यूहन्‍ना 2

गलील रै काना में पैलौ चमतकार

1तीजै दिन गलील नगर रै काना गांव मांय किणी रौ ब्याव हो। उण ब्याव मांय यीसु री मां ई आयोड़ी ही। 2यीसु अर वांरा चेला ई इण ब्याव मांय निंवतयोड़ा हा। 3ब्याव में जद अंगूर रौ रस निटगौ, तो यीसु री मां उठै आई अर उणनै कयौ, “आंरै खनै तो अंगूर रस निटगौ है।”

4यीसु कयौ, “हे माताजी, म्हनै कीं करणै रौ क्यूं की? हाल तांई म्हारी वो घड़ी आई कोनीं है।”

5पण यीसु री मां नौकरो नै कयौ, “ओ थांनै कैवै ज्यूं इज करजौ।”

6उठै घर रै मांय भाटा री मोटी-मोटी छह मटकियो मेलयोड़ी ही। यहूदी लोग ऐड़ी मटकियो ब्याव अर धारमिक तैंवार मांय सुद्ध करण रै कांम लेवता हा। हरैक मटकी मांय लगैटगै दो या तीन मण पांणी भरीज जावतौ। 7यीसु नौकरो नै कयौ, “मटकियो नै पांणी ऊं हेंठी भर दो।” नौकरो नै मटकियो मूंडा तांई हेंठी भर दी। 8पछै यीसु कयौ, “अबै मटकियो ऊं थोड़ोक पांणी काढ़नै खाणै रै मुखये नै देयनै आओ।” वो देन आया।

9खाणै रै मुखये उण पांणी नै चाखियौ जिकौ अंगूर रस बण गियौ हो। खाणै रै मुखये नै ठाह कोनीं पड़ियौ ओ कठै ऊं आयौ है। (पण जिकौ नौकरो नै मटकियो पांणी ऊं भरी ही, वे सैंग जांणता हा।) पछै खाणै रै मुखये बींद नै बुलाय नै उणनै कयौ, 10“हरैक मिनख आपरै मेमाणो नै सैंगा ऊं पैली बड़िया अंगूर रस परौसे अर धापिया पछै फोरौ, पण थै इतौ बड़िया अंगूर रस हाल तांई कठै रुखाळ नै राखियौ हो।”

11गलील रै काना गांव मांय, यीसु रौ ओ पैलौ परचौ हो। इण परचां ऊं यीसु आपरी सरग री महिमा दरसाई अर चेलौ उण माथै विसवास करयौ।

12 # मत 4:13 इण पछै यीसु आपरी मां, भाई अर चेलौ रै साथै कफरनहूंम गिया अर कीं दिन उठैज रिया।

मिंदर ऊं वैपारियो नै निकाळिया जावणौ

(मती 21:12,13; मरकुस 11:15–17; लूका 19:45,46)

13यहूदियो रौ फसह तैंवार नैड़ौ हो इण खातर यीसु यरुसलेम गियौ। 14वे मिंदर रै आंगणै मांय वैपारियो नै बळद, घेटा अर कबूड़ौ नै बैचता देखिया, अर वे सराफां नै ई विदेसी रूपिया बदळण सारू बैठा देखिया। 15यीसु रस्सियो रौ कोड़ो बणाय, नै बळद घेटा अर सगळां नै मिंदर रै आंगणै ऊं बारै निकाळिया। अर सराफां रा रूपिया जमीं माथै फेंक दिया, अर उणौ रै पीढ़ो नै ऊंधा कर दीना। 16पछै वे कबूड़ा बैचण वाळा नै कयौ, “इणानै अठै ऊं ले जाओ। म्हारै पिता रै घर नै वैपारी रौ घर मती बणावौ।”

17तद उणरै चेलौ नै याद आई की लिख्योड़ौ है, “परमेसर रै घर री लग्‍नि म्हनै खा जावैला।”

18यहूदी इण कारण यीसु नै पूछयौ, “थूं जिकौ ओ करै है तो म्हौ नै कुण सो चमतकार दिखावै है?”

19 # मत 26:61; 27:40; मरकु 14:58; 15:29 यीसु पाछौ जबाब दियौ, “म्हैं थांरै खातर ओ चमतकार करूंला के इण मिंदर नै तोड़ दो, म्हैं तीन दिन मांय इणनै पाछौ बणाय दूंला।”

20यहूदी अचूम्बो करता थका कयौ, “इण मिंदर नै बणाणै में छींयाळीस बरस लाग्या, अर कांई थूं इणनै तीन दिन मांय पाछौ बणाय सकै?” 21पण यीसु आपरै सरीर रूपी मिंदर रै वास्तै कयौ हो। 22चेलौ नै आ बात उण वेळा याद आई, जद यीसु मरयोड़ौ मांय ऊं जीवता व्‍हैया। इण पछै चेला पवितर सास्तर अर उण बातां माथै विसवास करयौ जिकौ यीसु कही ही।

यीसु मिनखौ रै मन नै जांणतौ हो

23जिण वेळा यीसु फसह रै तैंवार में यरुसलेम हा, घणाकर मिनखां यीसु रा परचां देख नै उण माथै विसवास करयौ। 24पण यीसु मिनखौ माथै भरोसौ कोनीं करयौ, क्यूंकै वे मिनखौ रौ सभाव जांणतौ हो। 25अर उणनै जरुत कोनीं ही, की मिनखौ रै बारै में कोई गवाई दे, क्यूंकै वो आप जांणतौ हो के मिनखौ रै मन मांय कीं है।

ที่ได้เลือกล่าสุด:

यूहन्‍ना 2: RWR

เน้นข้อความ

คัดลอก

เปรียบเทียบ

แบ่งปัน