Ma‸htehˍ li‸ 28
28
Yeˍsuˆ kʼaw‸ te‸ tu la ve
1Shinˉ nyi teˇ nyi peuˬ leh, suhˍ nyi awˬ hkʼaw lo awˉ lawˉ teˇ nyi mvuhˇ htiˇ la paˇ neˇ htaˇ, Maˍriˆ Maˍgaˍdaˍlaˆ leh awˬ kaˍ awˬ nu Maˍriˆ teˇ gʼaˇ, yawˇ huiˉ maˬ tuˍ hpfuh hta‸ ca nyi ve yoˬ. 2Oˇ htaˇ miˬ hiˆ jaˇ ve yoˬ. Awˬ lawn kʼo, Jawˇmawˇ Gʼuiˬsha ve mvuhˇ naw ma tcuh yaˇ teˇ gʼaˇ lehˬ, mvuhˇ naw ma lo ya‸ la leh haˉ pui shiˍ hta‸ hpfuhˆ baˬ sheˬ leh, haˉ pui shiˍ oˇ ve awˬ hkʼoˆ lo yawˇ mui taˍ ve yoˬ. 3Yawˇ ve awˬ ho‸ awˬ han lehˬ, mvuhˇ tiˉ po-e‸ hkʼe hpeh‸ leh, yawˇ ve veu‸ kʼaˇ htawˇ vaˇ meu-e hkʼa shuˍ shuˍ hpu ve yoˬ. 4Shaw shehˍ hpaˇ hui yawˇ hta‸ kawˆ jaˇ ve pa taw cheˇ jaˇ leh, chaw suh hkʼe hpeh‸ la ve yoˬ.
5Mvuhˇ naw ma tcuh yaˇ lehˬ, yaˇ miˇ oˇ ve nyiˇ gʼaˇ hta‸ kʼoˆ piˇ ve, Taˇ kawˆ. La‸ ka hkʼoˆ lo hta‸ pehˍ ve Yeˍsuˆ hta‸ nawˬ huiˉ maˬ ca nyi la ve ngaˬ shiˍ ve yoˬ. 6Yawˇ choˬ kaˬ maˇ chehˇ. Awˬ lawn kʼo, yawˇ kʼoˆ taˍ ve hkʼe kʼaw‸ te‸ tu la peuˬ. Yawˇ hta‸ teh taˍ kuiˬ lo ca nyi la-o. 7Haˆ haˆ kʼo‸-e leh, suh kuiˬ lo yawˇ kʼaw‸ te‸ tu la peuˬ teh‸, yawˇ ve awˬ la‸ gʼawˇ hui hta‸ ca hto piˇ-oˆ. Nawˬ hui gʼuˇ suhˍ Gaˍliˍlehˇ mvuhˇmiˬ lo yawˇ kʼai peuˬ. Oˇ kaˬ lo nawˬ hui yawˇ hta‸ gʼa mawˬ tuˬ yoˬ teh‸ hto piˇ sheˍ. Nyi loˬ, ngaˬ nawˬ huiˉ maˬ hta‸ hto laˇ ve yoˬ teh‸ kʼoˆ piˇ ve yoˬ.
8Oˇ htaˇ yawˇ huiˉ maˬ kawˆ ka‸ kawˆ, ha lehˬ ka‸ ha lehˬ jaˇ ve awˬ hkʼaw lo teˇ cawˬ haˉ tuˍ hpfuh lo tu leh, awˬ la‸ gʼawˇ hui hta‸ hto piˇ tuˬ gʼuiˇ kʼo‸-e ve yoˬ.
9Oˇ htaˇ, Yeˍsuˆ yawˇ huiˉ maˬ hta‸ ca ha‸ la leh, Awˬ bon uiˍ piˇ-oˆ teh‸ kʼoˆ piˇ ve yoˬ. Yawˇ huiˉ maˬ yawˇ ve hkui sheh hta‸ ca vawˆ taˍ leh yawˇ hta‸ oˉ kʼoˍ pui ve yoˬ. 10Oˇ htaˇ, Yeˍsuˆ yawˇ huiˉ maˬ hta‸ kʼoˆ piˇ ve, Taˇ kawˆ. Ngaˬ ve awˬ viˉ awˬ nyi teˇ hpaˍ hta‸ Gaˍliˍlehˇ mvuhˇ miˬ lo kʼai tuˬ ca hto piˇ-oˆ. Oˇ kaˬ lo yawˇ hui ngaˬ hta‸ gʼa mawˬ tuˬ yoˬ teh‸ kʼoˆ piˇ ve yoˬ.
11Yawˇ huiˉ maˬ kʼai chehˇ htaˇ, shaw shehˍ hpaˇ teˇ hpaˍ hpaˍ venˇ awˬ hkʼaw lo‸-e leh, hkʼa hpeh‸ la ve awˬ lawn hkʼa peu-eˬ paw hkuˇ lonˉ teˇ hpaˍ hta‸ hto piˇ ve yoˬ. 12Paw hkuˇ lonˉ hui lehˬ, awˬ hoˉ chaw mawˇ hui geh hpawnˬ da‸ leh jehˬ da‸ peuˬ hkʼaw‸ nawˉ, ma‸ yaˇ teˇ hpaˍ hta‸ yawˇ hui hpu maˇ maˇ piˇ leh kʼoˆ piˇ ve, 13Tanˇ hkuinˇ htaˇ ngaˬ hui zuh‸ chehˇ ve teˇ yanˇ, yawˇ ve awˬ la‸ gʼawˇ teˇ hpaˍ yawˇ hta‸ ca hkʼawˇ yuˬ la ve yoˬ teh‸ nawˬ hui shu hta‸ chi hkʼe kʼoˆ piˇ-oˆ. 14Awˬ lawn chi hta‸ mvuhˇmiˬ jawˇmawˇ lonˉ gʼa kaˇ ve kʼo, nawˬ hui hta‸ yawˇ te‸ chiˉ maˇ gʼa te tuˬ, ngaˬ hui yawˇ hta‸ beˬ tuˬ yoˬ teh‸ kʼoˆ ve yoˬ.
15Hkʼe te leh yawˇ hui hpu oˇ ve hta‸ yuˬ leh, shu yawˇ hui hta‸ maˍ piˇ taˍ ve hkʼe te ve yoˬ. Tawˇ hkawˇ oˇ ve lehˬ, Yuˇda‸ chaw hui awˬ hkʼaw lo ya‸ nyi hkʼa gaˬ bvuhˬ kʼai chehˇ ve yoˬ.
Yeˍsuˆ tawˇ piˇ taˉ ve
16Awˬ la‸ gʼawˇ oˇ ve teˇ chi teˇ gʼaˇ lehˬ, Gaˍliˍlehˇ mvuhˇmiˬ awˬ hkʼaw lo Yeˍsuˆ kʼoˆ piˇ taˍ ve hkʼaw teˇ shiˍ lo kʼai ve yoˬ. 17Yawˇ hui yawˇ hta‸ gʼa mawˬ leh oˉ kʼoˍ pui ve yoˬ. Ya‸ hkʼaˇ, teˇ hpaˍ hpaˍ hkʼa deh‸ maˇ yonˍ. 18Yeˍsuˆ yawˇ hui geh jiˆ laˬ leh kʼoˆ piˇ ve, Mvuhˇ naw ma hkʼoˆ leh miˬguiˬ hkʼoˆ ve kanˇ paˆ hkʼa peu-eˬ ngaˬ hta‸ pe‸ laˇ peuˬ. 19Hkʼe te leh nawˬ hui kʼai leh, chaw ceuˬ hkʼa peu-eˬ ngaˬ ve awˬ la‸ gʼawˇ hpeh‸ la tuˬ ca te-o. Awˬ pa, Yaˇ hpu leh da‸ ve kehˬ ve Awˬ ha hpu awˬ meh awˬ hawˉ lo yawˇ hui hta‸ baˆtiˆsaˬ piˇ-oˆ. 20Ngaˬ nawˬ hui hta‸ piˇ taˍ ve tawˇ hkawˇ hkʼa peu-eˬ na yuˬ leh te tuˬ, yawˇ hui hta‸ maˍ piˇ-oˆ. Miˬguiˬ chi awˬ yanˇ leh htaˇ hkʼa gaˬ, ngaˬ nawˬ hui geh hkʼaˬ htaˆ ka‸ chehˇ tuˬ yoˬ teh‸, yawˇ hui hta‸ kʼoˆ piˇ ve yoˬ.
ที่ได้เลือกล่าสุด:
Ma‸htehˍ li‸ 28: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.