Ma‸htehˍ li‸ 4
4
Yeˍsuˆ beˬ ve lawˇ ve hta‸ gʼa hkanˍ ve
1Oˇ htaˇ, neˇhaiˬ beˬ ve lawˇ ve hta‸ Yeˍsuˆ gʼa hkanˍ tuˬ, Awˬ ha hpu yawˇ hta‸ heh puiˉ hkʼaw lo shiˍ kʼai ve yoˬ. 2Yeˍsuˆ lehˬ, awˇ chi nyi awˇ chi haˉ caˇ tuˬ maˇ caˇ leh chehˇ peuˬ heh‸, awˍ meu‸ la ve yoˬ. 3Oˇ htaˇ beˬ shehˍ hpaˇ yawˇ geh laˬ leh kʼoˆ ve, Nawˬ Gʼuiˬsha ve Yaˇ hpu hpeh‸ ve kʼo, haˉ pui shiˍ chi teˇ hpaˍ hta‸ hkaoˍmonˇ hpeh‸ la tuˬ tawˇ piˇ-oˆ teh‸, Yeˍsuˆ hta‸ kʼoˆ piˇ ve yoˬ.
4Yeˍsuˆ kʼaw‸ kʼoˆ piˇ ve, Li‸ hpu hkʼaw chi hkʼe bvuh‸ taˍ ve, Chaw yaˇ lehˬ hkaoˍmonˇ hta‸ pa taw ceh tiˉ gʼa te‸ ve maˇ heˆ. Gʼuiˬsha ve maw‸ kʼaw hkʼaw lo tawˆ la ve tawˇ teˇ hkawˇ le le hta‸ pa taw gʼa te‸ ve yoˬ, teh‸ kʼoˆ ve yoˬ. #Bon 8:3
5Oˇ htaˇ neˇhaiˬ lehˬ, Yeˍsuˆ hta‸ da‸ kehˬ ve venˇ lo shiˍ kʼai leh, bon yehˬ lonˉ ve awˬ hkʼoˇ meuˇ lo yawˇ hta‸ teh taˍ leh kʼoˆ piˇ ve, 6Nawˬ Gʼuiˬsha ve Yaˇ hpu hpeh‸ ve kʼo, pawˆ ce hkʼa. Awˬ lawn kʼo, Li‸ hpu hkʼaw chi hkʼe bvuh‸ taˍ ve,
Nawˬ hta‸ ha‸ shaˉ tuˬ, nawˬ awˬ pon yawˇ ve mvuhˇ naw ma tcuh yaˇ teˇ hpaˍ hta‸ yawˇ maˍ piˇ taˍ ve yoˬ.
Nawˬ ve hkui sheh haˉ pui shiˍ hta‸ maˇ gʼa heuˆ tuˬ,
yawˇ hui ve la‸ sheh nawˬ hta‸ chiˇ taˆ tuˬ yoˬ, teh‸ kʼoˆ piˇ ve yoˬ. #Chi 91:11-12
7Yeˍsuˆ yawˇ hta‸ kʼaw‸ kʼoˆ piˇ ve, Li‸ hpu hkʼaw teˇ kaˬ bvuh‸ taˍ sheˍ ve lehˬ, Nawˬ ve Jawˇmawˇ Gʼuiˬsha hta‸ nawˬ maˇ gʼa beˬ maˇ gʼa lawˇ teh‸ kʼaw‸ kʼoˆ piˇ ve yoˬ. #Bon 6:16
8Teˇ pawˆ neˇhaiˬ yawˇ hta‸ mvuh jaˇ ve hkʼaw teˇ shiˍ awˬ hkʼoˆ lo shiˍ kʼai ve yoˬ. Miˬguiˬ hkʼoˆ hkʼa cawˬ ve mvuhˇmiˬ hkʼa peu-eˬ leh mvuhˇmiˬ hkʼa peu-eˬ ve awˬ me‸ awˬ hponˇ yawˇ hta‸ maw piˇ leh kʼoˆ ve, 9Nawˬ ngaˬ hta‸ hkui tcuhˉ teh leh oˉ kʼoˍ pui laˇ ve kʼo, chi hkʼa peu-eˬ ngaˬ nawˬ hta‸ pe‸ laˇ tuˬ yoˬ teh‸ kʼoˆ piˇ ve yoˬ.
10Oˇ htaˇ Yeˍsuˆ yawˇ hta‸ kʼaw‸ kʼoˆ piˇ ve, Saˍtanˍ-oˬ, kʼai loˬ. Awˬ lawn kʼo, Nawˬ ve Jawˇmawˇ Gʼuiˬsha hta‸ ceh tiˉ nawˬ oˉ kʼoˍ gʼa pui leh, yawˇ ve kanˉ hta‸ ceh tiˉ nawˬ gʼa te ve yoˬ, teh‸ li‸ hpu hkʼaw bvuh‸ taˍ ve yoˬ. #Bon 6:13
11Oˇ htaˇ neˇhaiˬ yawˇ geh tawˆ kʼai leh, mvuhˇ naw ma tcuh yaˇ teˇ hpaˍ laˬ leh yawˇ hta‸ caˍ piˇ taw piˇ ve yoˬ.
Yeˍsuˆ kanˉ tanˬ te ve
12Yoˇhanˬ hta‸ shu hpeh yuˬ ve awˬ lawn Yeˍsuˆ gʼa kaˇ htaˇ, yawˇ Gaˍliˍlehˇ mvuhˇmiˬ lo kʼai ve yoˬ. 13Yawˇ Naˍzaˍrehˆ venˇ hkʼaw tawˆ kʼai leh, Zaˍbuˆlonˍ leh Naˍtaˍliˆ mvuhˇmiˬ awˬ kaˍ lo, gʼuiˬ po paˇ cawˬ ve Kaˍpeˍneˍonˍ venˇ hkʼaw gaˬ leh oˇ kaˬ lo chehˇ taˍ ve yoˬ. 14Chi lehˬ, tcuh kaˍ paˍ Iˉsaˍyaˆ kʼoˆ taˍ ve tawˇ chi teˇ hkawˇ hta‸ biˇ la piˇ ve yoˬ.
15Zaˍbuˆlonˍ mvuhˇmiˬ leh Naˍtaˍliˆ
mvuhˇmiˬ gʼuiˬ po paˇ lo kʼai ve ya‸ kʼaw, Yawˇdanˍ gʼuiˬ ma coˇ paˉ,
buiˇ shaˆ aˉ naˆ chaw hui chehˇ kuiˬ, Gaˍliˍlehˇ mvuhˇmiˬ-oˬ,
16naˆ ho‸ ve awˬ hkʼaw lo
chehˇ ve chaw hui lehˬ, uiˍ jaˇ ba jaˇ ve awˬ gʼeuˆ hta‸ gʼa mawˬ peuˬ.
Suh ve mvuhˇmiˬ leh suh ve aˉ gʼuiˬ ha awˬ hkʼaw lo
chehˇ ve chaw teˇ hpaˍ awˬ pon awˬ gʼeuˆ ba tawˆ la peuˬ,
teh‸ kʼoˆ taˍ ve yoˬ. #Isy 9:1-2 17Oˇ ve teˇ yanˇ ka‸ te leh, Yeˍsuˆ bon tanˬ maˍ leh kʼoˆ ve, Mvuhˇ naw ma mvuhˇmiˬ gaˬ la paˇ neˇ ve pa taw, venˇbaˆ hta‸ dawˇ hpfuhˆ loˬ teh‸ maˍ piˇ ve yoˬ.
Yeˍsuˆ lehˬ ngaˇ ca paˍ awˇ gʼaˇ hta‸ kuˬ ve
18Gaˍliˍlehˇ gʼuiˬ po paˇ lo Yeˍsuˆ kʼai chehˇ htaˇ, Peˍtruˆ teh‸ kʼoˆ ve Siˉmonˍ leh yawˇ ve awˬ nyi paˍ Anˍdrehˍ yawˇ huiˉ maˬ awˬ viˉ awˬ nyi nyiˇ gʼaˇ, gʼuiˬ po awˬ hkʼaw lo geu‸ hpehˇ chehˇ ve hta‸ Yeˍsuˆ yawˇ gʼa mawˬ ve yoˬ. Awˬ lawn kʼo, yawˇ huiˉ maˬ lehˬ ngaˇ ca paˍ hpeh‸ ve yoˬ. 19Oˇ htaˇ Yeˍsuˆ kʼoˆ ve, Ngaˬ hkʼaˇ suh laˬ-o‸. Ngaˬ nawˬ huiˉ maˬ hta‸ chaw ca shehˍ hpaˇ te tcuh laˇ tuˬ yoˬ teh‸, yawˇ huiˉ maˬ hta‸ kʼoˆ piˇ ve yoˬ. 20Yawˇ huiˉ maˬ teˇ cawˬ haˉ geu‸ hta‸ teh taˉ leh yawˇ awˬ hkʼaˇ suh kʼai ve yoˬ.
21Yeˍsuˆ awˬ gʼuˇ suhˍ kʼaw‸ kʼai htaˇ, awˬ kaˍ awˬ nu awˬ viˉ awˬ nyi nyiˇ gʼaˇ, Zeˍbeˍdehˇ ve awˬ yaˇ Yaˍkoˆ leh yawˇ ve awˬ nyi paˍ Yoˇhanˬ lehˬ, awˬ pa Zeˍbeˍdehˇ geh haw lo‸ kʼoˍ hkʼaw yawˇ hui ve geu‸ gu tawˉ chehˇ ve hta‸ Yeˍsuˆ gʼa mawˬ leh, yawˇ huiˉ maˬ hta‸ kuˬ yuˬ ve yoˬ. 22Yawˇ huiˉ maˬ htawˇ, teˇ cawˬ haˉ haw lo‸ kʼoˍ leh yawˇ huiˉ maˬ ve awˬ pa hta‸ teh taˉ leh yawˇ awˬ hkʼaˇ suh kʼai ve yoˬ.
Yeˍsuˆ bon maˍ leh chaw naˬ hta‸ gu na-e piˇ ve
23Oˇ htaˇ Yeˍsuˆ lehˬ, Gaˍliˍlehˇ mvuhˇmiˬ teˇ kaˬ le le lo kʼai leh yawˇ hui ve bon yehˬ teˇ hpaˍ awˬ hkʼaw lo maˍ piˇ leh, Gʼuiˬsha ve mvuhˇmiˬ hta‸ caˉ da‸ ve ha lehˬ ve bon hkawˇ htawˇ, teˇ kaˬ le le lo ca maˍ piˇ ve yoˬ. Chaw oˇ ve teˇ hpaˍ awˬ hkʼaw lo cawˬ ve a naˍ teˇ ceuˬ le le leh naˬ ve gawˬ ve teˇ ceuˬ le le hta‸ yawˇ gu na-e piˇ ve yoˬ. 24Hkʼe te leh, yawˇ ve awˬ lawn Suˇriˆ mvuhˇmiˬ teˇ kaˬ le le lo bvuhˬ kʼai ve yoˬ. Yawˇ hui lehˬ, a naˍ laiˉ ceuˬ naˬ chehˇ gawˬ chehˇ ve chaw, neˇ geh ve chaw, paw‸ hpeuˆ ve chaw, hkui sheh la‸ sheh suh ve chaw, chaw naˬ hkʼa peu-eˬ hta‸ yawˇ geh yuˬ laˬ leh yawˇ yawˇ hui hta‸ gu na-e piˇ ve yoˬ. 25Hkʼe te leh Gaˍliˍlehˇ mvuhˇmiˬ, Deˍkaˍpawˇliˆ mvuhˇmiˬ, Yeˍruˆsaˍlehnˍ venˇ, Yuˇda‸ mvuhˇmiˬ leh, Yawˇdanˍ gʼuiˬ ma coˇ paˉ lo laˬ ve chaw awˬ moˍ lonˉ teˇ hpaˍ yawˇ awˬ hkʼaˇ suh kʼai ve yoˬ.
ที่ได้เลือกล่าสุด:
Ma‸htehˍ li‸ 4: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.