ข้อพระคัมภีร์ยอดนิยมจาก Roˉma‸ li‸ 12

แบ่งปัน

Chi miˬguiˬ yaˇ ve awˬ liˇ awˬ hkʼaˇ teˇ hpaˍ awˬ hkʼaˇ suh taˇ kʼai. Gʼuiˬsha ve da‸ jaˇ ve, nyi ma cawˇ jaˇ ve leh biˇ jaˇ ve a loˍ hta‸ nawˬ hui shiˍ leh fuiˍ da‸ gʼa tuˬ, nyi ma awˬ suhˉ kʼaw‸ pa leh, chaw awˬ suhˉ hpeh‸ la piˇ-oˆ.

Awˬ viˉ awˬ nyi teˇ hpaˍ-oˬ, Gʼuiˬsha ha kʼaˉ ve awˬ bon teˇ hpaˍ hta‸ pa taw, ngaˬ naw hui hta‸ chi hkʼe lawˬ hkawˉ ve yoˬ. Nawˬ hui ve awˬ to lehˬ, te‸ chehˇ ve, da‸ kehˬ ve leh, Gʼuiˬsha nyi ma cawˇ ve tanˇ tuˬ, yawˇ hta‸ chiˇ a‸ piˇ-oˆ. Chi lehˬ, nawˬ hui te keunˍ ve oˉ kʼoˍ pui ve awˬ liˇ teˇ ceuˬ hpeh‸ ve yoˬ.

Dawˇ law ve awˬ hkʼaw lo ha lehˬ chehˇ-oˆ. Tu‸ ve hkanˍ ve hta‸ gʼa hkanˍ ve teˇ yanˇ, yeunˇ hkanˍ chehˇ-oˆ. Hkʼaˬ htaˆ ka‸ bon lawˬ tcuhˉ taˍ-o‸.

Haiˬ ve teˇ ceuˬ nawˬ hui hta‸ taˇ gʼaˇ piˇ lawˬ. Da‸ ve hta‸ cuˇ leh haiˬ ve hta‸ gʼaˇ piˇ lawˬ-o‸.

Awˬ viˉ awˬ nyi ha‸ da‸ ve hkʼe teˇ gʼaˇ leh teˇ gʼaˇ ha‸ da‸-o‸. A shu yawˇ awˬ to hta‸ taˇ taˍ uiˍ. Ya‸ hkʼaˇ shu hta‸ taˍ uiˍ piˇ-oˆ.

Nawˬ hui ha‸ ve lehˬ, awˬ tehˬ awˬ na ha‸ ve teˇ ceuˬ hpeh‸ piˇ-oˆ. Haiˬ ve awˬ ceuˬ hta‸ cha‸ loˬ. Da‸ ve teˇ ceuˬ hta‸ vawˆ taˍ-o‸.

Te hpeh‸ ve kʼo, nawˬ hui puiˉ ve hpeh‸ ve hkʼe chaw hkʼa peu-eˬ ve hta‸ cawˇ da‸ hui da‸ te chehˇ-oˆ.

Ha‸ ve chaw teˇ hpaˍ-oˬ, shu nawˬ hui hta‸ te ya‸ laˇ ve kʼo, nawˬ hui hkʼaˇ nawˬ hui taˇ kʼaw‸ te hkʼaw‸ piˇ. Gʼuiˬsha nyi ma zuhˆ leh te hkʼaw‸ tuˬ awˬ pon teh taˍ piˇ-oˆ. Li‸ hpu hkʼaw bvuh‸ taˍ ve hkʼe, Jawˇmawˇ Gʼuiˬsha kʼoˆ ve, Kʼaw‸ te hkʼaw‸ tuˬ ve teˇ ceuˬ lehˬ, ngaˬ ve kanˉ yoˬ. Ngaˬ kʼaw‸ te hkʼaw‸ piˇ tuˬ yoˬ teh‸ bvuh‸ taˍ ve yoˬ.

Coˇ caˇ ve awˬ hkʼaw lo awˬ gʼaˇ taˇ nuˇ piˇ. Nyi ma pfuhˇ leh Jawˇmawˇ Gʼuiˬsha awˬ pon kanˉ gʼaˇ hte‸ te-o.

Ngaˬ hta‸ pe‸ laˇ ve awˬ bon hta‸ pa taw, nawˬ hui awˬ hkʼaw lo chehˇ ve chaw teˇ gʼaˇ le le hta‸ ngaˬ chi hkʼe kʼoˆ laˇ ve yoˬ. A shu yawˇ awˬ to awˬ lawn dawˇ keunˍ dawˇ cawˇ ve a‸ kehˉ leuˉ leh taˇ dawˇ. Gʼuiˬ sha lehˬ, teˇ gʼaˇ peuˬ teˇ gʼaˇ hta‸ yonˍ ve teˇ ceuˬ pehˬ piˇ taˍ ve hkʼa shuˍ shuˍ, dawˇ keunˍ dawˇ cawˇ ve hkʼe ceh, a shu yawˇ awˬ to awˬ lawn dawˇ nyi-o.

Shu haiˬ ve te laˇ htawˇ, teˇ gʼaˇ hta‸ ka‸ awˬ haiˬ taˇ kʼaw‸ te hkʼaw‸ piˇ. Chaw hkʼa peu-eˬ mehˆ gʼuˇ suhˍ da‸ ve cawˇ ve hta‸ tiˉ te tuˬ dawˇ nyi taˍ-o‸.

Teˇ gʼaˇ leh teˇ gʼaˇ nyi ma htaˇ da‸ hawˍ da‸ cawˬ piˇ-oˆ. Uiˍ gaˇ mvuh gaˇ ve awˬ lawn teˇ hpaˍ hta‸ taˇ dawˇ. Awˬ me‸ awˬ hponˇ maˇ cawˬ ve chaw teˇ hpaˍ geh awˬ chawˇ te-o. A shu yawˇ awˬ to hta‸ cuˇ yiˍ cawˬ ve teh‸ taˇ dawˇ.

Hkʼe te leh nawˬ ve canˇ paˍ awˍ meu‸ ve kʼo, yawˇ hta‸ caˍ piˇ-oˆ. Iˉ kaˆ shiˉ ve kʼo, taw piˇ-oˆ. Chi hkʼe te ve kʼo, yawˇ ya‸ taw jaˇ leh mehˆ hpfuhˇ haw tuˬ yoˬ.

Nawˬ hui hta‸ fawˉ mehˍ laˇ ve chaw hui hta‸ na‸ piˇ-oˆ. Yawˇ hui hta‸ taˇ hkeu piˇ. Na‸ piˇ ve ceh tiˉ te-o. Ha lehˬ ve chaw hui geh teˇ geh ha lehˬ-o‸. Hawˬ ve chaw hui geh teˇ geh hawˬ-o‸.

Hkri‸ yaˇ teˇ hpaˍ loˍ ve hkʼe pehˬ piˇ ga piˇ-oˆ. Hkehˉ chaw teˇ hpaˍ hta‸ hkʼa deh‸ nyi ha‸ shaˉ-oˆ.

Awˬ lawn kʼo, awˬ to teˇ to tiˉ awˬ hkʼaw lo, awˬ hkʼeun maˇ maˇ cawˬ ve yoˬ. Awˬ hkʼeun oˇ ve teˇ hpaˍ lehˬ, kanˉ te ve maˇ shuˍ da‸. Chi hkʼa shuˍ shuˍ, ngaˬ hui chaw maˇ ve htawˇ, Hkri‸ awˬ hkʼaw lo awˬ to teˇ to tiˉ hpeh‸ leh, ngaˬ hui teˇ gʼaˇ leh teˇ gʼaˇ caˉ da‸ taˍ ve awˬ hkʼeun teˇ hpaˍ hpeh‸ ve yoˬ.