خُروج 5
5
مُوسَى و هَارُون مشوا للملك
1وَ بَعَدْ دَا، مُوسَى وَ هَارُونْ مَشَوْا لِفِرْعَوْن مَلِكْ مَصِرْ وَ قَالَوْا لَيَّهْ: «دَاهُو اللّٰهْ إِلٰـهْ بَنِي إِسْرَائِيلْ قَالْ: ‹خَلِّي شَعَبِي يَمُرْقُوا لِيِعَيُّدُوا بِأُسْمِي فِي الصَّحَرَاء.›» 2وَ الْمَلِكْ قَالْ: «اللّٰهْ هُو يَاتُو الْأَنَا نَسْمَعْ كَلَامَهْ وَ نِخَلِّي بَنِي إِسْرَائِيلْ يَمُرْقُوا؟ أَنَا مَا نَعَرِفْ اللّٰهْ. وَ مَا نِخَلِّيهُمْ يَمُرْقُوا.»
3وَ مُوسَى وَ هَارُونْ قَالَوْا لَيَّهْ: «رَبّ الْعِبْرَانِيِّينْ بَانْ لَيْنَا. مِنْ إِذْنَكْ، خَلِّينَا نَمْشُوا مَسَافَةْ تَلَاتَةْ يَوْم فِي الصَّحَرَاء لِنِقَدُّمُوا ضَحَايَا لِلّٰهْ إِلٰـهْنَا. كَنْ مَا سَوَّيْنَاهْ، هُو يِعَاقِبْنَا بِوَبَاءْ أَوْ بِحَرِبْ.» 4وَ مَلِكْ مَصِرْ قَالْ لَيْهُمْ: «يَا مُوسَى وَ هَارُونْ، مَالَا تَدْحَرَوْا الشَّعَبْ مِنْ خِدْمِتْهُمْ؟ يَلَّا! أَمْشُوا لِخِدْمِتْكُو هِنْت التَّعَبْ.» 5وَ قَالْ بَتَّانْ: «هَسَّعْ، بَنِي إِسْرَائِيلْ بِقَوْا كَتِيرِينْ فِي الْبَلَدْ وَ كِكَّيْف إِنْتُو تِدَوْرُوا تَدْحَرَوْهُمْ مِنْ خِدْمِتْهُمْ؟»
فِرْعَوْن زاد خِدْمة بني إسرائيل
6وَ فِي نَفْس الْيَوْم، فِرْعَوْن مَلِكْ مَصِرْ أَمَرَاهُمْ لِلْمُرَاقِبِينْ الْمَصْرِيِّينْ وَ لِلْمُكَلَّفِينْ مِنْ بَنِي إِسْرَائِيلْ بِالْخِدْمَةْ دِي. وَ قَالْ لَيْهُمْ: 7«بَتَّانْ مَا تَنْطُوا لِلشَّعَبْ دَا قَشّ لِيِسَلُّلُوا بَيَّهْ دِرِنْقَيْل مِثِلْ أَوَّلْ. خَلُّوهُمْ هُمَّنْ بَسْ يَمْشُوا يِفَتُّشُوا قَشّ. 8وَ قُولُوا لَيْهُمْ يِسَلُّلُوا نَفْس الْعَدَدْ هَنَا الدِّرِنْقَيْل مِثِلْ أَوَّلْ، مَا يَنْقُصُوهْ. هُمَّنْ عَاطِلِينْ وَ أَشَانْ دَا بَسْ، قَاعِدِينْ يَشْكُوا وَ يُقُولُوا: ‹خَلِّي نَمْشُوا نِقَدُّمُوا ضَحَايَا لِرَبِّنَا.› 9خَلِّي نِزِيدُوا لَيْهُمْ خِدْمَةْ تَقِيلَةْ أَشَانْ مَا يُخُطُّوا بَالْهُمْ فِي الْكَلَامْ الْكِدِبْ دَا.»
10وَ خَلَاصْ، الْمُرَاقِبِينْ وَ الْمُكَلَّفِينْ بِالْخِدْمَةْ دِي مَشَوْا قَالَوْا لِبَنِي إِسْرَائِيلْ: «الْمَلِكْ قَالْ كَيْ: ‹بَتَّانْ مَا نَنْطُوكُو قَشّ. 11إِنْتُو ذَاتْكُو بَسْ أَمْشُوا فَتُّشُوا قَشّ فِي أَيِّ بَكَانْ التَّلْقَوْه. وَ لَاكِنْ الْعَدَدْ الْقَطَعْنَاهْ لَيْكُو دَا مَا يَنْقُصْ.›»
12خَلَاصْ، الشَّعَبْ شَتَّوْا فِي كُلَّ بَلَدْ مَصِرْ لِيُخُمُّوا التِّبِنْ فِي بَدَلْ الْقَشّ. 13وَ الْمُرَاقِبِينْ قَاعِدِينْ يَعَصُرُوهُمْ وَ يُقُولُوا: «سَوُّوا دَايْماً الْعَدَدْ الْقَطَعْنَاهْ لَيْكُو مِثِلْ أَوَّلْ وَكِتْ أَنِحْنَ قَاعِدِينْ نِجِيبُوا لَيْكُو قَشّ.» 14خَلَاصْ، مُرَاقِبِينْ فِرْعَوْن فَرَشَوْهُمْ لِلْمُكَلَّفِينْ مِنْ بَنِي إِسْرَائِيلْ الْهُمَّنْ بَسْ كَلَّفَوْهُمْ. وَ قَالَوْا لَيْهُمْ: «مَالَا فِي الْأَيَّامْ دَوْل مَا سَلَّلْتُوا نَفْس الْعَدَدْ هَنَا الدِّرِنْقَيْل الْأَوَّلْ أَمَرْنَاكُو بَيَّهْ؟»
15وَ بَيْدَا، الْمُكَلَّفِينْ مِنْ بَنِي إِسْرَائِيلْ مَشَوْا شَكَوْا لِلْمَلِكْ وَ قَالَوْا: «يَا سَيِّدْنَا، مَالَا تِتَعِّبْ عَبِيدَكْ مِثِلْ دَا؟ 16مَا يَنْطُونَا قَشّ وَ لَاكِنْ يُقُولُوا لَيْنَا نِسَلُّلُوا دِرِنْقَيْل. وَ دَاهُو قَاعِدِينْ يَفُرْشُونَا أَنِحْنَ عَبِيدَكْ. وَ لَاكِنْ نَاسَكْ بَسْ خَاطِيِّينْ.» 17وَ الْمَلِكْ قَالْ: «إِنْتُو نَاسْ عَاطِلِينْ! أَيْوَى، إِنْتُو عَاطِلِينْ! أَشَانْ دَا بَسْ تُقُولُوا: ‹خَلِّينَا نَمْشُوا نِقَدُّمُوا ضَحَايَا لِلّٰهْ.› 18هَسَّعْ دَا، يَلَّا! أَمْشُوا أَخْدُمُوا! مَا نَنْطُوكُو قَشّ وَ تِسَلُّلُوا نَفْس الْعَدَدْ هَنَا الدِّرِنْقَيْل.»
19وَ الْمُكَلَّفِينْ مِنْ بَنِي إِسْرَائِيلْ شَافَوْا الْحَالَةْ بِقَتْ لَيْهُمْ قَاسِيَةْ أَشَانْ قَالَوْا لَيْهُمْ يِسَلُّلُوا نَفْس الْعَدَدْ هَنَا الدِّرِنْقَيْل الْأَوَّلْ قَطَعَوْه لَيْهُمْ. 20وَ وَكِتْ هُمَّنْ مَارْقِينْ مِنْ بَكَانْ الْمَلِكْ، لِقَوْا مُوسَى وَ هَارُونْ قَاعِدِينْ يَرْجَوْهُمْ. 21وَ الْمُكَلَّفِينْ مِنْ بَنِي إِسْرَائِيلْ قَالَوْا لَيْهُمْ: «خَلِّي اللّٰهْ يِشِيفْ الشَّيّءْ الْإِنْتُو سَوَّيْتُوهْ دَا وَ يِعَاقِبْكُو! فِي شَانْكُو إِنْتُو بَسْ الْمَلِكْ مَعَ خَدَّامِينَهْ كِرْهَوْنَا مِثِلْ الْكَفَنْ. وَ دَا، مِثِلْ إِنْتُو أَنْطَيْتُوهُمْ سَيْف لِيِكَتُّلُونَا.»
22وَ بَعَدْ دَا، مُوسَى وَجَّهْ لِلّٰهْ وَ قَالْ لَيَّهْ: «يَا رَبّ، مَالَا سَوَّيْت الْفَسَالَةْ لِلشَّعَبْ دَا؟ وَ مَالَا رَسَّلْتِنِي؟ 23مِنْ يَوْم أَنَا مَشَيْت لِلْمَلِكْ وَ حَجَّيْت لَيَّهْ بِأُسْمَكْ، الْمَلِكْ قَاعِدْ يِتَعِّبْ شَعَبَكْ وَ إِنْتَ أَبَداً مَا نَجَّيْتهُمْ!»
Айни замон обунашуда:
خُروج 5: ع.د.ت19
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019