Башталганы 5
5
Адамныҥ калдыктары
1Бу Адам ла оныҥ калдыктары керегинде куучын.
Кудай кижини јайаарда, оны Бойына тӱҥей эдип јайаган. 2Ол эр кижини ле ӱй кижини јайап, олорды алкап салган. Јайаган кӱнде олорды «кижи» деп адаган.
3Адам јӱс одус јаштуда бойына кеберлеш уулду болуп, уулын Шет деп адаган. 4Шет чыккан кийнинде, Адам база сегис јӱс јыл јӱрген, ӧскӧ дӧ кыстарлу ла уулдарлу болгон. 5Ол тогус јӱс одус јаш јажап божогон.
6Шет јӱс беш јаштуда Энош деп уулду болгон. 7Энош чыккан кийнинде, Шет база сегис јӱс јети јыл јӱрген, ӧскӧ дӧ кыстарлу ла уулдарлу болгон. 8Шет тогус јӱс он эки јаш јажап, јада калган.
9Энош тогузон јаштуда Кенан деп уулду болгон. 10Кенан чыккан кийнинде, Энош база сегис јӱс он беш јыл јӱрген, ӧскӧ дӧ кыстарлу ла уулдарлу болгон. 11Энош тогус јӱс беш јаш јажап, јада калган.
12Кенан јетен јаштуда Махалалэл деп уулду болгон. 13Махалалэл чыккан кийнинде, Кенан база сегис јӱс тӧртӧн јыл јӱрген, ӧскӧ дӧ кыстарлу ла уулдарлу болгон. 14Кенан тогус јӱс он јаш јажап, јада калган.
15Махалалэл алтан беш јаштуда Иаред деп уулду болгон. 16Иаред чыккан кийнинде, Махалалэл база сегис јӱс одус јыл јӱрген, ӧскӧ дӧ кыстарлу ла уулдарлу болгон. 17Махалалэл сегис јӱс тогузон беш јаш јажап, јада калган.
18Иаред јӱс алтан эки јаштуда Енох деп уулду болгон. 19Енох чыккан кийнинде, Иаред база сегис јӱс јыл јӱрген, ӧскӧ дӧ кыстарлу ла уулдарлу болгон. 20Иаред тогус јӱс алтан эки јаш јажап, јада калган.
21Енох алтан беш јаштуда Метушелах деп уулду болгон. 22Метушелах чыккан кийнинде, Енох Кудайдыҥ јолыла јӱрӱп, база ӱч јӱс јыл јӱрген, ӧскӧ дӧ уулдарлу ла кыстарлу болгон. 23Енох ӱч јӱс алтан беш јаш јажаган. 24Ол Кудайдыҥ јолыла јӱрген. Оноҥ Енох јок болуп калган, нениҥ учун дезе Кудай оны Бойына апарган.
25Метушелах јӱс сегизен јети јаштуда Ламех деп уулду болгон. 26Ламех чыккан кийнинде, Метушелах база јети јӱс сегизен эки јыл јӱрген, ӧскӧ дӧ уулдарлу ла кыстарлу болгон. 27Метушелах тогус јӱс алтан тогус јаш јажап, јада калган.
28Ламех јӱс сегизен эки јаштуда уулду болгон. 29Ламех уулын Ной деп адап: «Кайракан каргап салган јерде бистиҥ эткен уур-кӱч иш-тожыстаҥ бу уул биске амыр, токунал экелер», – деген. (Ной – амыр-энчӱ дегени). 30Ной чыккан кийнинде, Ламех база беш јӱс тогузон беш јыл јӱрген, ӧскӧ дӧ уулдарлу ла кыстарлу болгон. 31Ламех јети јӱс јетен јети јаш јажап, јада калган.
32Ной беш јӱс јаштуда Сим, Хам ла Яфет деп уулдарлу болгон.
Айни замон обунашуда:
Башталганы 5: АЛТ
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Российское Библейское Общество, 2025
© Институт перевода Библии, 2025