Популярні біблійні вірші з ROMA 3

Поділитись

Yawng mayawng gaw yubak galaw ma ai hte, Karai Kasang a mawai la ai lam hte tsan gang mat masai. Rai ti mung, manu jahpu n ya ai sha Karai Kasang a chyeju hte Yesu Hkristu a marang e ding hpring ai kaw du wa lu ma ai.

Yesu Hkristu hpe kam sham ai a marang e masha gaw Karai Kasang a man e ding hpring wa lu ai. Karai kasang gaw Yesu hpe kam sham ai ni yawng hpe ding hpring wa shangun sai. Hpa majaw nga yang lachyen lahka ai lam hpa mung n nga ai.

Hkristu si hkam ai a marang e masha ni gaw yubak mara kaw na raw dat kau hkrum na matu Karai Kasang gaw dai Madu hpe gawng malai hkungga tai na san ya sai. Masha ni gaw shi hpe kam sham ai a marang e yubak mara kaw na raw dat hkrum ma ai, Karai Kasang gaw Hkristu hpe shagu hkungga hku masat ya ai lam gaw shinggyim masha ni hpe ding hpring ai ni ngu nna gara hku hkap la ai lam madun shadan dan na matu rai nga ai. Lai wa sai prat hta Karai Kasang gaw hkam sharang nna yubak mara ni hpe yu shalai kau ya sai. Rai ti mung Karai Kasang gaw ndai prat hta shi a ding hpring ai lam shadan dan na matu shinggyim masha ni a yubak mara ni hte seng nna shabyin ai lam nga nga ai. Karai Kasang gaw shi nan ding hpring ai Madu rai nga ai hpe mung, Madu Yesu hpe kam sham ai ni yawng hte hpe ding hpring ai ni ngu nna hkap la ai hpe mung shadan dan nu ai.

Hpa majaw nga yang, dai jep ai Tara a hkang da ai lam ni hpe hkan shatup shadik ai hte kadai mung Karai Kasang a man e ding hpring wa lu ai n rai; Dai jep ai Tara e galaw ai amu gaw, masha gaw yubak mara galaw nu ai ngu ai hpe chye shangun na matu rai nga ai.

Dai Chyum Laika hta mung: “Ding hpring ai wa langai mi pyi n nga ai. Chye chyang ai wa langai mi mung n nga ai, Karai Kasang hpe nawku ai wa mung n nga ai. Yawng mayawng Karai Kasang kaw na dam mat wa masai, shanhte yawng shut hpyit lam dam mat masai, kaja ai amu kadai mung n galaw ma ai, kaja wa langai mi pyi n nga ai.

Dai jep ai Tara hta hkang da ai magam bungli ni hpe hkan galaw ai hte n re ai sha, kam sham ai hte sha masha gaw Karai Kasang a man e ding hpring ai kaw du wa lu ai hpe ya anhte chye lu saga ai.

Shing n rai law! Masha shagu masu magaw ai ni rai ma ti mung, Karai Kasang gaw sadi dung nga na sha rai nga ai. Dai Chyum Laika hta, “Na a ga gaw nang ding hpring nga ai hpe madun lu na rai nna nang tara dara hkrum yang awng dang lu na rai ndai,” nga nna ka da ai hte maren rai nga ai.