Maayong Balita Biblia © Philippine Bible Society, 1999.

Ang tulo ka batan-ong lalaki nga si Ananias, si Misael ug si Azarias misugod paglibot sa nagdilaab nga kalayo, nanag-awit ngadto sa Dios ug nagdayeg kaniya sa iyang pagka-Ginoo. Unya si Azarias mihunong sa taliwala sa kalayo ug nag-ampo: “O Ginoo, ang Dios sa among katigulangan, nagdayeg ug nagsimba kami kanimo; pasidunggan unta ang imong ngalan hangtod sa kahangtoran. Gidumala mo kami sumala sa angay kanamo. Diha sa tanang mga butang nga imong gibuhat kanamo, kanunay kang matinud-anon ug sa diha nga kami imong gihukman, kanunay kang makiangayon. Matarong ang imong pagpadala ug katalagman ngadto sa Jerusalem, ang balaan nga siyudad sa among mga katigulangan. Angay kami niadtong hukoma tungod sa among mga kasal-anan. Wala kami motuman kanimo; mitalikod kami kanimo ug naghimo sa tanang kasal-anan. Wala kami magbuhat sa mga butang nga imong gisugo nga buhaton namo. Kon mituman pa kami sa imong mga balaod mouswag unta kami apan karon angay kami sa hukom ug sa silot nga imong gipadala kanamo. Gitugyan mo kami ngadto sa bangis ug lampingasan nga mga kaaway nga wala moila sa imong balaod; gipabihag mo kami sa labing daotang hari sa kalibotan. Ug karon kaming tanan nga nagsimba kanimo naulawan; maulaw gani kami bisan pagbuka sa among mga baba.
“Apan bisan pa niana, tungod sa imong kaugalingong dungog, ayaw isalikway ang kasabotan tali kanimo ug kanamo ug ayaw kami biyai hangtod sa kahangtoran. Ayaw ihikaw ang imong kaluoy gikan kanamo. Tumana ang imong saad kang Abraham nga imong gihigugma, kang Isaac nga imong sulugoon ug kang Jacob nga amahan sa imong balaan nga katawhan, ang Israel. Misaad ikaw sa paghatag kanila ug daghan nga kaliwat, sama kadaghan sa mga kabituonan sa langit o sama kadaghan sa mga lugas sa balas sa kabaybayonan. Apan karon, O Ginoo, kami ang labing gamay sa kanasoran; bisan diin kami mahimutang, nagpuyo kami nga naulawan tungod sa among mga kasal-anan. Karon wala kami hari ug walay bisan usa ka propeta o pangulo. Wala nay Templo diin makaadto kami aron paghalad kanimo sa mga halad nga sinunog, sa mga sakripisyo, sa mga gasa ug sa insenso. Walay dapit diin makahimo kami sa paghalad kanimo o sa pagkaplag sa imong kaluoy. Apan karon midangop kami kanimo uban sa mahinulsolon nga kasingkasing ug mapaubsanon nga espiritu. Nangaliyupo kami kanimo nga imo unta kaming dawaton sama nga nagdala kami ug sinunog nga mga halad nga karnero ug baka ug linibo nga mga pinatambok nga nating karnero. Dawata ang among paghinulsol ingon nga among sakripisyo nganha kanimo karong adlawa; tumanon unta namo sa tibuok namong kasingkasing ang imong gisugo. Walay nagsalig kanimo nga mapakyas. Karon sa tibuok namong mga kasingkasing nagsaad kami sa pagtuman kanimo, sa pagsimba kanimo ug sa pagduol kanimo diha sa pag-ampo. Dumalaha kami sa kaayo ug sa kaluoy ug ayaw gayod itugot nga maulawan kami. O Ginoo, luwasa kami pinaagi sa usa nimo ka milagro; hatagi ug dungog ang imong ngalan.
“Padad-ig katalagman ug kaulawan ang tanan nga nagdagmal kanamo. Kuhai sila sa ilang kusog ug gahom ug dugmoka ang ilang kabaskog. Himoa nga mahibalo sila nga ikaw lamang ang Ginoo ug Dios ug nga nagmando ikaw nga harianon sa tibuok kalibotan.”
Ang mga sulugoon sa hari nga nagtambog sa tulo ka batan-ong lalaki ngadto sa hudno nagdugang sa kainit sa kalayo pinaagi sa pagbutang niini ug lana, alkitran, estopa ug mga sugnod. Ang kalayo midilaab hangtod sa gihabugon nga 22 ka metros ug hangtod mikuyanap ug nakasunog sa mga taga-Babilonia nga nagbarog duol sa hudno. Apan usa ka anghel sa Ginoo ang nanaog ngadto sa kalayo diin didto ang tulo ka batan-on. Gihimo niya nga mopadaplin ang kalayo ug sa ingon gibati nila ang daw bugnaw nga huyohoy nga mihuyop ug ang kalayo wala gayod makatandog sa mga batan-on o makapaso kanila sa bisan unsang paagi.

Didto sa hudno ang tulo ka batan-ong lalaki misugod pagdayeg sa Dios pinaagi sa usa ka awit:
“Nagdayeg kami kanimo, O Ginoo, ang Dios sa among mga katigulangan.
Ang imong mahimayaon ug balaan nga ngalan
pasidunggan unta ug tahoron hangtod sa kahangtoran.
Daygon unta ang imong himaya hangtod sa kahangtoran
ug ang imong balaan nga presensya diha sa templo
diin ikaw naglingkod sa imong langitnon nga trono ibabaw sa mga kerubin
ug nagtan-aw sa kahiladman.
Daygon unta ikaw ug pasidunggan hangtod sa kahangtoran.
Daygon ikaw diha sa imong paglingkod sa harianon nga trono.
Ang mga alawiton awiton unta alang sa imong himaya hangtod sa kahangtoran.
Daygon ikaw diha sa kalangitan.
Ang mga alawiton awiton unta alang sa imong himaya hangtod sa kahangtoran.

“Dayga ang Ginoo, kamong tanan nga iyang binuhat;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, O kapanganoran sa ibabaw;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kamong tanang mga anghel sa Ginoo;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kamong tanang katubigan ibabaw sa panganod;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kamong tanang mga gahom nga langitnon;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, adlaw ug bulan;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, mga bituon sa langit;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, ulan ug yamog;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kamong tanang kahanginan;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kalayo ug kainit;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, mamahit nga kabugnaw ug makapaso nga kainit;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, mga yamog ug yelo;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, mga gabii ug mga adlaw;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kahayag sa adlaw ug kangitngitan;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, yelo ug katugnaw;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kabugnaw ug yelo;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kilat ug dag-om;
awita ang pagdayeg kaniya ug pasidunggi siya hangtod sa kahangtoran.

“Magdayeg unta sa Ginoo ang yuta;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, mga bukid ug mga bungtod;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kamong tanan nga miturok;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, mga lanaw ug mga suba;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, mga tubod sa tubig;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, mga balyena ug mga binuhat sa dagat;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kamong tanang mga langgam;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kamong tanang mga baka ug mga mananap nga ihalas;
awita ang pagdayeg kaniya ug pasidunggi siya hangtod sa kahangtoran.

“Dayga ang Ginoo, kamong tanang mga tawo diha sa yuta;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, katawhan sa Israel;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, O mga pari sa Ginoo;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, O mga sulugoon sa Ginoo;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kamong tanang mga tawo nga nagtuo kaniya;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, kamong tanang mga mapaubsanon ug balaan;
awita ang pagdayeg kaniya ug pasidunggi siya hangtod sa kahangtoran.
Dayga ang Ginoo, Ananias, Azarias ug Misael;
awita ang pagdayeg kaniya ug pasidunggi siya hangtod sa kahangtoran.
Nagluwas siya kanato gikan sa kalibotan sa mga patay
ug giluwas kita niya gikan sa gahom sa kamatayon.
Gikuha kita niya gikan sa nagdilaab nga hudno
ug giluwas kita niya gikan sa kalayo.
Pasalamati ninyo ang Ginoo kay siya maayo
ug ang iyang kaluoy naglungtad hangtod sa kahangtoran.
Dayga ninyo ang Ginoo, kamong tanan nga nagsimba kaniya;
awita ang pagdayeg ngadto sa Dios sa mga dios ug pasalamati siya
kay ang iyang kaluoy naglungtad hangtod sa kahangtoran.”

سنیں Awit sa Tulo ka Batan-ong Lalaki 1