Ma‸htehˍ li‸ 26
26
Yeˍsuˆ hta‸ tiˇ pehˍ tuˬ awˬ hoˉ teˇ hpaˍ jehˬ da‸ ve
1Awˬ lawn oˇ ve hkʼa peu-eˬ hta‸ Yeˍsuˆ kʼoˆ peuˬ hkʼaw‸ nawˉ, yawˇ ve awˬ la‸ gʼawˇ hui hta‸ yawˇ kʼoˆ piˇ ve, 2Nyiˇ nyi peuˬ kʼo, Paˍsaˍhkaˍ pawehˇ gaˬ la tuˬ ve hta‸ nawˬ hui shiˍ ve yoˬ. Chaw yaˇ ve Yaˇ hpu hta‸ la‸ ka hkʼoˆ lo hta‸ peh tuˬ, shu chiˇ a‸ piˇ ve hta‸ yawˇ gʼa hkanˍ tuˬ yoˬ teh‸ kʼoˆ ve yoˬ.
3Oˇ htaˇ, paw hkuˇ lonˉ hui leh Yuˇda‸ chaw teˇ hpaˍ awˬ hkʼaw lo awˬ hoˉ chaw mawˇ hui lehˬ, Kaˍyaˍhpaˆ meh ve paw hkuˇ lonˉ ve shaˉ nanˉ lo hpawnˬ da‸ leh, 4hkʼaˬ hkʼe te leh heˍ ve awˬ hkʼaw lo Yeˍsuˆ hta‸ hpeh yuˬ leh tiˇ pehˍ tuˬ yawˇ hui jehˬ da‸ ve yoˬ. 5Ya‸ hkʼaˇ yawˇ hui lehˬ, Chaw chi ma ve duiˆ-ehˍ shaˇ-ehˍ maˇ gʼa hpeh‸ la tuˬ, pawehˇ te ve awˬ yanˇ awˬ hkʼaw lo taˇ te teh‸ kʼoˆ da‸ ve yoˬ.
Yaˇ miˇ teˇ gʼaˇ Yeˍsuˆ hta‸ naˍ manˇ hawnˉ shehˍ piˇ ve
6Yeˍsuˆ lehˬ Beˍtaˍniˆ hkʼaˆ hkʼaw hkiˬ tu‸ paˍ Siˉmonˍ ve aˉ hkʼaw lo chehˇ taˍ htaˇ, 7yaˇ miˇ teˇ gʼaˇ yawˇ geh laˬ ve yoˬ. Yawˇ lehˬ, awˬ hpfuhˇ hkʼaˆ jaˇ ve naˍ manˇ hawnˉ keu taˍ ve hpuˉ-ehˍ ve haˉ pui kaw teˇ maˬ yuˬ laˬ leh, hpui lawˇ paˇ lo Yeˍsuˆ mui caˇ chehˇ htaˇ, yawˇ ve oˉ kʼoˍ hta‸ naˍ manˇ hawnˉ ngeuˍ pfuhˍ piˇ ve yoˬ. 8Yawˇ chi hkʼe te ve hta‸ awˬ la‸ gʼawˇ hui gʼa mawˬ htaˇ, yawˇ hui nyi ma zuhˆ leh kʼoˆ ve, Aˬ hto‸ ma te awˬ bon maˇ cawˬ ve awˬ hkʼaw lo chi hta‸ yehˇ baˬ ve le. 9Naˍ manˇ hawnˉ chi ve hta‸ awˬ hpfuhˇ maˇ chaweh hawˇ leh haˍ yaˇ gʼawˇ yaˇ hui hta‸ pehˬ piˇ hpeh‸ ve yoˬ teh‸ kʼoˆ ve yoˬ.
10Ya‸ hkʼaˇ, Yeˍsuˆ chi hta‸ shiˍ leh yawˇ hui hta‸ kʼoˆ piˇ ve, Yaˇ miˇ chi hta‸ aˬ hto‸ ma te sho‸ sha‸ piˇ ve le. Yawˇ ngaˬ hta‸ da‸ ve teˇ ceuˬ te laˇ peuˬ. 11Haˍ ve gʼawˇ ve chaw teˇ hpaˍ nawˬ hui geh hkʼaˬ htaˆ ka‸ chehˇ taˍ ve yoˬ. Ya‸ hkʼaˇ, ngaˬ nawˬ hui geh hkʼaˬ htaˆ ka‸ chehˇ tuˬ ve maˇ heˆ. 12Naˍ manˇ hawnˉ chi ngaˬ awˬ to hta‸ ngeuˍ pfuhˍ laˇ ve lehˬ, ngaˬ awˬ to hta‸ tuˍ laˇ tuˬ ve awˬ pon yawˇ gu taˍ ve yoˬ. 13Ngaˬ nawˬ hui hta‸ awˬ tehˬ awˬ na kʼoˆ laˇ ve, ha lehˬ ve bon hkawˇ chi, miˬguiˬ teˇ kaˬ le le lo ca maˍ piˇ ve teˇ yanˇ, yaˇ miˇ chi hta‸ dawˇ nawˇ tuˬ awˬ pon yawˇ te taˍ ve kanˉ chi hta‸ kʼaoˍ maˍ piˇ tuˬ yoˬ teh‸ kʼoˆ ve yoˬ.
Yeˍsuˆ hta‸ chiˇ a‸ piˇ tuˬ Yuˇda‸ hkanˍ ve
14Oˇ htaˇ, awˬ la‸ gʼawˇ teˇ chi nyiˇ gʼaˇ awˬ hkʼaw lo, Yuˇda‸ Iˉsaˍkaˍriˍoˆ meh ve teˇ gʼaˇ paw hkuˇ lonˉ hui geh kʼai leh, 15Nawˬ hui ve la‸ sheh awˬ hkʼaw lo ngaˬ yawˇ hta‸ chiˇ a‸ laˇ ve kʼo, ngaˬ hta‸ hkʼaˬ ma pe‸ laˇ tuˬ le teh‸ kʼoˆ ve yoˬ. Hkʼe te leh, yawˇ hui yawˇ hta‸ hpu shehˆ chi hteh‸ piˇ ve yoˬ. #Zhk 11:12 16Oˇ teˇ hkui hta‸ tanˬ leh, Yeˍsuˆ hta‸ chiˇ a‸ piˇ tuˬ, da‸ ve awˬ yanˇ hta‸ Yuˇda‸ ca chehˇ ve yoˬ.
Yeˍsuˆ yawˇ ve awˬ la‸ gʼawˇ hui geh Paˍsaˍhkaˍ pawehˇ caˇ ve
17Hkaoˍmonˇ awˬ hkʼaw lo diˇ maˇ keu ve pawehˇ awˉ lawˉ teˇ nyi htaˇ, awˬ la‸ gʼawˇ teˇ hpaˍ Yeˍsuˆ geh laˬ leh kʼoˆ ve, aˍsaˍhkaˍ pawehˇ caˇ tuˬ, nawˬ awˬ pon hkʼaˬ lo teˇ kaˬ gu tcuh laˇ gaˇ ve le teh‸ na nyi ve yoˬ.
18Yawˇ lehˬ, Venˇ awˬ hkʼaw lo chaw oˇ ve hpaˇ geh kʼai leh, Saˍ la‸ kʼoˆ laˇ ve, Ngaˬ ve awˬ yanˇ neˇ la peuˬ. Nawˬ ve yehˬ awˬ hkʼaw lo ngaˬ ve awˬ la‸ gʼawˇ hui geh teˇ geh Paˍsaˍhkaˍ pawehˇ hta‸ ngaˬ caˇ tuˬ yoˬ ceˇ teh‸ yawˇ hta‸ kʼoˆ piˇ-oˆ.
19Oˇ htaˇ, Yeˍsuˆ tcuh ve hkʼe awˬ la‸ gʼawˇ teˇ hpaˍ te leh, Paˍsaˍhkaˍ pawehˇ caˇ tuˬ awˬ pon ca gu ve yoˬ.
20Mehˆ muiˉ naˆ la htaˇ, awˬ la‸ gʼawˇ teˇ chi nyiˇ gʼaˇ geh hpui lawˇ paˇ lo yawˇ mui caˇ ve yoˬ. 21Yawˇ hui caˇ chehˇ htaˇ yawˇ kʼoˆ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, nawˬ hui awˬ hkʼaw lo teˇ gʼaˇ ngaˬ hta‸ chiˇ a‸ tuˬ yoˬ.
22Yawˇ hui dawˇ haˍ jaˇ leh, Jawˇmawˇ-oˬ, ngaˬ laˇ teh‸ teˇ gʼaˇ peuˬ teˇ gʼaˇ yawˇ hta‸ na nyi ve yoˬ.
23Yawˇ kʼaw‸ kʼoˆ ve, Ngaˬ geh teˇ hkehˇ tiˉ hkaˆ caˇ ve chaw teˇ gʼaˇ lehˬ, ngaˬ hta‸ chiˇ a‸ tuˬ yoˬ. 24Chaw yaˇ ve Yaˇ hpu lehˬ, yawˇ ve awˬ lawn bvuh‸ taˍ ve hkʼe yawˇ gʼa kʼo‸-e tuˬ yoˬ. Ya‸ hkʼaˇ, chaw yaˇ ve Yaˇ hpu hta‸ chiˇ a‸ ve chaw teˇ gʼaˇ lehˬ, gʼa dawˇ haˍ jaˇ tuˬ yoˬ. Chaw oˇ ve maˇ paw la ve hkʼe kʼo, yawˇ awˬ pon da‸ leuˉ ve yoˬ teh‸ kʼoˆ ve yoˬ. 25Yawˇ hta‸ chiˇ a‸ shehˍ hpaˇ Yuˇda‸ lehˬ, Jawˇmawˇ-oˬ, ngaˬ laˇ teh‸ na nyi htaˇ, Yoˬ, nawˬ kʼoˆ ve hkʼe yoˬ teh‸, Yeˍsuˆ yawˇ hta‸ kʼaw‸ kʼoˆ piˇ ve yoˬ.
Jawˇmawˇ Yeˍsuˆ ve pawehˇ caˇ ve
26Yawˇ hui caˇ chehˇ htaˇ, Yeˍsuˆ hkaoˍmonˇ hta‸ yuˬ leh bon hta‸ chiˇ mvuh ve yoˬ. Peuˬ leh yawˇ hkaoˍmonˇ hta‸ hkʼeh‸ leh, awˬ la‸ gʼawˇ hui hta‸ yawˇ piˇ leh kʼoˆ ve, Yuˬ leh caˇ-oˆ. Chi lehˬ ngaˬ ve awˬ to yoˬ teh‸ kʼoˆ piˇ ve yoˬ.
27Kawˆ hta‸ htawˇ yawˇ yuˬ leh bon hta‸ chiˇ mvuh peuˬ hkʼaw‸ nawˉ yawˇ hui hta‸ piˇ leh kʼoˆ ve, Nawˬ hui hkʼa peu-eˬ chi hta‸ dawˬ-o‸. 28Awˬ lawn kʼo, chi lehˬ ka ti‸ shaˉ caˆ hta‸ caˉ da‸ ve ngaˬ ve awˬ suhˍ yoˬ. Venˇbaˆ hpehˇ hkʼa tuˬ, chaw maˇ maˇ awˬ pon ngaˬ ve awˬ suhˍ hta‸ ngeuˍ pfuhˍ ve yoˬ. 29Nawˬ hui hta‸ ngaˬ kʼoˆ laˇ ve, ngaˬ Awˬ pa ve mvuhˇmiˬ awˬ hkʼaw lo nawˬ hui geh teˇ geh a pehˉ meuˇ gʼuiˬ awˬ suhˉ hta‸ ngaˬ gʼa dawˬ tuˬ ve awˬ nyi hkʼa gaˬ, ngaˬ a pehˉ meuˇ gʼuiˬ hta‸ maˇ kʼaw‸ dawˬ teh‸, yawˇ hui hta‸ kʼoˆ piˇ ve yoˬ.
Peˍtruˆ Yeˍsuˆ hta‸ chiˇ baˬ tuˬ ve awˬ lawn Yeˍsuˆ kʼoˆ piˇ ve
30Peuˬ leh yawˇ hui kʼa muiˬ hkawˇ kʼa peuˬ hkʼaw‸ nawˉ, yawˇ hui tawˆ-e leh Shaˍlonˍ hkʼaw lo kʼai ve yoˬ. 31Oˇ htaˇ Yeˍsuˆ yawˇ hui hta‸ kʼoˆ piˇ ve, Ya‸ puiˉ nawˬ hui hkʼa peu-eˬ ngaˬ hta‸ pa taw nyi ma luˬ tuˬ yoˬ. Awˬ lawn kʼo, Yawˬ hawˉ paˍ hta‸ ngaˬ dawˆ pehˍ leh, yawˬ teˇ hpaˍ hpaˆ da‸ leh teˇ kaˬ teˇ hkeh hpaw kʼai tuˬ yoˬ teh‸, Li‸ hpu hkʼaw bvuh‸ taˍ ve yoˬ. #Zhk 13:7 32Ya‸ hkʼaˇ ngaˬ kʼaw‸ te‸ tu la peuˬ hkʼaw‸ nawˉ, nawˬ hui gʼuˇ suhˍ Gaˍliˍlehˇ mvuhˇmiˬ lo ngaˬ kʼai tuˬ yoˬ teh‸ kʼoˆ ve yoˬ.
33Peˍtruˆ kʼoˆ ve, Nawˬ hta‸ pa taw shu hkʼa peu-eˬ nyi ma luˬ htawˇ, ngaˬ lehˬ hkʼaˬ htaˆ ka‸ nyi ma maˇ luˬ teh‸, yawˇ hta‸ kʼoˆ piˇ ve yoˬ.
34Yeˍsuˆ yawˇ hta‸ kʼoˆ piˇ ve, Ngaˬ nawˬ hta‸ awˬ tehˬ awˬ na kʼoˆ laˇ ve, ya‸ puiˉ gʼaˆ hpfuh maˇ bvuhˬ sheˍ htaˇ, nawˬ ngaˬ hta‸ shehˆ pawˆ hkʼa gaˬ chiˇ baˬ tuˬ yoˬ.
35Peˍtruˆ lehˬ, Nawˬ geh teˇ geh ngaˬ gʼa suh ve htawˇ, nawˬ hta‸ ngaˬ maˇ chiˇ baˬ taˬ teh‸ yawˇ hta‸ kʼoˆ piˇ ve yoˬ. Awˬ la‸ gʼawˇ hkʼa peu-eˬ htawˇ oˇ hkʼe kʼoˆ ve yoˬ.
Geˍseˍmaˍniˆ hko hkʼaw lo Yeˍsuˆ bon ca lawˬ ve
36Oˇ htaˇ Yeˍsuˆ lehˬ, yawˇ hui geh teˇ geh kʼai leh, Geˍseˍmaˍniˆ meh ve teˇ kaˬ lo gaˬ ve yoˬ. Yawˇ kʼoˆ ve, Ngaˬ awˬ gʼuˇ suhˍ lo bon ca lawˬ htaˇ, nawˬ hui choˬ kaˬ lo mui taˍ-o‸ teh‸, awˬ la‸ gʼawˇ hui hta‸ kʼoˆ piˇ ve yoˬ. 37Peuˬ leh, Peˍtruˆ leh Zeˍbeˍdehˇ ve awˬ yaˇ paˍ nyiˇ gʼaˇ hta‸ yawˇ shiˍ veu ve yoˬ. Oˇ htaˇ, yawˇ nyi ma dawˇ haˍ jaˇ, sho‸ sha‸ jaˇ la leh, 38yawˇ hui hta‸ kʼoˆ piˇ ve, Ngaˬ nyi ma dawˇ haˍ jaˇ ve suh la yoˬ. Choˬ kaˬ lo chehˇ taˍ leh ngaˬ geh teˇ geh shaw taˍ-o‸.
39Peuˬ leh, yawˇ awˬ gʼuˇ suhˍ a ciˉ kʼai leh, yawˇ mehˆ hpfuhˇ miˬ chaˇ hkʼoˆ boˆ sheˬ leh kʼoˆ ve, Ngaˬ pa-oˬ, kawˆ chi hta‸ ngaˬ ponˬ kʼai hpeh‸ ve kʼo, ponˬ kʼai tcuh laˇ-oˆ. Ya‸ hkʼaˇ, ngaˬ a loˍ cawˇ ve hkʼe taˇ hpeh‸ piˇ. Nawˬ a loˍ cawˇ ve hkʼe hpeh‸ piˇ-oˆ teh‸ bon lawˬ ve yoˬ.
40Awˬ la‸ gʼawˇ hui geh yawˇ kʼaw‸ la leh, yawˇ hui zuh‸ muiˉ kʼa chehˇ ve hta‸ gʼa mawˬ htaˇ, Peˍtruˆ hta‸ kʼoˆ piˇ ve, Teˇ naˍ riˍ ceh ka‸ nawˬ hui ngaˬ geh shaw taˍ maˇ hpeh‸ laˇ. 41Nawˬ hui beˬ ve lawˇ ve awˬ hkʼaˇ suh maˇ gʼa kʼai tuˬ bon lawˬ leh shaw taˍ-o‸. Ngaˬ hui te gaˇ ve nyi ma cawˬ htawˇ, awˬ suhˍ awˬ shaˍ lehˬ, awˬ gʼaˇ nuˇ ve yoˬ teh‸ kʼoˆ ve yoˬ.
42Yawˇ teˇ pawˆ kʼaw‸ kʼai leh, Ngaˬ pa-oˬ, kawˆ chi hta‸ ngaˬ maˇ dawˬ leh ponˬ maˇ hpeh‸ ve kʼo, nawˬ a loˍ cawˇ ve hkʼe hpeh‸ la piˇ-oˆ teh‸, bon kʼaw‸ lawˬ ve yoˬ. 43Yawˇ teˇ pawˆ kʼaw‸ kʼaw‸ la htaˇ, yawˇ hui zuh‸ muiˉ geu‸ jaˇ ve pa taw zuh‸ muiˉ kʼa chehˇ ve hta‸ yawˇ gʼa mawˬ ve yoˬ.
44Peuˬ leh, yawˇ yawˇ hui hta‸ teh taˉ leh teˇ pawˆ kʼaw‸ kʼai ve yoˬ. Awˬ gʼuˇ suhˍ htaˇ yawˇ lawˬ ve hkʼa shuˍ shuˍ, shehˆ pawˆ teˇ pawˆ bon kʼaw‸ lawˬ ve yoˬ. 45Oˇ htaˇ, awˬ la‸ gʼawˇ hui geh yawˇ kʼaw‸ la leh kʼoˆ piˇ ve, Nawˬ hui zuh‸ muiˉ kʼa leh gʼaˇ jehˇ chehˇ sheˍ laˇ. Nyi loˬ, chaw yaˇ ve Yaˇ hpu lehˬ, chaw haiˬ hui ve la‸ hkʼaw lo chiˇ a‸ ve hta‸ gʼa hkanˍ ve awˬ yanˇ gaˬ la peuˬ. 46Tu, kʼai-a veuˬ. Nyi loˬ, ngaˬ hta‸ chiˇ a‸ shehˍ hpaˇ awˬ paˇ lo gaˬ la peuˬ teh‸ kʼoˆ ve yoˬ.
Yeˍsuˆ hta‸ chiˇ a‸ piˇ leh hpeh yuˬ ve
47Yawˇ tawˇ yaw chehˇ htaˇ, tcuh yaˇ teˇ chi nyiˇ gʼaˇ awˬ hkʼaw lo Yuˇda‸ meh ve teˇ gʼaˇ laˬ leh, aˉ htaw pfuhˇ leh suhˆ taˬ taˆ ve chaw awˬ moˍ lonˉ htawˇ yawˇ geh teˇ geh laˬ ve yoˬ. Chaw awˬ moˍ lonˉ oˇ ve lehˬ, paw hkuˇ lonˉ hui leh Yuˇda‸ chaw hui ve awˬ hoˉ chaw mawˇ teˇ hpaˍ tcuh peu laˇ ve chaw hpeh‸ ve yoˬ. 48Yawˇ hta‸ chiˇ a‸ piˇ shehˍ hpaˇ teˇ gʼaˇ lehˬ, yawˇ hui hta‸ awˬ heˆ chi hkʼe te tuˬ kʼoˆ piˇ taˍ ve, Ngaˬ boˆ nu ve chaw teˇ gʼaˇ lehˬ yawˇ yoˬ. Yawˇ hta‸ yuˬ tiˍ taˍ-o‸.
49Oˇ htaˇ yawˇ Yeˍsuˆ geh teˇ cawˬ haˉ kʼai leh, Jawˇmawˇ-oˬ, awˬ bon uiˍ piˇ-oˆ teh‸ kʼoˆ leh, yawˇ hta‸ boˆ nu ve yoˬ.
50Yeˍsuˆ lehˬ, Awˬ chawˇ-oˬ, nawˬ dawˇ taˍ leh laˬ ve hkʼe te-o teh‸, yawˇ hta‸ kʼoˆ piˇ ve yoˬ.
Oˇ htaˇ, yawˇ hui Yeˍsuˆ hta‸ vawˆ leh yuˬ tiˍ taˍ ve yoˬ. 51Yeˍsuˆ geh chehˇ ve chaw hui awˬ hkʼaw lo teˇ gʼaˇ lehˬ, yawˇ ve aˉ htaw gʼawˬ tawˆ leh paw hkuˇ lonˉ vuiˬ taˍ ve awˬ ceˬ hta‸ chaw leh, naˍ paw cheˆ ve yoˬ. 52Oˇ htaˇ Yeˍsuˆ yawˇ hta‸ kʼoˆ piˇ ve, Nawˬ ve aˉ htaw hta‸ awˬ hpui awˬ hkʼaw lo kʼaw‸ hkʼaw‸ keu-o. Awˬ lawn kʼo, aˉ htaw hkʼa yehˇ ve chaw hkʼa peu-eˬ lehˬ, aˉ htaw hta‸ pa taw luˬ kʼai tuˬ yoˬ. 53Mvuhˇ naw ma tcuh yaˇ teˇ chi nyiˇ moˍ awˬ hkʼoˆ ka‸ ngaˬ geh peu laˇ tuˬ, chi beu‸ ngaˬ Awˬ pa geh lawˬ maˇ gʼa teh‸ nawˬ dawˇ ve laˇ. 54Ya‸ hkʼaˇ ngaˬ oˇ hkʼe lawˬ ve kʼo, chi hkʼe gʼa hpeh‸ la tuˬ yoˬ teh‸ bvuh‸ taˍ ve Li‸ hpu teˇ hpaˍ hkʼaˬ hkʼe te biˇ la tuˬ le teh‸ kʼoˆ ve yoˬ.
55Awˬ yanˇ oˇ ve awˬ hkʼaw lo Yeˍsuˆ chaw awˬ moˍ lonˉ teˇ hpaˍ hta‸ kʼoˆ piˇ ve, Nawˬ hui lehˬ, chaw hkʼawˇ hta‸ ca hpeh yuˬ ve hkʼe aˉ htaw leh suhˆ taˬ teˇ hpaˍ yuˬ veu laˇ leh, ngaˬ hta‸ ca hpeh la ve laˇ. Teˇ nyi le le bon yehˬ lonˉ awˬ hkaw lo ngaˬ mui taˍ leh maˍ piˇ chehˇ ve htawˇ, nawˬ hui ngaˬ hta‸ maˇ hpeh yuˬ. 56Ya‸ hkʼaˇ chi hkʼe hpeh‸ la ve hkʼa peu-eˬ lehˬ, Gʼuiˬsha ve tcuh kaˍ paˍ hui ve li‸ teˇ hpaˍ hta‸ biˇ la tuˬ awˬ pon yoˬ teh‸ kʼoˆ ve yoˬ.
Oˇ htaˇ, awˬ la‸ gʼawˇ hkʼa peu-eˬ yawˇ hta‸ baˬ taˉ leh hpaw-e ve yoˬ.
Jehˬ da‸ shehˍ hpaˇ awˬ moˍ Yeˍsuˆ hta‸ suhˉ jehˬ ve
57Yeˍsuˆ hta‸ hpeh yuˬ ve chaw teˇ hpaˍ lehˬ, li‸ bvuh‸ paˍ hui leh awˬ hoˉ chaw mawˇ teˇ hpaˍ hpawnˬ da‸ kuiˬ lo, paw hkuˇ lonˉ Kaˍyaˍhpaˆ geh yawˇ hta‸ yuˬ kʼai ve yoˬ. 58Peˍtruˆ lehˬ, paw hkuˇ lonˉ ve shaˉ nanˉ awˬ paˇ lo ko taˍ kuiˬ teˇ kaˬ hkʼa gaˬ Yeˍsuˆ awˬ hkʼaˇ suh a ciˉ vuiˇ kuiˬ lo kʼai leh, awˬ lawn chi awˬ leh meuˇ hkʼa gaˬ gʼa shiˍ gʼa mawˬ tuˬ, yawˇ lo‸-e leh shaw shehˍ hpaˇ teˇ hpaˍ geh mui taˍ ve yoˬ. 59Paw hkuˇ lonˉ teˇ hpaˍ leh jehˬ da‸ shehˍ hpaˇ awˬ moˍ hkʼa peu-eˬ lehˬ, Yeˍsuˆ hta‸ gʼa tiˇ pehˍ tuˬ, yawˇ awˬ lawn maˇ heˆ heˆ ve shaˉ hkiˆ hkanˍ shehˍ hpaˇ teˇ hpaˍ hta‸ yawˇ hui ca ve yoˬ. 60Maˇ heˆ heˆ ve shaˉ hkiˆ hkanˍ shehˍ hpaˇ maˇ maˇ tu la leh awˬ gʼuˇ suhˍ lo laˬ ve htawˇ, jehˬ shehˍ hpaˇ hui shaˉ hkiˆ ca maˇ mawˬ. Awˬ leh meuˇ gaˬ htaˇ, maˇ heˆ heˆ ve shaˉ hkiˆ hkanˍ shehˍ hpaˇ nyiˇ gʼaˇ awˬ gʼuˇ suhˍ lo laˬ leh kʼoˆ ve, 61Chi hpaˇ yawˇ kʼoˆ ve, Gʼuiˬsha ve bon yehˬ lonˉ hta‸ ngaˬ te luˬ leh, shehˆ nyi awˬ hkʼaw lo kʼaw‸ te gʼa ve yoˬ ceˇ teh‸, yawˇ huiˉ maˬ shaˉ hkiˆ hkanˍ ve yoˬ.
62Oˇ htaˇ paw hkuˇ lonˉ tu la leh, Nawˬ te‸ chiˉ ka‸ maˇ yaw hkʼaw‸ ve laˇ. Chaw chi teˇ hpaˍ nawˬ awˬ lawn aˬ hto‸ ma shaˉ hkiˆ hkanˍ ve le teh‸ yawˇ hta‸ kʼoˆ piˇ ve yoˬ. 63Ya‸ hkʼaˇ, Yeˍsuˆ ta‸ iˉ chehˇ taˍ ve yoˬ. Paw hkuˇ lonˉ yawˇ hta‸ kʼaw‸ kʼoˆ piˇ ve, Gʼuiˬsha ve Yaˇ hpu Hkri‸ teh‸ kʼoˆ ve teˇ gʼaˇ lehˬ, nawˬ yoˬ laˇ. Ngaˬ hui hta‸ hto laˇ tuˬ, te‸ chehˇ ve Gʼuiˬsha mehˆ gʼuˇ suhˍ ngaˬ nawˬ hta‸ hkanˍ tcuh laˇ ve yoˬ teh‸ kʼoˆ ve yoˬ.
64Yeˍsuˆ kʼaw‸ kʼoˆ ve, Yoˬ, nawˬ kʼoˆ ve hkʼe yoˬ. Chi hkʼoˆ ka‸ ngaˬ nawˬ hui hta‸ kʼoˆ laˇ ve, chi hkʼaw‸ nawˉ kʼo chaw yaˇ ve Yaˇ hpu lehˬ, Kanˇ paˆ awˬ shehˍ hpaˇ ve la‸ sha paˉ lo mui leh, mvuhˇ naw ma ve moˬ hta‸ ciˇ ya‸ la ve hta‸ nawˬ hui gʼa mawˬ tuˬ yoˬ teh‸, yawˇ hta‸ kʼoˆ piˇ ve yoˬ. #Chi 110:1, Dyl 7:13
65Oˇ htaˇ paw hkuˇ lonˉ yawˇ ve veu‸ kʼaˇ hta‸ tzuh‸ suhˍ leh kʼoˆ ve, Yawˇ lehˬ Gʼuiˬsha hta‸ maˇ shawˍ maˇ caˆ kʼoˆ peuˬ. Ngaˬ hui aˬ hto‸ ma shaˉ hkiˆ kʼaw‸ loˍ sheˍ le. Yawˇ Gʼuiˬsha hta‸ maˇ shawˍ maˇ caˆ kʼoˆ ve hta‸ chi beu‸ nawˬ hui gʼa kaˇ peuˬ. 66Nawˬ hui hkʼaˬ hkʼe dawˇ le teh‸ na nyi htaˇ, Yawˇ lehˬ suh keunˍ ve yoˬ teh‸ yawˇ hui kʼaw‸ kʼoˆ piˇ ve yoˬ.
67Oˇ htaˇ, yawˇ ve mehˆ hpfuhˇ hta‸ yawˇ hui ciˉ gʼuiˇ hpe‸ pfuhˍ leh yawˇ hta‸ chu-eˬ ve yoˬ. 68Teˇ hpaˍ hpaˍ yawˇ hta‸ hta leh kʼoˆ ve, Hkri‸-oˬ, nawˬ hta‸ a shu dawˆ laˇ ve le. Gʼuiˬsha ve tcuh kaˍ paˍ hkʼe te leh ngaˬ hui hta‸ hto laˇ-oˆ teh‸ kʼoˆ ve yoˬ.
Peˍtruˆ Yeˍsuˆ hta‸ chiˇ baˬ ve
69Oˇ htaˇ Peˍtruˆ lehˬ, shaˉ nanˉ awˬ paˇ lo ko taˍ kuiˬ awˬhkʼaw hpawˇ lo mui chehˇ ve yoˬ. Awˬ ceˬ ma teˇ gʼaˇ yawˇ geh laˬ leh, Nawˬ htawˇ Gaˍliˍlehˇ chaw Yeˍsuˆ geh chehˇ ve yoˬ teh‸ kʼoˆ ve yoˬ.
70Ya‸ hkʼaˇ yawˇ hui hkʼa peu-eˬ mehˆ gʼuˇ suhˍ Peˍtruˆ gʼawˬ hkʼaˆ leh, Nawˬ kʼoˆ ve hta‸ ngaˬ maˇ shiˍ teh‸ kʼoˆ ve yoˬ. 71Peuˬ leh, Peˍtruˆ ko taˍ kuiˬ yehˬ miˉ awˬ baˬ lo tawˆ kʼai htaˇ, awˬ kaˍ awˬ nu awˬ ceˬ ma teˇ gʼaˇ yawˇ hta‸ mawˬ leh, Chi hpaˇ lehˬ, Naˍzaˍrehˆ chaw Yeˍsuˆ geh chehˇ ve yoˬ teh‸, oˇ kaˬ lo chehˇ taˍ ve chaw hui hta‸ kʼoˆ piˇ ve yoˬ.
72Yawˇ teˇ pawˆ kʼaw‸ gʼawˬ hkʼaˆ leh, Chaw oˇ ve hta‸ ngaˬ maˇ shiˍ teh‸ kʼoˆ leh hkanˍ ve yoˬ.
73Awˬ hkʼaw‸ nawˉ maˇ maw maw gaˬ leh, oˇ kaˬ lo huˉ chehˇ ve chaw teˇ hpaˍ Peˍtruˆ geh laˬ leh, Nawˬ htawˇ awˬ tehˬ awˬ na yawˇ hui awˬ hkʼaw lo ve chaw teˇ gʼaˇ hpeh‸ ve yoˬ. Awˬ lawn kʼo, nawˬ tawˇ yaw ve hkawˇ hta‸ na ve ceh ka‸, ngaˬ hui shiˍ ve yoˬ teh‸, yawˇ hta‸ kʼoˆ piˇ ve yoˬ.
74Oˇ htaˇ yawˇ awˬ to hta‸ yawˇ hkeu leh, Chaw oˇ ve hta‸ ngaˬ maˇ shiˍ teh‸ kʼoˆ leh hkanˍ ve yoˬ. Teˇ cawˬ haˉ gʼaˆ hpfuh bvuhˬ la ve yoˬ.
75Gʼaˆ hpfuh maˇ bvuhˬ sheˍ htaˇ nawˬ ngaˬ hta‸ shehˆ pawˆ hkʼa gaˬ chiˇ baˬ tuˬ yoˬ teh‸, Yeˍsuˆ kʼoˆ piˇ taˍ ve hta‸ Peˍtruˆ dawˇ nawˇ la ve yoˬ. Oˇ htaˇ, yawˇ tawˆ kʼai leh gʼaˇ hte‸ hawˬ ve yoˬ.
ที่ได้เลือกล่าสุด:
Ma‸htehˍ li‸ 26: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.