Mga Salmo 78
78
Ang Dios ug ang Iyang Katawhan#ANG ULOHAN SA HEBREO: Balak ni Asaph.
1Pamati, O katawhan ko, sa akong pagtulon-an;
patalinghogi ang isulti ko kaninyo.
2Sultihan#Mat. 13:35. ko kamog sambingay
ug suginlag mga pagtulon-an sa kakaraanan,
3mga butang nga atong nadungog ug nasayran
nga gisugilon kanato sa atong mga katigulangan.
4Dili nato kini ililong sa atong mga anak,
kondili atong isugilon sa sunod nga kaliwatan
ang gahom sa Ginoo
ug ang mga katingalahan niyang buhat.
5Gihatagan niyag mga balaod ang katawhan sa Israel,
ug gihatagan niyag kasugoan ang mga kaliwat ni Jacob.
Gisugo niya ang atong mga katigulangan
sa pagtudlo niini ngadto sa ilang mga anak,
6aron makakat-on niini ang sunod nga kaliwatan,
ug tudloan usab nila ang ilang mga anak.
7Niining paagiha mosalig sila sa Dios
ug dili malimot sa iyang nabuhat,
kondili magmatinumanon kanunay sa iyang mga sugo.
8Dili sila angay manig-ingon sa ilang katigulangan
nga mga masupilon ug sukihan,
mga tawo nga dili lig-on ug pagsalig sa Dios
ug wala magmatinumanon kaniya.
9Sa adlaw sa panagsangka
nanibog ang mga taga-Efraim nga sangkap sa mga pana.
10Wala nila tumana ang ilang kasabotan uban sa Dios;
nagdumili sila pagtuman sa iyang balaod.
11Nalimot sila sa nahimo niya
pinaagi sa mga milagro nga iyang gipakita kanila.
12Atubangan#Exo. 7:8–12:32. #Klm. Sol. 16:1–19:22. sa ilang katigulangan nagbuhat siyag mga milagro
didto sa kapatagan sa Soan sa yuta sa Ehipto.
13Gibahin#Exo. 14:21-22. niya ang dagat ug gipalatas sila niini,
ug gipabarog niya nga daw paril ang katubigan.
14Maadlaw#Exo. 13:21-22. gitultolan niya sila pinaagi sa panganod,
ug sa tibuok gabii gigiyahan niya sila pinaagi sa kalayo.
15Gipaliki#Exo. 17:1-7; Num. 20:2-13. niya ang mga bato didto sa kamingawan,
ug gihatagan niya silag daghang tubig gikan sa kahiladman.
16Gipabuhagay niya gikan sa bato ang usa ka tubod,
ug gipadagayday niya ang tubig sama sa suba.
17Apan nagpadayon sila sa pagpakasala batok sa Dios,
ug didto sa kamingawan ilang gisuklan ang Labing Gamhanan.
18Gituyoan#Exo. 16:2-15; Num. 11:4-23, 31-35. nila pagsulay ang Dios
pinaagi sa pagpangayo sa pagkaon nga ilang gipangandoy.
19Gibiaybiay nila ang Dios,
“Makaandam bag pagkaon ang Dios dinhi sa kamingawan?” sila miingon.
20“Tinuod nga gihampak niya ang bato ug mibuhagay ang tubig
apan makahatag ba usab siyag pan ug karne kanato?”
21Busa nasuko ang Ginoo sa pagkadungog niya niini;
gipaantos niya sila pinaagi sa kalayo
ug misamot ang iyang kasuko kanila,
22kay wala man sila motuo kaniya
ug wala mosalig nga siya moluwas kanila.
23Apan gisugo niya ang kalangitan
nga buksan ang ilang pultahan,
24ug #Klm. Sol. 16:20-29; Juan 6:31. gihatagan niya silag pagkaon gikan sa langit
pinaagi sa pagpaulan ug mana aron ilang makaon.
25Busa nangaon sila sa kalan-on sa mga anghel.
Gihatagan niya sila sa tanang pagkaon nga ilang gikinahanglan.
26Unya gipahuros niya ang hangin gikan sa sidlakan,
ug pinaagi sa iyang gahom iyang gipahuros ang habagat
27ug gipadad-an niya silag mga langgam
nga sama kabaga sa abog ug ingon kadaghan sa balas sa kabaybayonan.
28Nanghugpa kini sa taliwala sa kampo
ug libot sa ilang mga tolda.
29Busa nangaon ang mga tawo ug nangabusog sila
kay gihatagan man sila sa Dios sa tanan nga ilang gusto.
30Apan samtang sila nangaon pa,
bisan gani sa wala pa sila mabusog,
31nasuko ang Dios kanila
ug gipatay niya ang labing kusgan kanila,
ang labing maayong batan-on sa katawhan sa Israel.
32Bisan pa sa iyang mga milagro,
ang katawhan nagpadayon sa pagpakasala ug wala sila manuo
33busa gitapos niya ang ilang kinabuhi ingon sa gininhawa
pinaagi sa kalit nga katalagman.
34Apan sa dihang gipatay niya ang pipila kanila,
ang uban midangop kaniya;
naghinulsol sila ug nagpakitabang kaniya.
35Nahinumdom sila nga ang Dios ilang tigpanalipod
ug ang Labing Halangdon mao ang ilang manluluwas.
36Apan pulos pag-ulog-ulog
ug mga bakak ang ilang gisulti.
37Wala#Buh. 8:21. sila magmatinud-anon kaniya;
wala nila tumana ang ilang saad kaniya.
38Apan maluluy-on ang Dios sa iyang katawhan
busa gipasaylo niya ang ilang sala
ug wala niya sila laglaga.
Sa makadaghan gipugngan niya
ang iyang kasuko ug kapungot.
39Gihinumdoman niya nga sila tawo lamang
ug sama sa hangin nga mohuros ug mahanaw.
40Pagkadaghan sa higayon nga sila misukol kaniya didto sa kamingawan;
pagkadaghan sa higayon nga siya ilang gihatagag kaguol!
41Kanunay nilang gisulayan ang Dios
ug gipalagot ang Balaang Dios sa Israel.
42Nalimot sila sa iyang pagkagamhanan
ug sa iyang pagluwas kanila gikan sa ilang mga kaaway.
43Nalimot usab sila sa katingalahan niyang mga buhat
didto sa kapatagan sa Soan sa yuta sa Ehipto.
44Gihimo#Exo. 7:17-21. niyang dugo ang kasubaan
aron dili na makainom ang mga Ehiptohanon.
45Gipadad-an#Exo. 8:20-24; Exo. 8:1-6. niya silag mga langaw nga nagpaantos kanila
ug mga baki nga nakahatag ug kadaot sa yuta.
46Gipadad-an#Exo. 10:12-15. niya silag mga ulod
aron pagkutkot sa ilang tanom,
ug mga dulon aron paglaglag sa ilang kaumahan.
47Gipamatay#Exo. 9:22-25. niya ang ilang kaparasan pinaagi sa ulan nga yelo
ug gilaglag ang ilang mga punoan sa igos pinaagi sa hilabihang katugnaw.
48Gipatay niya ang ilang mga baka pinaagi sa ulan nga yelo
ug ang ilang mga karnero pinaagi sa liti.
49Gihampak niya sila sa iyang bangis nga kasuko;
gihatagan niya silag dakong kalisdanan
pinaagi sa pagpadala sa mga anghel nga molaglag.
50Wala niya pugngi ang iyang kasuko
ug wala niya luwasa ang ilang kinabuhi
kondili gipatay sila pinaagi sa sakit.
51Gipatay#Exo. 12:29. niya ang mga panganay sa tanang banay sa Ehipto.
52Unya#Exo. 13:17-22. sama sa magbalantay sa karnero
iyang gitultolan ang iyang katawhan
ug gigiyahan niya sila latas sa kamingawan.
53Wala#Exo. 14:26-28. sila maunsa o malisang,
apan ang ilang mga kaaway nangalumos sa dagat.
54Gidala#Exo. 15:17; Jos. 3:14-17. niya sila sa balaang yuta,
ngadto sa kabukiran nga iyang gipanag-iya.
55Giabog#Jos. 11:16-23. niya ang mga nagpuyo didto
samtang nagsingabot ang iyang katawhan,
ug gibahinbahin niya ang yuta alang sa mga banay sa Israel,
ug didto gipapuyo niya sila sa ilang mga tolda.
56Apan#Mag. 2:11-15. misukol sila sa Labing Gamhanang Dios
ug gisulayan nila siya.
Wala sila magtuman sa iyang mga sugo,
57kondili misupil hinuon sila sama sa ilang katigulangan.
Sama sa baliko nga udyong, dili sila kasaligan.
58Gipasuko nila ang Dios pinaagi sa ilang mga alampoanan
ug gipalagot nila siya pinaagi sa ilang mga diosdios.
59Nasuko ang Dios sa pagkakita niya niini
busa gisalikway niya sa hingpit ang Israel nga iyang katawhan.
60Gibiyaan#Jos. 18:1; Jer. 7:12-14; 26:6. niya ang iyang tolda didto sa Silo,
ang tolda nga iyang gipuy-an samtang uban pa siya sa katawhan.
61Gitugotan#1 Sam. 4:4-22. niya ang mga kaaway sa pag-ilog sa Sudlanan sa Kasabotan
nga maoy timaan sa iyang gahom ug himaya.
62Nasuko siya sa iyang katawhan
ug gipapatay niya sila sa ilang mga kaaway.
63Nangamatay sa gubat ang mga batan-ong lalaki
ug wala nay mabana ang ilang mga dalaga.
64Ang mga pari gipamatay pinaagi sa espada
ug wala makahimog pagbangotan kanila ang ilang mga biyuda.
65Unya mimata ang Ginoo daw gikan sa pagkatulog;
sama siya sa kusgang tawo nga nagsinggit kay nakainom ug bino.
66Giabog niya ang iyang mga kaaway
ug gipakaulawan niya sila hangtod sa kahangtoran.
67Gisalikway niya ang mga kaliwat ni Jose;
wala niya pilia ang banay ni Efraim.
68Gipili hinuon niya ang banay ni Juda,
ingon man ang Bukid sa Sion nga gihigugma niya pag-ayo.
69Didto gitukod niya ang iyang Templo
sama sa iyang pinuy-anan didto sa langit;
gilig-on niya kini sama sa yuta
nga dili maunsa bisan kanus-a.
70Gipili#1 Sam. 16:11-12; 2 Sam. 7:8; 1 Cron. 17:7. niya si David nga iyang sulugoon;
gikuha niya siya
71gikan sa pagkamagbalantay sa karnero.
Gihimo niya siyang magbalantay sa Israel nga katawhan sa Dios.
72Gibantayan sila ni David sa dakong paghigugma ug pagkamatinud-anon
ug gimandoan niya sila sa paagi nga maalamon.
Kasalukuyang Napili:
Mga Salmo 78: RCPV
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 1999 Philippine Bible Society