Ma‸htehˍ li‸ 10
10
Tcuh yaˇ teˇ chi nyiˇ gʼaˇ hta‸ leuˆ yuˬ ve
1Oˇ htaˇ, yawˇ ve awˬ la‸ gʼawˇ teˇ chi nyiˇ gʼaˇ hta‸ yawˇ kuˬ yuˬ leh, neˇ cha‸ chiˆ teˇ hpaˍ hta‸ gʼa‸ kʼoˬ tuˬ maˇ kʼoˆ, a naˍ teˇ ceuˬ le le leh naˬ ve gawˬ ve teˇ ceuˬ le le hta‸ gu na-e piˇ tuˬ maˇ kʼoˆ, yawˇ hui hta‸ kanˇ paˆ piˇ ve yoˬ. 2Tcuh yaˇ teˇ chi nyiˇ gʼaˇ ve awˬ meh lehˬ chi teˇ hpaˍ yoˬ. Awˉ lawˉ teˇ gʼaˇ, Peˍtruˆ teh‸ kʼoˆ ve Siˉmonˍ leh yawˇ ve awˬ nyi paˍ Anˍdrehˍ, Zeˍbeˍdehˇ ve awˬ yaˇ paˍ Yaˍkoˆ leh Yaˍkoˆ ve awˬ nyi paˍ Yoˇhanˬ, 3Hpiˇliˇpuˆ leh Baˍhtawˇlaˍmehˇ, Htoˉma‸leh awˬ hkawnˍ shaw paˍ Ma‸htehˍ, Aˍlaˍhpehˇ ve awˬ yaˇ paˍ Yaˍkoˆ leh Htaˍdehˇ, 4Hkaˍnaˍniˆ awˬ moˍ hta‸ caˉ da‸ ve chaw Siˉmonˍleh, Yeˍsuˆ hta‸ chiˇ a‸ piˇ shehˍ hpaˇ Yuˇda‸ Iˉsaˍkaˍriˍoˆ hui yoˬ.
Tcuh yaˇ teˇ chi nyiˇ gʼaˇ hta‸ kʼai tcuh ve
5Tcuh yaˇ oˇ ve teˇ chi nyiˇ gʼaˇ hta‸ Yeˍsuˆ kʼai tcuh leh, yawˇ hui hta‸ chi hkʼe tawˇ piˇ ve, Buiˇ shaˆ aˉ naˆ chaw hui ve chehˇ kuiˬ lo taˇ kʼai. Saˍmaˍriˆ venˇ teˇ hpaˍ awˬ hkʼaw lo htawˇ taˇ lo‸-e. 6Iˉsaˍreˍlaˆ teˇ yehˬ awˬ hkʼaw lo mehˉ kʼai peuˬ ve yawˬ teˇ hpaˍ geh kʼai-o. 7Nawˬ hui kʼai chehˇ ve teˇ yanˇ, Mvuhˇ naw ma mvuhˇmiˬ gaˬ la paˇ neˇ peuˬ teh‸, bon maˍ piˇ-oˆ. 8Naˬ ve chaw hui hta‸ gu na-e piˇ-oˆ. Suh ve chaw hui hta‸ kʼaw‸ te‸ tu la piˇ-oˆ. Hkiˬ tu‸ keuˆ ve chaw hui hta‸ da‸ la kehˬ la piˇ-oˆ. Neˇ teˇ hpaˍ hta‸ gʼa‸ kʼoˬ-o‸. Nawˬ hui hkʼe leˇ gʼa ve hkʼa shuˍ shuˍ, shu hta‸ hkʼe leˇ kʼaw‸ piˇ-oˆ. 9Nawˬ hui ve haˍ pi caˆ awˬ hkʼaw lo, hpu, shi, peh‸ shanˍ teˇ hpaˍ hta‸ taˇ doˆ veu. 10Ya‸ kʼaw kʼaˉ awˬ pon miˉ chaw leh aˉ po‸ nyiˇ hkʼoˆ hta‸ ka‸, hkuiˉ nuˆ leh juˇ fuiˍ hta‸ ka‸, taˇ yuˬ kʼai. Awˬ lawn kʼo, kanˉ te ve chaw lehˬ, caˇ tuˬ dawˬ tuˬ hta‸ gʼa cawˇ ve yoˬ.
11Hkʼaˬ ve teˇ venˇ hkʼaˬ ve teˇ hkʼaˆ awˬ hkʼaw lo nawˬ hui lo‸-e ve maˇ kʼoˆ, A shu keunˍ ve le teh‸ na nyi leh, hkʼaˆ oˇ ve awˬ hkʼaw lo nawˬ hui tawˆ kʼai htaˇ hkʼa gaˬ oˇ kaˬ lo chehˇ taˍ-o‸. 12Yehˬ hkʼaw lo‸-e htaˇ bon na‸ piˇ-oˆ. 13Yehˬ oˇ ve keunˍ ve kʼo, nawˬ hui ve dawˇ sha gaˇ sha ve awˬ ceuˬ oˇ kaˬ lo cawˬ piˇ-oˆ. Ya‸ hkʼaˇ maˇ keunˍ ve kʼo, nawˬ hui ve dawˇ sha gaˇ sha ve awˬ ceuˬ nawˬ hui geh kʼaw‸ la tuˬ yoˬ. 14Chaw teˇ gʼaˇ gʼaˇ nawˬ hui hta‸ maˇ ha‸ yuˬ leh nawˬ hui ve tawˇ hkawˇ hta‸ maˇ na ve kʼo, yehˬ oˇ ve awˬ hkʼaw maˇ kʼoˆ, venˇ oˇ ve awˬ hkʼaw maˇ kʼoˆ, nawˬ hui tawˆ kʼai htaˇ, hkui taw kʼaw hta‸ ngawˉ taˍ ve je‸ meu-e hta‸ hpi baˬ taˉ-oˆ. 15Ngaˬ nawˬ hui hta‸ awˬ tehˬ awˬ na kʼoˆ laˇ ve, suhˉ jehˬ ve awˬ nyi htaˇ, venˇ oˇ ve lehˬ Sawˉdonˍ leh Gawˇmawˇra‸ mvuhˇmiˬ a‸ kehˉ gʼa hkanˍ tuˬ yoˬ.
Fawˉ ve mehˍ ve hta‸ gʼa hkanˍ tuˬ ve
16Nawˬ hui yawˬ hkʼe hpeh‸ leh, veˬ awˬ moˍ awˬ hkʼaw lo ngaˬ nawˬ hui hta‸ kʼai tcuh ve yoˬ. Hkʼe te leh, vuiˬ hkʼa shuˍ shuˍ, cuˇ yiˍ cawˬ leh, aˉ pui kʼaˍ hkʼa shuˍ shuˍ, shu hta‸ maˇ ya‸ puiˉ ve chaw hpeh‸ piˇ-oˆ. 17Chaw yaˇ teˇ hpaˍ hta‸ shaˍ ti‸ te-o. Awˬ lawn kʼo, yawˇ hui lehˬ, jehˬ shehˍ hpaˇ awˬ moˍ mehˆ gʼuˇ suhˍ nawˬ hui hta‸ chiˇ a‸ piˇ leh, yawˇ hui ve bon yehˬ teˇ hpaˍ awˬ hkʼaw lo nawˬ hui hta‸ jaw‸ tuˬ yoˬ. 18Ngaˬ hta‸ pa taw, nawˬ hui hta‸ mvuhˇ miˬ jawˇmawˇ lonˉ leh hkunˉ hawˉ hkanˇ teˇ hpaˍ mehˆ gʼuˇ suhˍ shu yuˬ kʼai tuˬ yoˬ. Yawˇ hui mehˆ gʼuˆ suhˍ leh buiˇ shaˆ aˉ naˆ chaw hui mehˆ gʼuˇ suhˍ nawˬ hui shaˉ hkiˆ hpeh‸ tuˬ yoˬ. 19Shu nawˬ hui hta‸ chiˇ a‸ piˇ ve teˇ yanˇ, nawˬ hui hkʼaˬ hkʼe gʼa kʼoˆ gʼa yaw tuˬ taˇ dawˇ hkiˉ. Awˬ yanˇ oˇ ve awˬ hkʼaw lo hkʼaˬ hkʼe gʼa kʼoˆ tuˬ ve hta‸ nawˬ hui shiˍ tuˬ yoˬ. 20Awˬ lawn kʼo, tawˇ yaw shehˍ hpaˇ lehˬ nawˬ hui maˇ heˆ. Nawˬ hui Awˬ pa ve Awˬ ha hpu lehˬ, nawˬ hui awˬ hkʼaw lo tawˇ yaw tuˬ yoˬ.
21Awˬ viˉ awˬ nyi teˇ gʼaˇ leh teˇ gʼaˇ suh tuˬ chiˇ a‸ da‸ tuˬ yoˬ. Awˬ pa htawˇ, a shu yawˇ ve yaˇ hta‸ chiˇ a‸ tuˬ yoˬ. Yaˇ paˍ yaˇ miˇ teˇ hpaˍ htawˇ, a shu yawˇ ve awˬ pa awˬ e hta‸ hpfuhˆ leh tiˇ pehˍ tcuh tuˬ yoˬ. 22Ngaˬ ve awˬ meh hta‸ pa taw, chaw hkʼa peu-eˬ nawˬ hui hta‸ canˇ tuˬ yoˬ. Ya‸ hkʼaˇ, awˬ leh hkʼa gaˬ yeˬ chehˇ ve chaw lehˬ, htaiˍ hkʼaw‸ ve hta‸ gʼa tuˬ yoˬ. 23Venˇ teˇ venˇ awˬ hkʼaw lo shu nawˬ hui hta‸ fawˉ mehˍ ve kʼo, awˬ kaˍ awˬ nu teˇ venˇ lo hpaw-e loˬ. Ngaˬ nawˬ hui hta‸ awˬ tehˬ awˬ na kʼoˆ laˇ ve, Iˉsaˍreˍlaˆ venˇ teˇ hpaˍ lo nawˬ hui ca toˇ maˇ zuhˇ sheˍ htaˇ ka‸, chaw yaˇ ve Yaˇ hpu gaˬ la tuˬ yoˬ.
24Awˬ la‸ gʼawˇ lehˬ, yawˇ ve saˍ la‸ a‸ kehˉ uiˍ ve maˇ heˆ. Awˬ ceˬ htawˇ, yawˇ ve awˬ shehˍ hpaˇ a‸ kehˉ uiˍ ve maˇ heˆ. 25Awˬ la‸ gʼawˇ lehˬ, yawˇ ve saˍ la‸ hkʼa shuˍ shuˍ hpeh‸ leh, awˬ ceˬ htawˇ yawˇ ve awˬ shehˍ hpaˇ hkʼa shuˍ shuˍ hpeh‸ ve kʼo, law‸ ve yoˬ. Yawˇ hui lehˬ, yehˬ shehˍ hpaˇ hta‸ Beˍsaˍbuˇlaˆ teh‸ kʼoˆ ve kʼo, yawˇ ve yehˬ yaˇ kʼa yaˇ hui hta‸ chi a‸ kehˉ leuˉ leh kʼoˆ tuˬ yoˬ, maˇ heˆ laˇ.
A shu hta‸ kawˆ cawˇ ve awˬ lawn
26Hkʼe te leh, yawˇ hui hta‸ taˇ kawˆ. Awˬ lawn kʼo, hkʼa beh taˍ ve awˬ ceuˬ hkʼa peu-eˬ maˇ hpeu‸ tawˆ la tuˬ ve teˇ ceuˬ ka‸ maˇ cawˬ. Hkʼa faˉ taˍ ve awˬ ceuˬ hkʼa peu-eˬ htawˇ, maˇ shiˍ la tuˬ ve teˇ ceuˬ ka‸ maˇ cawˬ. 27Ngaˬ nawˬ hui hta‸ naˆ ho‸ kuiˬ lo hto laˇ ve awˬ ceuˬ teˇ hpaˍ, awˬ gʼeuˆ ba kuiˬ lo kʼaw‸ hto piˇ-oˆ. Nawˬ hui hta‸ a yehˉ yehˉ hto laˇ ve awˬ ceuˬ teˇ hpaˍ, yehˬ awˬ hkʼoˆ lo taˆ-e leh kuˬ maˍ piˇ-oˆ. 28Awˬ to hta‸ tiˇ pehˍ gʼa ve htawˇ, co ha hta‸ tiˇ pehˍ maˇ gʼa ve pa taw, chaw yaˇ hui hta‸ taˇ kawˆ. Ya‸ hkʼaˇ, co ha hta‸ ka‸ awˬ to hta‸ ka‸ moˬ naˆ ho‸ awˬ hkʼaw lo te luˬ gʼa shehˍ hpaˇ hta‸ kawˆ loˬ. 29Jaˍ meuˇ nyiˇ hkeh hta‸ peh‸ shanˍ teˇ peh‸ hawˇ ve maˇ heˆ laˇ. Nawˬ hui ve Awˬ pa a loˍ maˇ cawˬ kʼo, teˇ hkeh ka‸ miˬguiˬ hkʼoˆ lo maˇ ce. 30Nawˬ hui ve uˉ hkeh mvuh hkʼa peu-eˬ hta‸ htawˇ gʼaw nyi taˍ peuˬ. 31Hkʼe te leh, taˇ kawˆ. Jaˍ meuˇ teˇ hpaˍ a‸ kehˉ nawˬ hui awˬ hpfuhˇ hkʼaˆ jaˇ ve yoˬ.
32Hkʼaˬ ve chaw teˇ gʼaˇ maˇ kʼoˆ, chaw yaˇ mehˆ gʼuˇ suhˍ ngaˬ hta‸ hkanˍ yuˬ ve kʼo, mvuhˇ naw ma hkʼoˆ lo chehˇ ve ngaˬ ve Awˬ pa mehˆ gʼuˇ suhˍ ngaˬ htawˇ yawˇ hta‸ hkanˍ yuˬ tuˬ yoˬ. 33Hkʼaˬ ve chaw teˇ gʼaˇ maˇ kʼoˆ, chaw yaˇ mehˆ gʼuˇ suhˍ ngaˬ hta‸ chiˇ baˬ ve kʼo, mvuhˇ naw ma hkʼoˆ lo chehˇ ve ngaˬ ve Awˬ pa mehˆ gʼuˇ suhˍ ngaˬ htawˇ yawˇ hta‸ chiˇ baˬ tuˬ yoˬ.
Cawˇ da‸ hui da‸ te tuˬ awˬ pon laˬ ve maˇ heˆ
34Miˬguiˬ hkʼoˆ lo cawˇ da‸ hui da‸ te tuˬ awˬ pon ngaˬ laˬ ve teh‸ taˇ dawˇ. Cawˇ da‸ hui da‸ te tuˬ awˬ pon ngaˬ laˬ ve maˇ heˆ. Aˉ htaw hta‸ ngaˬ yuˬ laˬ ve yoˬ. 35Awˬ lawn kʼo, yaˇ paˍ leh yawˇ ve awˬ pa, yaˇ miˇ leh yawˇ ve awˬ e, awˬ hkuiˇ ma leh yawˇ ve awˬ pi, teˇ gʼaˇ leh teˇ gʼaˇ maˇ cawˇ maˇ hawˍ da‸ tuˬ ngaˬ laˬ ve yoˬ. 36A shu yawˇ ve canˇ paˍ lehˬ, a shu yawˇ ve yehˬ yaˇ kʼa yaˇ teˇ hpaˍ hpeh‸ tuˬ yoˬ. #Mlk 7:6
37Ngaˬ hta‸ ha‸ ve a‸ kehˉ awˬ pa awˬ e hta‸ ha‸ ve chaw teˇ gʼaˇ lehˬ, ngaˬ hta‸ maˇ keunˍ. Ngaˬ hta‸ ha‸ ve a‸ kehˉ yaˇ paˍ yaˇ miˇ hta‸ ha‸ ve chaw teˇ gʼaˇ lehˬ, ngaˬ hta‸ maˇ keunˍ. 38A shu yawˇ ve la‸ ka hta‸ taˆ leh ngaˬ hkʼaˇ suh maˇ laˬ ve chaw teˇ gʼaˇ lehˬ, ngaˬ hta‸ maˇ keunˍ. 39A shu yawˇ ve a sha‸ hta‸ gʼa ve chaw teˇ gʼaˇ lehˬ, a sha‸ shonˇ tuˬ yoˬ. Ngaˬ awˬ pon a shu yawˇ ve a sha‸ hta‸ shonˇ ve chaw teˇ gʼaˇ lehˬ, a sha‸ hta‸ kʼaw‸ gʼa tuˬ yoˬ.
Awˬ bon gʼa ve
40Nawˬ hui hta‸ ha‸ yuˬ ve chaw lehˬ, ngaˬ hta‸ ha‸ yuˬ ve yoˬ. Peuˬ leh, ngaˬ hta‸ ha‸ yuˬ ve chaw lehˬ, ngaˬ hta‸ peu laˇ shehˍ hpaˇ hta‸ ha‸ yuˬ ve yoˬ. 41Chaw teˇ gʼaˇ Gʼuiˬsha ve tcuh kaˍ paˍ hpeh‸ ve hta‸ pa taw, shu yawˇ hta‸ ha‸ yuˬ ve kʼo, ha‸ yuˬ shehˍ hpaˇ htawˇ tcuh kaˍ paˍ hkʼa shuˍ shuˍ awˬ bon gʼa tuˬ yoˬ. Chaw teˇ gʼaˇ hteˇ ve cawˇ ve chaw hpeh‸ ve hta‸ pa taw shu yawˇ hta‸ ha‸ yuˬ ve kʼo, ha‸ yuˬ shehˍ hpaˇ hteˇ ve cawˇ ve chaw teˇ gʼaˇ hkʼa shuˍ shuˍ awˬ bon gʼa tuˬ yoˬ. 42I ve chaw chi teˇ hpaˍ lehˬ, awˬ la‸ gʼawˇ hpeh‸ ve hta‸ pa taw, hkʼaˬ ve chaw teˇ gʼaˇ htawˇ maˇ kʼoˆ, yawˇ hui teˇ gʼaˇ gʼaˇ hta‸ iˉ kaˆ gawˬ teˇ kawˆ taw piˇ ve kʼo, taw piˇ shehˍ hpaˇ lehˬ, awˬ bon a ciˉ ka‸ maˇ mehˉ taˬ teh‸ ngaˬ nawˬ hui hta‸ awˬ tehˬ awˬ na kʼoˆ laˇ ve yoˬ teh‸, Yeˍsuˆ kʼoˆ ve.
ที่ได้เลือกล่าสุด:
Ma‸htehˍ li‸ 10: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.