Mga Popular na Bersikulo sa Biblia mula sa Éxodo 15

Ibahagi

Hinaspan Diosqa khaynata niran: —Noqan ima onqoymantapas sanoyachisuqniykichis Diosqa kani. Sichus qankuna noqapa rimasqaykunata allinta uyariwankichis, saynallataq qosqay leykunatapas hinallataq kamachisqaykunatapas allinta kasukunkichis chayqa, manan qankunataqa Egipto nacionniyoq runakunata castigasqay plagakunawanqa castigasqaykichishchu. Noqaqa Señor Diosniykichismi kani, nispa.

Señor Diosmi kallpanchawaqniyqa; chaymi noqaqa paypaq takipuni. Señor Diosmi salvaykuwaqniyqa; chaymi noqaqa payta alabani. Señor Diosmi noqapa Diosniyqa; chaymi noqaqa payta yupaychani. Señor Diosmi abueloykunapa Diosninqa; chaymi noqaqa payta yupaychani.

Señor Diosnilláy, ¿ima diostaq qan hinari kanman? ¿Pitaq qan hina ancha atiyniyoq ch'uyari kanman? Qanllan kanki ancha-ancha atiyniyoq Diosqa. Qanllan kanki tukuy hatu-hatun milagrokunata ruwaq Diosqa.

Ancha munakuyniykiwanmi, kay salvasqayki runakunataqa orqomuranki. Ancha atiyniykiwanmi paykunataqa tiyanayki ch'uya llaqtaman pusashanki.

Chaymantan chayaranku Mara nisqa lugarkama. Ichaqa manan chaypi unutaqa tomayta atirankuchu qatqe kasqanrayku. Chaymi chay lugartaqa suticharanku Mara sutiwan. Hinaqtinmi paykunaqa Moisespa contranpi rimayta qallariranku. Hinaspan khaynata reclamaranku: —¿Ima unutataq noqaykuri tomasaqkú? nispanku. Hinaqtinmi Moisesqa Diosmanta mañakuran. Chaymi Señor Diosqa huk sach'ata Moisesman rikuchiran. Hinaqtinmi payqa chay sach'ata unuman wikch'uykuran. Chaymi chay unuqa kasqan ratolla mishk'i unuman tukuran. Chay lugarpin Señor Diosqa Israelpa miraynin runakunata pruebaman churaran (kasukunqakuchus icha manachus chayta yachananpaq). Hinaspapas qollarantaqmi huk kamachikuykunatapas, chayman hina kawsanankupaq.