Esikiel 19
19
Wanfala krae singsing
1Yawe hemi tok long mi olsem, “Singim wanfala krae singsing abaotem tufala king blong Jiuda, wea hemi olsem:
2!O King!
?Wanem nao mami blong yu?
Hemi olsem wanfala mere laeon.
Hemi leidaon long midol long olketa laeon.
Hemi lukaftarem gudfala olketa pikinini blong hem
long midol long olketa yang laeon.
3Hemi lukaftarem wanfala pikinini blong hem,
go-go hemi kamap wanfala strong laeon.
Hemi tisim hem fo kasholem
an pisisim kaikai blong hem,
an hemi kamap wanfala bikfala laeon
wea hemi save kaikaim man.#2 Kings 23:31-34; 2 Kronikols 36:1-4.
4Pipol blong olketa narafala kantri
i herem nius abaotem laeon ya.
So, olketa kasholem hem insaet hol long graon
wea olketa digim fo hemi foldaon insaet.
Olketa hukum hem,
an pulum hem go long Ijip.
5Taem mami blong hem hemi luksave
dat evrisamting wea hemi planem
hemi nomoa nao,
hemi tekem narafala pikinini blong hem,
an mekem hem fo kamap wanfala strong laeon.
6Taem hemi kamap bikfala,
hemi wakabaot wetem olketa narafala laeon.
Hemi lanem tu
hao fo kasholem kaikai blong hem,
an hemi save kaikaim man tu.#Jeremaea 21:11—22:19.
7Hemi slip wetem olketa mere laeon,
an hemi kamap nambawan.
Hemi spoelem evri taon blong olketa.
Taem hemi singaot bikfala,
evriwan long kantri ya
i barava fraet fogud.
8Bihaen, olketa narafala kantri
i kam tugeta fo faet agensim hem.
Olketa putum net fo blokem hem,
mekem hemi pas insaet long trap ya.
9Olketa hukum hem,
an pulum hem go insaet long wanfala boks,
fo karim go long king blong Babilonia.
Olketa putum insaet long prisin,
mekem no eniwan save herem moa
voes blong hem antap olketa maonten long Israel.
10Mami blong yutufala bin olsem grep tri
wea hemi garem plande niufala smol brans,
bikos olketa plantem saet long riva.
Hemi grou gudfala tumas,
an hemi garem staka frut
bikos hemi grou long ples
wea hemi garem plande wata.
11Olketa brans blong hem i strong,
fitim fo wakem spesol wokingstik blong king.
Disfala grep tri hemi grouap kam
hae winim olketa narafala tri long bus.
Evriwan save lukim tri ya
bikos hemi grouap tol tumas,
an hemi garem plande brans.
12Bat God hemi kros tumas,
an hemi pulumaot an torowem long graon.
Hot win long ist hemi blou kam
an olketa frut i kamap drae an foldaon nao.
Olketa brans blong hem i kamap drae,
an faea hemi barava bonem nao.
13Distaem olketa plantem grep tri ya
insaet long drae eria,
long ples wea hemi nating garem eni wata.
14Faea hemi stat long wanfala bik brans,
nao hemi bonem olketa narafala brans
an evri frut blong hem.
No eni strong brans moa hemi stap
wea hemi fitim fo mekem long
spesol wokingstik blong king.
“Hem nao wanfala krae singsing an yufala mas singim olsem wanfala krae singsing.”
Kasalukuyang Napili:
Esikiel 19: SIPB
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Pijin Catholic Bible © Bible Society of the South Pacific, 2008.