kɛnɛŋ kɛ́ɛg, Siudáa əə́bə́ə́ kuunə tuə́ áa aágɛɛlɛ agoboólɛgɛn Yə́sus.


Wɔɔ́s ó na oʼto na oʼto ó wɔɔ́n wó Yúdɛn ɛyɛ́ɛ ɛnɛ́alɛla pɛlɛ́ɛd pɛ́ páánám pádɛág toan tó kunudi umbúb, paaʼkan pííŋíən na Yə́sus pɔ́nɔ́ əə: «Kɛlág, ə́lə́ə́ áa tíɛn agoonámɛnɛɛ́ wɔɔ́n ó Páska ə́?» Əyíbuyúlísíni ɔnɔ́ na pɔ́lɛ́: «Todáan áay a pálɛ́ɛg, a nó pímbuəm, pómodɛ́anɛ poɔʼkɔ́: “Mɛ Kɛlág nyɔʼkɔ́ kɛnɛŋ kɛ́am kɛándɛ ndúmiʼ. Ndaasánɛ wɔɔ́n ó Páska wóonɛ a noádɛʼ noáŋ na paaʼkan páam”.» Páyɛ́ɛ́n, pámɛ́ɛ́lɛ əgín wɔnɔ́ ná Yə́sus ayɛ́bodɛánɛ, páánám wɔɔ́n ó Páska .


Niób nɛáság kiim əgiig, Yə́sus əə́ləndin agonɛ́ɛnɛ na paaʼkan pə́ə́ŋ pá pówád na pábaan. Pálɛ anɛ́ɛ́n kɔ agonɛ́ɛnɛ a, Yə́sus aáság kusiəd tɔgɛ́ɛ́, ɔnɔ́: «A fɔ́lɔ́b ndabodɛ́anɛ lɛ́ úmmuʼ áanɛ a ondáŋ wááŋan, aagɛndɛg.» Ɔʼtɛ́m ó paaʼkan wɛ́ɛ́yɛ́b, pə́ə́bə́ə́ kumuŋíənə a pɛlɔ́g a pɛlɔ́g, nyóon ɔnɔ́ əə: «Sə́dúk, adɛ́njaŋ mɛ áa ndáagoólɛg, ngɔ́ɔ́?» Yə́sus əyúúlísi ɔnɔ́ na pɔ́lɛ́: «Nyɔ́ tiə́gəə́nə́əyəni táasaʼ mmuʼ na nyɔ́lɛ́, nyɔ́lɛ́ aa aágɛndɛg. Mɛ Mɔɔ́n o mɔɔd ndəəgu əgín wɔnɔ́ ná kíyə́dílə́ə́ a Kálaʼtaʼ ɛ Táán lɛ́ ndəəgu Náa, maan kɛ́fɔlɛ́ na nyɔ́ kugu kóam kóamoógom. Kɛ́mɛ́ɛ agɛɛn kɔŋɛʼ na nyɔ́lɛ́ lɛ́ ədiyə́biə́níí!» Siudáa nyɔ́ kɛ́yɛ́ɛ lɛ́ nyɔ́lɛ́ aa aálɛg Yə́sus, aáság kudə́əmini tɔgɛ́ɛ́, ɔnɔ́: «Kɛlág, adɛ́njaŋ mɛ áa ndáagoólɛg, ngɔ́ɔ́?» Yə́sus əyímuyúlísíni ɔnɔ́: «Wɛ! Kɛ́ aa kɛ́ɛg wəə́səə!»


Pálɛ kɔ agonɛ́ɛnɛ, Yə́sus aáság kudə́əmini pɛlɛ́ɛd, amɛ́ʼkɛn pisoyidiʼ na Táán, aábɛ́ŋa, amɛ́ʼkɛn na paaʼkan pə́ə́ŋ, ɔnɔ́ na pɔ́lɛ́: «Siə́dəən, pónɛ. Nkó yaam aa yɛ́ɛy.» A ngim yɛ́ɛy, yiídə́ə́míni tɛn kilən kɛ́ maloʼ, əmíʼkíni kɛɛ́ʼkɛn pisoyidiʼ na Táán, amábonáámɛ́nɛ, ɔnɔ́ na pɔ́lɛ́: «Siə́dəən, póŋo pəŋi piim lɛ́ móonɛ málɛ maŋɔ́ máam. Mɔ́lɛ́ aa málɛɛ́ kisuŋ kɛ́ kíoloodi nɛálad nɛ́ Táán amáládɛ́ɛ́ na pɔɔd Ndɛ́ɛ́ kusub mɔ́lɛ́ a kidíídí kɛ́ ɛ́fɔlɛ́ ɛ́ pɔɔd agɛɛlɛ lɛ́ Táán ə́buúlisin mabɛ́ mɔ́ɔ́bɔn. Ndabodɛ́anɛ lɛ́ Əgəə́bə́ə nɛ́gɔŋ, Ntiə́giiʼkini koŋo maloʼ kə́mmú agɛɛn əgiig əgín a wɔɔ́s wó ndə́əgiiʼkini koŋo má mawa ondáŋ na pəŋi a Nɛlaamɛʼ nɛ́ Paabá.»


Pááság kusisinin pɛʼkwáá pɛ́ wɔɔ́n kudúmə Ná páyɛ́ɛ páʼkoman kudúmə, pááság kolon agɛɛn a oʼkon ó pa olifiyə́ə . Náa Yə́sus ɔnɔ́ na paaʼkan pə́ə́ŋ: «Udúg ó naánɛ́ yɛ́ɛnɛ, pəŋi piim poagɛʼtɛ́da lɛ́ náan aa kɛ́lɛɛ́ kidiídílə́ a kálaʼtaʼ lɛ́, Táán ɔnɔ́: “Ná ndáagoon unnuŋ mudúg, mudúg muim moágólɛ́gɛd”. Náa, ná ndɛ́ɛ́ kiim ndónɛ́ɛ́ a kəəniʼ, ndɛ́ɛ́ koboóyaŋɛnɛ a Kalilə́ə.» Náa Píɛ əə́siəd tɔgɛ́ɛ́, ɔnɔ́ na nyɔ́lɛ́: «Ɔmbɔ́ ungim nyóonɛ agoodɛ́da, mɛ ntiə́guudi!» Yə́sus əyímuyúlísíni ɔnɔ́ na nyɔ́lɛ́: «A fɔ́lɔ́b ndagodɛ́anɛ lɛ́, əgín a udúg ó naánɛ́ yɛ́ɛnɛ, kɛbaŋ kɛ́ nsɛɛ kíədíin kɛdaŋ ná wəə́ʼkiʼtəm pɛnɛŋ pɛ́dáád wɔʼkɔ́ odɛndɛŋɛn.» Píɛ əyímuyúlísíni ɔnɔ́: «Kɛ́yɛɛn kɛ́ɛnɛ lɛ́ pəsi na wɛ tígu ondáŋ, tiəgu. Kóonɛ lɛ́ mɛ nkuúʼtəm, ndóo!» Paaʼkan piim píísə́ə́ náan yoom ímuʼ.


Páyɛ́ɛ́n, pááság kɛɛn alon a kɛnɔ kímmú pɔ́ɔdɔ́ŋɔn lɛ́ Kɛdsɛmaníi Kɔ́gɔ́ɔg, Yə́sus yɛɛ́dɛánɛ na paaʼkan pə́ə́ŋ ɔnɔ́: «Pəŋi, lɔbɔ́ɔn áanɛ, mɛ mbɛ́ɛn ɔgɔɔ́sɔ́gɔlɔn kága.» Yiísiə́d Píɛ na pɔɔ́n pá Səbədə́ə pábaan agɛɛn na pɔ́lɛ́. Ɔʼtɛ́m wə́ə́ŋ óyɛ́ɛ wándɛ ɔmbɛ́. Wɛɛ́y óyɛ́ɛ wə́ʼkumuúgumin. Ná páyɛ́ɛ pə́ʼkəə́súid yuudi sɔɔŋ, ayɛ́bodɛánɛ ɔnɔ́ na pɔ́lɛ́: «Ɔʼtɛ́m wáam wándɛ ɔmbɛ́ a las. Pəŋi tɛn púləndin áanɛ, púgúlə na mɛ, pudinním ɛnɔ.» Nyɔ́lɛ́ ayáyɛ́ʼtɛ́nɛ́ɛ́ kə́mmú yuudi, əmə́súʼkíníí pigúbíʼkub. Ayɛ́ɛ ɔgɔɔ́sɔ́gɔlɔn Táán, ɔnɔ́: «Paabá, ngə́ ɛmaʼkɛɛn kɔ, ɛɛlɛ lɛ́ ntɔ́b yɛ́ɛnɛ yɛ́nyaágɛɛŋɛ. Náa, kɛ́dɛnjɛ́ɛ́n a nɛnyɔ́ŋɛn nɛ́am, kíɛn a nɛáŋ!» Aáság kiim ádɛ́ɛmɛn əguúlini kɛnɔ kɛ́ yiídí ə́mə́dí pa Píɛ na paaʼkan pə́mmú póob pábaan. Ayɛ́bobóan pə́ʼkugu ɛnɔ tɔ́g. Aáság kubuyóndigi, ɔnɔ́ na Píɛ: «Tuə́ ə́ən? Podɛáʼkɛnɛ kugúlə na mɛ ɔmbɔ́ əgín áwaʼ mmuʼ ə? Kúlə́ən, poɔ́sɔ́gɔlɔn Táán agɛɛlɛ lɛ́ pudiʼtə́əŋ a pɛásɔ́sɛ́n. Mɔɔd alɛ na ɔʼtɛ́m wóonɛ lɛ́ yɛ́ɛlɛ kɔŋɛʼ, náa nkó yəəŋ áa ɛlɛɛ́ ntom.» Aáság kiiʼkini kəə́súid agɛɛn ɔgɔɔ́sɔ́gɔlɔn a pɛnɛŋ pɛ́baan, ɔnɔ́: «Paabá waam, ngə́ yɛ́ɛnɛ lɛ́ ntɔ́b yɛ́ɛnɛ yɛ́nyaágɛɛŋɛ ɛdiɛnɛn kɔ, náa kɛ́lɛɛ́ əgín lɛ́ nnɛ yɛ́lɛ́, ooʼó, nɛnyɔ́ŋɛn nɛáŋ nɛáyɛ́ɛlɛ!» Əyíʼkíni kiim ádɛ́ɛmɛn əguúlini kɛnɔ kɛ́ paaʼkan páyɛ́ɛ. Ayɛ́bobóan anɛ́ɛ́n kóog pálɛ tɔ́g a ɛnɔ ɛ́ kúfuʼ. Pádɛʼkɛ́ɛ agaáʼkɛ kolɔb əngis angóm. Aáság kubuudi, əmə́suídíí kə́mmú agɛɛn ɔgɔɔ́sɔ́gɔlɔn Táán a pɛnɛŋ pɛ́dáád. Ayɛ́ɛ ɔgɔɔ́sɔ́gɔlɔn yoom əgín ɛgo ímuʼ. Náa əə́giiʼkini kimbuúlini. Páyɛ́ɛ əgín a ɛnɔ tɔ́g. Əyíbuyóndígi, ɔnɔ́ na pɔ́lɛ́: «Pəŋi polɛ əgín ɛnɔ yi! Polɛ ogooyig! Oo, Táá kɛnɛŋ aa kɛ́ɛnɛ kiə́ʼkiigií. Páagɛndɛg mɛ Mɔɔ́n o mɔɔd nɛ́gɔŋ a ɔmbɔg á pɛɛlɛʼ mabɛ́. Tɛ́mɛ́naan, tiɛ́naan! Táá mɔɔd ogo nyɔ́ aágɛndɛg na pɔ́lɛ́ aa nyóonɛ aándɛɛ́ kɔ.»


Yə́sus alɛ kɔ na tɔgɛ́ɛ́ a unuʼ ə, Siudáa, ongaaʼkan wəəŋ nyummú nyɔ́ a pá pówád na pábaan foáy. Ayɛ́ɛ na pɔɔd a ngim súuu lɛ́ póonɛ na mobag mó pɛdá, pə́mmú na mufun a ɔmbɔg. Pɔɔd póob náan piim, puʼkúm pó payaaganɛʼ pɛfɔny na ponnom pó a nigúu aa púyíím póboodom. Siudáa nyɔ́ ayɛ́bolɛ́gɛn Yə́sus, əyíím yááganan na pɔ́lɛ́ ɔnɔ́: «Nyɔ́ ndáadam nyə́súʼkənən, póság kolɛŋ lɛ́ nyɔ́lɛ́ ogo aa nyóon, púmuúgumin.» Əgín tɛn ná Siudáa əyíím əgiig, ayɛ́ɛ́n ná Yə́sus alɛɛ́, ɔnɔ́ na nyɔ́lɛ́: «Kisig kɛ́ koany na wɛ óo, kɛlág!» Aáság kumuə́súʼkənən. Náa Yə́sus ɔnɔ́ na nyɔ́lɛ́: «Sɔ́g waam, ɛɛlɛ agá nkə kɛ́ umíim agɛɛlɛ!» Pááság kaag ombɔg na Yə́sus, pə́mə́mugúmin. Sɔ́g nyummú nyɔ́ ayɛ́ɛ na Yə́sus aáság kusooyin ɛbag yə́ə́ŋ ɛ́ pɛdá a kɛbágáá soád, ɔnɔ́ na uʼkudin wo ɔnjaaganɛʼ pɛfɔny nyɔ́ oʼkóʼkóón ə́siəd a oʼtóɛŋ foáb, oʼtóɛŋ kwə́s. Yə́sus ayɛ́mosásɛ́dɛn ɔnɔ́: «Ndóo, úúlísi ɛbag yááŋ a kɛbágáá lɛ́ ungim nyɔ́ alɛ́ɛ́ kɔnɔɛyɛɛ́ na ɛbag, na yɛ́lɛ́ tɛn aa pálɛ́ɛ́ komoyónɛ́ɛ́. Waafɛg lɛ́ mbɛ́ɛ agaálɛɛlɛn Sɛ waam, adɛʼkɛ́ɛ əgiim yɛ́ʼtómɛn məŋun má maʼtom, piʼtúú ɔmbɔ́ pɛówád na pɛ́baan á? Náan, tuə́ áa nkə kɛ́ kíyə́dílə́ə́ a Kálaʼtaʼ ɛ Táán kɛ́mɛ́ɛ agaáyɛ́ɛlɛ anɛ́ɛ́n ə́? Kɛ́lɛ lɛ́, náan aa pɛbán pígódíí lɛ́ pɛásan, wɔnɔ́ ná kíyə́dílə́ə́.» A ngim yɛ́ɛy, Yə́sus yiísə́ə́ ɔnɔ́ na kiʼtúú kɛ́ pɔɔd kɛ́ɛg: «Puígóodi lɛ́ púim poáboŋɛn lɛ́ na mufun, na mobag mó pɛdá əgiim əgiʼkumin wɔnɔ́ ndɛ agá ungiíbən ə? Adɛ́ mɔɔ́s miim njɛ́ɛ agaaʼkananɛ pɔɔd a Tɛ́mpɛl a? A igə aa pudiʼkə́əgiʼkuminií áay? Náa, nkə kɛ́ɛnɛ kiim kɛ́lɛ agodáŋana náan lɛ́ ná nkə kɛ́ palɔɛgɛʼ pɛbán pá Táán píísə́ə́, kɛ́as. Paaʼkan piim pááság kaásɔɛ́da na ɔʼtɛ́d, pə́mə́muudí.»


Pɔɔd pá píígúmin Yə́sus, páyɛ́ɛ́n na nyɔ́lɛ́ a nó Kayíif, Ɔnjaaganɛʼ pɛfɔny nyɔ́ oʼkóʼkóón, kɛnɔ kɛ́ palɛŋ pɛcɛm na ponnom pó a nigúu páyɛ́ɛ́n agaágɔnyɛd. Píɛ ayɛ́ɛ əgiim ə́yə́njən Yə́sus laálá a ngim súʼtə́ə́ a oʼtómódáán wó ɔnjaaganɛʼ pɛfɔny nyɔ́ oʼkóʼkóón, ɔɔ́sɔ́d kɔ, əə́ləndin na pəgudin agodála wɔnɔ́ ná kɛ́amananɛ. Puʼkúm pó payaaganɛʼ pɛfɔny na ungim nyɔ́ ayɛ́ɛ a ɛgɔny yɔ́ɔ́bɔn ɛ́ pɛyɔm yɛ́ ɛgóón yɛ́ɛy pə́ə́bə́ə́ kuunə pɔɔd pá pə́əgiim adɛ́lɛmɛn Yə́sus mbaasɔ́ ɔmbɔ́ ɛ pɛfaa yɛ́ pándagɛɛ́ʼkɛnɛɛ́ Yə́sus nsɔ́ɔ́ a yɛ́lɛ́, pámoyóon. Ɔmbɔ́ ná piíŋ pɛ́ɛ́dɛ́lɛ́man mbaasɔ́ ɛ pɛfaa, pádɛʼkɔ́ɔgɔɔŋ ɛgom A komananɛ, pɔɔd pábaan pə́yíím áadɛ́lɛm, náa pɔ́nɔ́: «Mɔɔd nyóonɛ yiísə́ə́ lɛ́ nyɔ́lɛ́ alɛ ugubugə Tɛ́mpɛl ɛ Táán, ə́yiʼkini kowáag yɛndɛ́ŋ a mədúg mádáád.» Ɔnjaaganɛʼ pɛfɔny nyɔ́ oʼkóʼkóón aáság kodɛ́ɛmɛn kidə́níʼtən, náa ɔnɔ́ na Yə́sus: «Odɛɔ́gɔ na kɛbán kɛ́ kusəə ə? Nkə kɛ́ɛg kɛ́ pálɛɛ́ əgusəə a nkó yaaŋ óoʼ?» Yə́sus ayɛ́ɛ sáb, ɔmbɔ́ pɛbɛɛ, aʼkááŋánan. Ɔnjaaganɛʼ pɛfɔny nyɔ́ oʼkóʼkóón aáság kumuŋíən ɔnɔ́ əə: «Ɛ́bɛdɛánɛ, a niiŋ nɛ́ Táán nyɔ́ alɛɛ́ na ɔlaa, olɛ Məsíi ə? Olɛ Mɔɔ́n o Táán á?» Əyímuyúlísíni ɔnɔ́ na nyɔ́lɛ́: «Kɛ́ aa kɛ́ɛg olɛɛ́ əgusəə. Náa, ndabodɛ́anɛ lɛ́: Əgəə́bə́ə nɛ́gɔŋ polɛ́ɛ́ kɛʼtála mɛ Mɔɔ́n o mɔɔd, undəndínə́ə́n a ombɔg ó nɛnom ó Táán o toɛn tuim. Polɛ́ɛ́ kɛʼtála tɛn ndə́əgiim nsuu kɔ́gɔ́ɔg a kɛbɛd a mɔɛn» Ná Ɔnjaaganɛʼ pɛfɔny nyɔ́ oʼkóʼkóón ayóób náan, yiígúmin kilə́ə́ kiə́ŋ, aáwag waás, ɔnɔ́: «Poádála wɔnɔ́ ná mɔɔd alɛɛ́ agofánan Táán ə́! Pɔɔd pá mbaasɔ́ pá igə pə́mmú aa tiə́guunə? Pəŋibáamɔɛ́d pomóób wɔnɔ́ ná alɛɛ́ agofánan Táán! Tíɛlɛ tuə́ na nyɔ́lɛ́ ə́?» Náa pɔ́nɔ́: «Alɛ lɛ́ pámoyóon o» Pə́ə́bə́ə́ kumudúəŋənən pɛda a udi, páamodóan pɛʼkam, pɔsɔ́g pə́mmú páamosában ambany a ombáŋ, pɔ́nɔ́ na nyɔ́lɛ́: « Məsíi , aanɛn ánɛ aa amágoogó yi!»


A kɛnɛŋ kɛ́ɛg, Píɛ ayɛ́ɛ undəndínə́ə́n káanɛ a oʼtómódáán. Náa moóngaa ɔʼkɛ́ɛd nyummú nyɔ́ ayɛ́ɛ əgud kɔ áay aágaáyɛʼtɛnɛ a ɛbá yə́ə́ŋ, ɔnɔ́ na nyɔ́lɛ́: «Wɛ, oyɛ́ɛ tɛn a ondáŋ ó Yə́sus, mɔɔd o Kalilə́ə nyóon!» Náa, Píɛ ayácɛ́mɛ́ɛ́, ɔnɔ́: «Ndóo, ntɛálɛŋ kɔmɔɛ́d nkə kɛ́ɛg kɛ́ olɛɛ́ əgusəə.» Aáság kodɛ́ɛmɛn kɔ áay, amɛ́ɛn ələndin a nɛlon, a udíyoog wó oʼkág. Uʼkudin tɛn nyummú, əgín tɛn moóngaa ɔʼkɛ́ɛd aáság komoodála. Náa ɔnɔ́ na pɔɔd pá páyɛ́ɛ kɔ: «Mɔɔd nyóonɛ ayɛ́ɛ a ondáŋ ó Yə́sus, mɔɔd o Násalɛd.» Píɛ əə́bə́ə́ kiiʼkini kaácɛma, ɔnɔ́: «Taa, əgín kɛ́ Táán, ntɛlɛŋɛn mɔɔd nyóon!» Ɛyaa ɛ́ kɛnɛŋ sɔɔŋ ɔ, pɔɔd pá páyɛ́ɛ kɔ áay pááság kaáyɛʼtɛnɛ a ɛbá ɛ́ Píɛ, náa pɔ́nɔ́ na nyɔ́lɛ́: «A fɔ́lɔ́b, olɛ a ondáŋ wɔ́ɔ́bɔn! Pɛnɔɔgɛʼ pɛ́ pɛ́lɛɛ́ a tɔgɛ́ɛ́ toáŋ pióloodi oyaán áa olɛɛ́.» Náa Píɛ ɔnɔ́: «Táá módáád a mɔɛn, ntɛlɛŋɛn mɔɔd nyóon! Mbaʼkosom, Táán yɛ́mbɔ́nɛsɛ!» Əgín tɛn ná yiísə́ə́ náan, kɛbaŋ kɛ́ nsɛɛ kɔʼkɔ́lɛ́ɔʼkɔɔ. Aáság kaáyɔ́ɔ́ŋɛ tɔgɛ́ɛ́ tó Yə́sus ayɛ́modɛánɛ. Yə́sus yiísə́ə́ ɔnɔ́ na nyɔ́lɛ́: «Kɛbaŋ kɛ́ nsɛɛ kíədíin kɛdaŋ ná wəə́ʼkiʼtəm pɛnɛŋ pɛ́laŋ pɛ́dáád wɔʼkɔ́ odɛndɛŋɛn». Aáság kolon agɛɛn alɛɛ. Yɛɛ́lɛ́ɛ́ a kúfuʼ.

سنیں Maʼtɛ́as 26