Ma‸htehˍ li‸ 12
12
Shinˉ nyi htaˇ awˬ la‸ gʼawˇ hui caˬ nu hta‸ chehˆ caˇ ve
1Oˇ ve teˇ yanˇ, Yeˍsuˆ lehˬ shinˉ nyi htaˇ heh hkʼaw hpanˍ kʼai ve yoˬ. Yawˇ ve awˬ la‸ gʼawˇ teˇ hpaˍ awˍ meu‸ leh caˬ nu chehˆ caˇ ve yoˬ. 2Hpaˍriˍsehˇ teˇ hpaˍ mawˬ leh, Nyi-o, shinˉ nyi awˬ hkʼaw lo te maˇ keunˍ te maˇ cawˇ ve awˬ ceuˬ hta‸ nawˬ ve awˬ la‸ gʼawˇ teˇ hpaˍ te chehˇ ve law teh‸, yawˇ hui yawˇ hta‸ kʼoˆ piˇ ve yoˬ.
3Yeˍsuˆ yawˇ hui hta‸ kʼaw‸ kʼoˆ piˇ ve, Daˍviˆ leh yawˇ ve awˬ chawˇ teˇ hpaˍ awˍ meu‸ ve teˇ yanˇ, yawˇ hui hkʼaˬ hkʼe te ve awˬ lawn hta‸ nawˬ hui maˇ gʼaw jaw leh laˇ. 4Yawˇ lehˬ Gʼuiˬsha ve yehˬ awˬ hkʼaw lo lo‸-e leh, yawˇ awˬ to ka‸ yawˇ ve awˬ chawˇ teˇ hpaˍ ka‸ caˇ maˇ keunˍ caˇ maˇ cawˇ ve, paw hkuˇ teˇ hpaˍ ceh tiˉ caˇ keunˍ caˇ cawˇ ve tanˇ taˍ ve hkaoˍmonˇ hta‸ caˇ ve maˇ heˆ laˇ. #1Rsv 21:1-6 5Peuˬ leh, shinˉ nyi htaˇ bon yehˬ lonˉ awˬ hkʼaw lo paw hkuˇ teˇ hpaˍ shinˉ nyi ve awˬ liˇ hta‸ te ya‸ ve htawˇ, yawˇ hui venˇbaˆ maˇ cawˬ ve awˬ lawn hta‸ awˬliˇtawˇhkawˇ awˬ hkʼaw lo nawˬ hui maˇ gʼaw jaw laˇ. 6Ngaˬ nawˬ hui hta‸ kʼoˆ laˇ ve, bon yehˬ lonˉ a‸ kehˉ uiˍ ve teˇ gʼaˇ choˬ kaˬ chehˇ taˍ ve yoˬ. 7Tanˇ tuˬ hta‸ ngaˬ heuˆ gaˇ ve maˇ heˆ. Ha kʼaˉ ve teˇ ceuˬ hta‸ ngaˬ heuˆ gaˇ ve yoˬ teh‸ kʼoˆ taˍ ve tawˇ hkawˇ hta‸ nawˬ hui shiˍ ve hkʼe kʼo, venˇbaˆ maˇ cawˬ ve chaw hta‸ nawˬ hui venˇbaˆ taˍ tuˬ maˇ heˆ. #Hse 6:6 8Awˬ lawn kʼo, chaw yaˇ ve Yaˇ hpu lehˬ, shinˉ nyi ve awˬ jawˇmawˇhpeh‸ ve yoˬ teh‸ kʼoˆ piˇ ve yoˬ.
La‸ sheh teˇ paˉ suh ve chaw awˬ lawn
9Yawˇ oˇ kaˬ lo tawˆ kʼai leh yawˇ hui ve bon yehˬ awˬ hkʼaw lo lo‸-e ve yoˬ. 10Oˇ kaˬ lo la‸ sheh teˇ paˉ suh ve chaw teˇ gʼaˇ cawˬ ve yoˬ. Yawˇ hui Yeˍsuˆ hta‸ venˇbaˆ taˍ tuˬ, Shinˉ nyi awˬ hkʼaw lo shu hta‸ gu na-e piˇ cawˇ laˇ teh‸, yawˇ hui yawˇ hta‸ na nyi ve yoˬ.
11Yawˇ yawˇ hui hta‸ kʼaw‸ kʼoˆ piˇ ve. Nawˬ hui awˬ hkʼaw lo chaw teˇ gʼaˇ gʼaˇ yawˬ teˇ hkeh tiˉ cawˬ leh, shinˉ nyi htaˇ yawˬ oˇ ve teˇ hkeh miˬ kʼoˍ hkʼaw ce lo‸-e ve kʼo, maˇ yuˬ tawˆ ve chaw teˇ gʼaˇ gʼaˇ cawˬ laˇ. 12Chaw yaˇ lehˬ, yawˬ a‸ kehˉ hkʼaˬ ma awˬ hpfuhˇ hkʼaˆ ve le. Hkʼe te leh, shinˉ nyi htaˇ da‸ ve awˬ ceuˬ hta‸ te cawˇ ve yoˬ teh‸, yawˇ kʼoˆ piˇ ve yoˬ. 13Oˇ htaˇ, chaw oˇ ve hta‸, Nawˬ ve la‸ sheh che hkʼa teh‸, yawˇ kʼoˆ piˇ ve yoˬ.
Chaw oˇ ve la‸ sheh che ve teˇ yanˇ kʼaw‸ da‸ la leh, awˬ nu ve teˇ paˉ hkʼa shuˍ shuˍ hpeh‸ la ve yoˬ. 14Oˇ htaˇ, Hpaˍriˍsehˇ teˇ hpaˍ tawˆ kʼai leh, Yeˍsuˆ hta‸ hkʼaˬ hkʼe te leh gʼa tiˇ pehˍ tuˬ jehˬ da‸ ve yoˬ.
Leuˆ yuˬ taˍ ve awˬ ceˬ teˇ gʼaˇ
15Awˬ lawn chi hta‸ Yeˍsuˆ gʼa shiˍ htaˇ, yawˇ oˇ kaˬ lo tawˆ kʼai ve yoˬ. Chaw maˇ maˇ yawˇ awˬ hkʼaˇ suh kʼai leh, yawˇ hui hkʼa peu-eˬ hta‸ yawˇ gu na-e piˇ ve yoˬ. 16Yawˇ ve awˬ lawn shu hta‸ maˇ gʼa kʼaoˍ piˇ tuˬ,yawˇ hui hta‸ yawˇ tawˇ hkʼa deh‸ piˇ taˍ ve yoˬ. 17Awˬ lawn chi lehˬ, tcuh kaˍ paˍ Iˉsaˍyaˆ kʼoˆ taˍ ve tawˇ teˇ hkawˇ biˇ la tuˬ awˬ pon yoˬ. Yawˇ kʼoˆ taˍ ve tawˇ hkawˇ lehˬ,
18Ngaˬ leuˆ yuˬ taˍ ve ngaˬ ve awˬ ceˬ teˇ gʼaˇ hta‸ nyi-o.
Yawˇ hta‸ ngaˬ nyi hkʼaˇ suh leh ha‸ jaˇ ve yoˬ.
Ngaˬ ve Awˬ ha hpu yawˇ awˬ hkʼoˆ hta‸ ngaˬ chehˇ piˇ leh,
suhˉ jehˬ ve awˬ lawn buiˇshaˆaˉnaˆ chaw hui hta‸ yawˇ kʼaoˍ maˍ piˇ tuˬ yoˬ.
19Tawˇ gʼawˬ da‸ ve maˇ kʼoˆ, kuˬ ve maˇ kʼoˆ, yawˇ maˇ te.
Ya‸ kʼaw kʼaˉ lo yawˇ ve awˬ hkawˇ hta‸ chaw teˇ gʼaˇ ka‸ maˇ gʼa kaˇ
20Suhˉ jehˬ ve awˬ liˇ hta‸ gʼaˇ kuiˬ lo
yawˇ maˇ gaˬ tcuh sheˍ ve ceh ceh, hteh kʼaˉ taˍ ve lo cehˬ hta‸ yawˇ maˇ te cheˆ.
Kawˆ faiˇ awˬ caˆ mvuhˇ hkʼawˇ du du te to‸ chehˇ ve hta‸ yawˇ maˇ shiˉ.
21Yawˇ ve awˬ meh awˬ hkʼaw lo buiˇshaˆaˉnaˆ chaw hui dawˇ law tuˬ yoˬ,
teh‸ kʼoˆ taˍ ve yoˬ. #Isy 41:8, 42:1-4
Da‸ ve kehˬ ve Awˬ ha hpu hta‸ shu maˇ shawˍ maˇ caˆ kʼoˆ ve
22Oˇ htaˇ neˇ geh taˍ ve, mehˆ cuˉ leh kʼaˍ ve chaw teˇ gʼaˇ hta‸ shu yawˇ geh yuˬ laˬ ve yoˬ. Yawˇ chaw kʼaˍ oˇ ve hta‸ gu na-e piˇ ve pa taw, chaw kʼaˍ oˇ ve tawˇ yaw gʼa la leh, mehˆ mawˬ la ve yoˬ. 23Oˇ htaˇ chaw awˬ moˍ lonˉ teˇ hpaˍ anˇ jaˇ leh, Chi lehˬ Daˍviˆ ve Yaˇ hpu leh naˍ leˇ teh‸ kʼoˆ da‸ ve yoˬ.
24Hpaˍriˍsehˇ teˇ hpaˍ gʼa kaˇ htaˇ, Chaw chi lehˬ, neˇ jawˇmawˇ Beˍsaˍbuˇlaˆ hta‸ gʼaˇ va ve awˬ hkʼaw lo ceh tiˉ neˇ teˇ hpaˍ hta‸ gʼa‸ kʼoˬ ve yoˬ teh‸ kʼoˆ ve yoˬ.
25Yawˇ hui dawˇ chehˇ ve hta‸ yawˇ shiˍ ve pa taw, yawˇ hui hta‸ kʼoˆ piˇ ve, Maˇ cawˇ maˇ hawˍ da‸ ve mvuhˇmiˬ teˇ peˆ le le luˬ kʼai sheˆ kʼai tuˬ yoˬ. Maˇ cawˇ maˇ hawˍ da‸ ve venˇ maˇ kʼoˆ, yehˬ maˇ kʼoˆ, yeˬ chehˇ hpeh‸ tuˬ ve maˇ heˆ. 26Saˍtanˍ lehˬ, Saˍtanˍ hta‸ gʼa‸ kʼoˬ ve kʼo, yawˇ awˬ to hta‸ hpaˆ da‸ tuˬ te ve yoˬ. Hkʼe te leh, yawˇ ve mvuhˇmiˬ hkʼaˬ hkʼe te yeˬ hpeh‸ tuˬ le. 27Ngaˬ lehˬ Beˍsaˍbuˇlaˆ hta‸ gʼaˇ va leh neˇ teˇ hpaˍ hta‸ gʼa‸ kʼoˬ ve hkʼe kʼo, nawˬ hui ve yaˇ paˍ teˇ hpaˍ lehˬ, a shu hta‸ gʼaˇ va leh gʼa‸ kʼoˬ ve le. Hkʼe te leh, yawˇ hui lehˬ nawˬ hui ve suhˉ jehˬ shehˍ hpaˇ hpeh‸ tuˬ yoˬ. 28Ya‸ hkʼaˇ, ngaˬ lehˬ Gʼuiˬsha ve Awˬ ha hpu hta‸ gʼaˇ va leh neˇ teˇ hpaˍ hta‸ gʼa‸ kʼoˬ ve kʼo, Gʼuiˬsha ve mvuhˇ miˬ nawˬ hui geh gaˬ la peuˬ.
29Awˬ gʼaˇ uiˍ ve chaw teˇ gʼaˇ hta‸ awˉ lawˉ maˇ hpeh tiˍ taˍ ve kʼo, yawˇ ve aˉ hkʼaw lo lo‸-e leh yawˇ ve mawˇ jeˬ hta‸ a shu hiˉ yuˬ gʼa tuˬ le. Awˬ gʼaˇ uiˍ ve chaw hta‸ hpeh tiˍ taˍ peuˬ htaˇ heh‸, yawˇ ve aˉ hkʼaw lo lo‸-e leh mawˇ jeˬ hta‸ hiˉ yuˬ gʼa tuˬ yoˬ.
30Ngaˬ hpawˇ maˇ chehˇ ve chaw lehˬ, ngaˬ ve canˇ paˍ hpawˇ chehˇ ve yoˬ. Ngaˬ geh teˇ geh maˇ gʼawˆ hpoˆ ve chaw lehˬ, gʼawˆ baˬ ve chaw hpeh‸ ve yoˬ. 31Hkʼe te leh, ngaˬ nawˬ hui hta‸ kʼoˆ laˇ ve, chaw yaˇ hui te ve venˇbaˆ teˇ ceuˬ le le leh maˇ shawˍ maˇ caˆ kʼoˆ ve teˇ ceuˬ le le hta‸ hpehˇ piˇ tuˬ yoˬ. Ya‸ hkʼaˇ, Awˬ ha hpu hta‸ maˇ shawˍ maˇ caˆ kʼoˆ ve teˇ ceuˬ hta‸ hpehˇ piˇ tuˬ maˇ heˆ. 32Chaw yaˇ ve Yaˇ hpu hta‸ yaw ya‸ ve chaw hkʼaˬ ve teˇ gʼaˇ maˇ kʼoˆ, yawˇ ve venˇbaˆ hta‸ hpehˇ piˇ hpeh‸ ve yoˬ. Ya‸ hkʼaˇ, da‸ ve kehˬ ve Awˬ ha hpu hta‸ yaw ya‸ ve chaw hkʼaˬ ve teˇ gʼaˇ maˇ kʼoˆ, chi teˇ ca‸ na‸ ka‸, awˬ hkʼaw‸ nawˉ teˇ ca‸ na‸ ka‸, yawˇ ve venˇbaˆ hta‸ hpehˇ piˇ maˇ hpeh‸.
Awˬ cehˬ da‸ kʼo, awˬ shiˍ ka‸ da‸ ve
33Awˬ cehˬ da‸ ve kʼo, awˬ shiˍ htawˇ da‸ ve yoˬ teh‸ kʼoˆ loˬ. Maˇ heˆ kʼo, awˬ cehˬ maˇ da‸ ve kʼo, awˬ shiˍ htawˇ maˇ da‸ ve teh‸ kʼoˆ loˬ. Awˬ lawn kʼo, awˬ shiˍ hta‸ pa taw awˬ cehˬ hta‸ shiˍ hpeh‸ ve yoˬ. 34Vuiˬ haiˬ awˬ ceuˬ teˇ hpaˍ-oˬ, nawˬ hui chaw haiˬ hpeh‸ ve pa taw da‸ ve tawˇ hkʼaˬ hkʼe te yaw hpeh‸ le. Awˬ lawn kʼo, nyi ma awˬ hkʼaw lo hkʼa biˇ cawˬ ve hkʼe, maw‸ kʼaw yaw tawˆ la ve yoˬ. 35Da‸ ve chaw lehˬ, a shu yawˇ da‸ ve awˬ ceuˬ doˆ taˍ kuiˬ awˬ hkʼaw lo da‸ ve awˬ ceuˬ hta‸ yuˬ tawˆ la ve yoˬ. Haiˬ ve chaw lehˬ, a shu yawˇ haiˬ ve awˬ ceuˬ doˆ taˍ kuiˬ awˬ hkʼaw lo haiˬ ve awˬ ceuˬ hta‸ yuˬ tawˆ la ve yoˬ.
36Ngaˬ nawˬ hui hta‸ kʼoˆ laˇ ve, suhˉ jehˬ ve awˬ nyi htaˇ chaw yaˇ lehˬ, awˬ bon maˇ cawˬ ve tawˇ hkʼa yaw ve teˇ hpaˍ awˬ lawn gʼa kʼaw‸ kʼaoˍ maˍ piˇ tuˬ yoˬ. 37Awˬ lawn kʼo, nawˬ ve tawˇ hkawˇ hta‸ pa taw, nawˬ venˇbaˆ taˍ ve hta‸ gʼa ponˬ tuˬ yoˬ. Peuˬ leh, nawˬ ve tawˇ hkawˇ hta‸ pa taw, nawˬ ciˍ yanˍ ve hta‸ gʼa hkanˍ tuˬ yoˬ.
Haiˬ ve chaw teˇ co lehˬ, awˬ heˆ hta‸ lawˬ ve
38Oˇ htaˇ, li‸ bvuh‸ paˍ leh Hpaˍriˍsehˇ teˇ hpaˍ hpaˍ lehˬ, Saˍ la‸-oˬ, nawˬ te maˍ laˇ ve awˬ heˆ teˇ ceuˬ ceuˬ hta‸ ngaˬ hui mawˬ gaˇ ve yoˬ teh‸ yawˇ hta‸ kʼoˆ piˇ ve yoˬ.
39Yawˇ yawˇ hui hta‸ kʼaw‸ kʼoˆ piˇ ve, Haiˬ leh te ya‸ puiˉ ve chaw chi teˇ co lehˬ, awˬ heˆ hta‸ lawˬ ve yoˬ. Tcuh kaˍ paˍ Yoˇnaˆ ve awˬ heˆ maˇ heˆ kʼo, awˬ kaˍ awˬ nu awˬ heˆ teˇ ceuˬ ka‸ chaw chi teˇ co hta‸ maˇ maˍ piˇ. 40Yoˇnaˆ lehˬ, ngaˇ lonˉ gʼoˇ peˬ awˬ hkʼaw lo shehˆ nyi shehˆ haˉ gʼa chehˇ ve hkʼa shuˍ shuˍ, chaw yaˇ ve Yaˇ hpu htawˇ miˬ kʼoˍ hkʼaw lo shehˆ nyi shehˆ haˉ gʼa chehˇ tuˬ yoˬ. 41Suhˉ jehˬ ve awˬ nyi htaˇ, Niˇnaˍveˍ venˇ yaˇ hui lehˬ, chaw chi teˇ co geh teˇ geh tu la leh, chaw chi teˇ co hta‸ suhˉ taˆ tuˬ yoˬ. Awˬ lawn kʼo, Yoˇnaˆ bon maˍ ve hta‸ pa taw yawˇ hui a shu yawˇ ve venˇbaˆ hta‸ dawˇ hpfuhˆ ve yo‸. Nyi loˬ, choˬ kaˬ lo Yoˇnaˆ a‸ kehˉ uiˍ ve teˇ gʼaˇ chehˇ taˍ ve yo‸. 42Suhˉ jehˬ ve awˬ nyi htaˇ, awˬ hawˉ hpawˇ mvuhˇmiˬ ve nanˇ hawˉ hkanˇ ma htawˇ, chaw chi teˇ co geh teˇ geh tu la leh, chaw chi teˇ co hta‸ suhˉ taˆ tuˬ yoˬ. Awˬ lawn kʼo, yawˇ lehˬ Sawˉla‸monˍ ve cuˇ yiˍ tawˇ hkawˇ hta‸ na tuˬ, miˬ guiˬ awˬ leh meuˇ teˇ kaˬ lo tu leh laˬ ve yoˬ. Nyi loˬ, choˬ kaˬ lo Sawˉla‸monˍ a‸ kehˉ uiˍ ve teˇ gʼaˇ chehˇ taˍ ve yoˬ.
Neˇ cha‸ chiˆ teˇ hkeh kʼaw‸ la ve
43Neˇ cha‸ chiˆ teˇ hkeh lehˬ, chaw teˇ gʼaˇ awˬ hkʼaw lo tawˆ kʼai peuˬ hkʼaw‸ nawˉ, goˇ choˆ ve chehˇ kuiˬ teˇ hpaˍ awˬ hkʼaw lo ca toˇ nyi leh, gʼaˇ jehˇ kuiˬ hta‸ ca ve htawˇ, maˇ mawˬ. 44Oˇ htaˇ yawˇ lehˬ, Ngaˬ tawˆ la ve ngaˬ ve yehˬ lo kʼaw‸ kʼo‸-e shaˍ teh‸ kʼoˆ leh, yawˇ kʼaw‸ gaˬ la ve teˇ yanˇ, yehˬ oˇ ve lehˬ kʼawˇ lehˍ kehˬ lehˍ hkʼa deh‸ gu shiˆ taˍ ve hta‸ yawˇ gʼa mawˬ ve yoˬ. 45Oˇ htaˇ, yawˇ kʼai leh yawˇ a‸ kehˉ haiˬ ve awˬ kaˍ awˬ nu neˇ suhˍ hkeh hta‸ kuˬ veu laˇ peuˬ hkʼaw‸ nawˉ, yawˇ hui lo‸-e leh oˇ kaˬ lo chehˇ ve yoˬ. Hkʼe te leh, chaw oˇ ve awˬ hkʼaw‸ nawˉ hpeh‸ la ve lehˬ, awˉ lawˉ htaˇ hpeh‸ ve a‸ kehˉ leuˉ leh haiˬ ve yoˬ. Haiˬ ve chaw chi teˇ co htawˇ, oˇ ve hkʼa shuˍ shuˍ hpeh‸ la tuˬ yoˬ teh‸, Yeˍsuˆ kʼoˆ ve yoˬ.
Yeˍsuˆ ve awˬ e leh awˬ nyi paˍ teˇ hpaˍ
46Chaw awˬ moˍ lonˉ hta‸ yawˇ maˍ piˇ chehˇ htaˇ, yawˇ ve awˬ e leh awˬ nyi paˍ teˇ hpaˍ lehˬ, yawˇ hta‸ na‸ uˉ te da‸ gaˇ leh, awˬ baˬ hpawˇ lo huˉ taˍ ve yoˬ. 47Hkʼe te leh, chaw teˇ gʼaˇ yawˇ hta‸ kʼoˆ piˇ ve, Nawˬ ve awˬ e leh nawˬ ve awˬ nyi paˍ teˇ hpaˍ nawˬ hta‸ na‸ uˉ te da‸ gaˇ leh, awˬ baˬ hpawˇ lo huˉ taˍ ve yoˬ.
48Yawˇ hta‸ tawˇ yaw laˇ ve chaw teˇ gʼaˇ hta‸ yawˇ kʼaw‸ kʼoˆ piˇ ve, Ngaˬ ve awˬ e leh ngaˬ ve awˬ nyi paˍ teˇ hpaˍ a shu le teh‸ na nyi ve yoˬ. 49Oˇ htaˇ, yawˇ ve awˬ la‸ gʼawˇ teˇ hpaˍ hta‸ yawˇ beˆ leh kʼoˆ ve, Ngaˬ ve awˬ e leh ngaˬ ve awˬ nyi paˍ teˇ hpaˍ hta‸ nyi loˬ. 50Awˬ lawn kʼo, mvuhˇ naw ma hkʼoˆ chehˇ ve ngaˬ Awˬ pa ve a loˍ hta‸ hkʼa te ve chaw hui lehˬ, ngaˬ ve awˬ nyi paˍ, ngaˬ ve awˬ nyi ma leh ngaˬ ve awˬ e hpeh‸ ve yoˬ teh‸ kʼoˆ piˇ ve yoˬ.
ที่ได้เลือกล่าสุด:
Ma‸htehˍ li‸ 12: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.