Ma‸htehˍ li‸ 2
LHBR
2
Cuˇ yiˍ cawˬ paˍ hui laˬ ve
1Hkunˉ hawˉ hkanˇ Heˍroˆ ve awˬ co-e htaˇ, Yuˇda‸ mvuhˇmiˬ Behˍ lehˍhehnˍvenˇ awˬ hkʼaw lo Yeˍsuˆ paw la ve yoˬ. Oˇ htaˇ, cuˇ yiˍ cawˬ paˍ teˇ hpaˍ mvuhˇ nyi tawˆ hpawˇ lo tu la leh, Yeˍruˆsaˍlehnˍ venˇ lo gaˬ la ve yoˬ. 2Yawˇ hui kʼoˆ ve, Paw la peuˬ ve Yuˇda‸ hkunˉ hawˉ hkanˇ hkʼaˬ lo le. Awˬ lawn kʼo, mvuhˇ nyi tawˆ hpawˇ lo yawˇ ve meu‸ keu shiˍ hta‸ ngaˬ hui gʼa mawˬ leh, yawˇ hta‸ oˉ kʼoˍ pui tuˬ ngaˬ hui laˬ ve yoˬ teh‸ kʼoˆ piˇ ve yoˬ.
3Hkunˉ hawˉ hkanˇ Heˍroˆ tawˇ chi hta‸ gʼa kaˇ htaˇ, yawˇ ka‸ Yeˍruˆsaˍlehnˍ venˇ yaˇ hkʼa peuˍeˬ ka‸ dawˇ haˍ jaˇ ve yoˬ. 4Yuˇda‸ chaw ceuˬ awˬ hkʼaw lo paw hkuˇ lonˉ leh li‸ bvuh‸ paˍ hui hkʼa peu-eˬ hta‸ jawˇmawˇ Heˍroˆ kuˬ hpawnˬ peuˬ leh, Hkri‸ hkʼaˬ lo paw la tuˬ le teh‸, yawˇ yawˇ hui hta‸ na nyi ve yoˬ.
5Yawˇ hui yawˇ hta‸ kʼoˆ piˇ ve, Yuˇda‸ mvuhˇmiˬ Behˍlehˍhehnˍ venˇ awˬ hkʼaw lo paw la tuˬ yoˬ. Awˬ lawn kʼo, Gʼuiˬsha ve tcuh kaˍ paˍ teˇ gʼaˇ bvuh‸ taˍ ve hkʼe,
6Yuˇda‸ mvuhˇmiˬ Behˍlehˍhehnˍ venˇ-oˬ,
Yuˇda‸ jawˇmawˇ hui ve venˇ teˇ hpaˍ
awˬ hkʼaw lo, nawˬ lehˬ shu a‸ kehˉ awˬ me‸ awˬ hponˇ i ve maˇ heˆ.
Awˬ lawn kʼo, ngaˬ ve chaw ceuˬ hpeh‸ ve Iˉsaˍreˍlaˆ chaw hta‸
sheh kʼai tuˬ ve Jawˇmawˇ teˇ gʼaˇ lehˬ,
nawˬ awˬ hkʼaw lo tawˆ la tuˬ yoˬ, teh‸ bvuh‸ taˍ ve yoˬ. #Mlk 5:2
7Oˇ htaˇ, jawˇmawˇ Heˍroˆ lehˬ cuˇ yiˍ cawˬ paˍ hui hta‸ ta‸ iˉ kuˬ yuˬ leh, meu‸ keu shiˍ tawˆ la ve awˬ yanˇ hta‸ hkʼa deh‸ na nyi ve yoˬ. 8Hkʼe te leh, jawˇmawˇ Heˍroˆ yawˇ hui hta‸ kʼoˆ piˇ ve, Nawˬ hui kʼai leh yaˇ paˍ ehˉ oˇ ve hta‸ hkʼa deh‸ ca nyi-o. Yawˇ hta‸ mawˬ peuˬ hkʼaw‸ nawˉ, ngaˬ htawˇ yawˇ hta‸ oˉ kʼoˍ gʼa pui tuˬ, ngaˬ hta‸ kʼaw‸ hto laˇ-oˆ teh‸ kʼoˆ piˇ leh, yawˇ hui hta‸ Behˍlehˍhehnˍ venˇ lo kʼai tcuh ve yoˬ.
9Hkunˉ hawˉ hkanˇ ve tawˇ hkawˇ hta‸ yawˇ hui gʼa kaˇ peuˬ leh, yawˇ hui tawˆ kʼai ve yoˬ. Mvuhˇ nyi tawˆ hpawˇ lo yawˇ hui gʼa mawˬ ve meu‸ keu shiˍ lehˬ, yawˇ hui awˬ gʼuˇ suhˍ kʼai leh, yaˇ paˍ ehˉ chehˇ taˍ kuiˬ awˬ hkʼoˆ lo gaˬ htaˇ, jehˇ taˍ ve yoˬ. 10Meu‸ keu shiˍ oˇ ve hta‸ gʼa mawˬ ve teˇ yanˇ, yawˇ hui maˇ maˇ ha lehˬ jaˇ ve yoˬ. 11Yehˬ hkʼaw lo‸-e htaˇ, awˬ e Maˍriˆ geh yaˇ paˍ ehˉ hta‸ gʼa mawˬ leh, yawˇ hui boˆ sheˬ leh yaˇ paˍ ehˉ hta‸ oˉ kʼoˍ pui ve yoˬ. Yawˇ hui yuˬ laˬ taˍ ve mawˇ jeˬ hta‸ hpeu‸ tawˆ leh, shi, lawˇbanˍ, leh muˇraˍ, la‸ shawnˍ chi teˇ hpaˍ yawˇ hta‸ tanˇ piˇ ve yoˬ.
12Jawˇmawˇ Heˍroˆ geh maˇ gʼa kʼaw‸ kʼo‸-e tuˬ, zuh‸ maˆ ve awˬ hkʼaw lo Gʼuiˬsha yawˇ hui hta‸ maˍ piˇ ve pa taw, yawˇ hui lehˬ yawˇ hui ve mvuhˇmiˬ lo awˬ kaˍ awˬ nu ya‸ kʼaw teˇ caˆ hta‸ kʼaw‸ kʼo‸-e ve yoˬ.
Yoˇseh‸ leh Maˍriˆ Eˇjiˇtu‸ mvuhˇmiˬ lo hpaw-e ve
13Yawˇ hui kʼo‸-e peuˬ hkʼaw‸ nawˉ, zuh‸ maˆ ve awˬ hkʼaw lo Yoˇseh‸ lehˬ, Jawˇmawˇ Gʼuiˬsha ve mvuhˇ naw ma tcuh yaˇ teˇ gʼaˇ hta‸ gʼa mawˬ ve yoˬ. Mvuhˇ naw ma tcuh yaˇ Yoˇseh‸ hta‸ kʼoˆ piˇ ve, Tu loˬ. Yaˇ ehˉ leh yawˇ ve awˬ e hta‸ shiˍ veu leh Eˇjiˇtu‸ mvuhˇmiˬ lo hpaw-e loˬ. Ngaˬ nawˬ hta‸ kʼaw‸ kʼoˆ laˇ htaˇ hkʼa gaˬ oˇ kaˬ lo chehˇ taˍ-o‸. Awˬ lawn kʼo, yaˇ ehˉ hta‸ tiˇ pehˍ tuˬ jawˇmawˇ Heˍroˆ ca tuˬ yoˬ teh‸ kʼoˆ piˇ ve yoˬ.
14Oˇ htaˇ Yoˇseh‸ tu leh, yaˇ ehˉ leh yawˇ ve awˬ e hta‸ tanˇ hkuinˇ htaˇ shiˍ veu leh Eˇjiˇtu‸ mvuhˇmiˬ lo kʼai ve yoˬ. 15Jawˇmawˇ Heˍroˆ suh htaˇ hkʼa gaˬ yawˇ hui oˇ kaˬ lo chehˇ taˍ ve yoˬ. Awˬ lawn chi lehˬ, Jawˇmawˇ Gʼuiˬsha yawˇ ve tcuh kaˍ paˍ teˇ gʼaˇ hta‸ cuˇ leh, Eˇjiˇtu‸ mvuhˇ miˬ awˬ hkʼaw lo tawˆ la tuˬ ngaˬ ve yaˇ paˍ hta‸ ngaˬ kuˬ yuˬ peuˬ teh‸, yawˇ kʼoˆ taˍ ve tawˇ teˇ hkawˇ biˇ la tuˬ awˬ pon hpeh‸ la ve yoˬ. #Hse 11:1
Yaˇ paˍ ehˉ teˇ hpaˍ hta‸ hkunˉ hawˉ hkanˇ tiˇ pehˍ ve
16Oˇ htaˇ jawˇmawˇ Heˍroˆ lehˬ, cuˇ yiˍ cawˬ paˍ hui yawˇ hta‸ heˍ laˇ ve teh‸ gʼa shiˍ ve teˇ yanˇ, yawˇ nyi ma zuhˆ jaˇ ve yoˬ. Cuˇ yiˍ cawˬ paˍ hui hta‸ hkʼa deh‸ na nyi peuˬ ve awˬ yanˇ hta‸ yawˇ shawˍ nyi leh, Behˍlehˍhehnˍ venˇ awˬ hkʼaw lo leh awˬ paˇ awˬ kui lo hkʼa chehˇ ve a sha‸ nyiˇ hkʼaw‸ te leh awˬ hawˉ ve hawˉ hkʼaˆ paˍ ehˉ hkʼa peu-eˬ hta‸ ca tiˇ pehˍ tcuh ve yoˬ.
17Oˇ htaˇ, tcuh kaˍ paˍ Yeˍraˍmiˆ kʼoˆ taˍ ve tawˇ chi teˇ hkawˇ biˇ la ve yoˬ.
18Raˍmaˆ awˬ hkʼaw lo, paˆ hawˬ kehˇ hawˬ ve awˬ hkawˇ leh
dawˇ haˍ gaˇ haˍ jaˇ ve awˬ hkawˇ hta‸ gʼa kaˇ ve yoˬ.
Raˍhkeˍlaˆ lehˬ yawˇ ve yaˇ teˇ hpaˍ hta‸ pa taw
hawˬ chehˇ leh, yawˇ yaˇ maˇ kʼaw‸ cawˬ ve pa taw,
shu yawˇ hta‸ nyi ma sha la tuˬ te maˇ gʼa, teh‸ kʼoˆ taˍ ve yoˬ. #Yrm 31:15
Iˉsaˍreˍlaˆ mvuhˇmiˬ lo kʼaw‸ kʼo‸-e ve
19Jawˇmawˇ Heˍroˆ suh peuˬ hkʼaw‸ nawˉ, Yoˇseh‸ Eˇjiˇtu‸ mvuhˇmiˬ hkʼaw chehˇ htaˇ, yawˇ zuh‸ maˆ ve awˬ hkʼaw lo Jawˇmawˇ Gʼuiˬsha ve mvuhˇ naw ma tcuh yaˇ teˇ gʼaˇ hta‸ gʼa mawˬ ve yoˬ. Mvuhˇ naw ma tcuh yaˇ Yoˇseh‸ hta‸ kʼoˆ piˇ ve, 20Tu loˬ. Yaˇ ehˉ leh yawˇ ve awˬ e hta‸ shiˍ veu leh Iˉsaˍreˍlaˆ mvuhˇmiˬ lo kʼo‸-e loˬ. Awˬ lawn kʼo, yaˇ ehˉ hta‸ tiˇ pehˍ tuˬ ca ve chaw hui suh peuˬ teh‸ kʼoˆ piˇ ve yoˬ. 21Oˇ htaˇ yawˇ tu leh, yaˇ ehˉ leh yawˇ ve awˬ e hta‸ shiˍ veu leh, Iˉsaˍreˍlaˆ mvuhˇmiˬ lo kʼaw‸ kʼo‸-e ve yoˬ.
22Ya‸ hkʼaˇ, Aˍhkeˍlaˆ lehˬ yawˇ awˬ pa jawˇmawˇ Heˍroˆ ve aˉ yaˇ hta‸ kʼaw‸ yuˬ leh Yuˇda‸ mvuhˇmiˬ hta‸ uˉ peunˍ chehˇ ve awˬ lawn Yoˇseh‸ gʼa kaˇ htaˇ, yawˇ kawˆ leh oˇ kaˬ lo kʼo‸-e maˇ haˆ. Zuh‸ maˆ ve awˬ hkʼaw lo Gʼuiˬsha yawˇ hta‸ kʼaw‸ maˍ piˇ leh, Gaˍliˍlehˇ mvuhˇmiˬ lo yawˇ kʼai leh, Naˍzaˍrehˆ meh ve venˇ awˬ hkʼaw lo ca chehˇ ve yoˬ. 23Hkʼe te leh, Hkri‸ hta‸ Naˍzaˍrehˆ chaw kʼoˆ tuˬ yoˬ teh‸, Gʼuiˬsha ve tcuh kaˍ paˍ hui kʼoˆ taˍ ve tawˇ teˇ hkawˇ biˇ la ve yoˬ. #Isy 11:1