Bɔ̀werà 14
14
Pooli àá Baranabaasi ɛ́ van wi Yikoniɔmu lóo hũn
1Ɛ́ Pooli àá Baranabaasi ɛ́ van dɛ̃un Yikoniɔmu lóo, ɛ́ ɓɛ́ sĩ̀n van zɔn ɓɛ̀ Zuifuɓɛ ńkóoɓánlɔ̀n zũnù kɛ̀a bòo lɛ ɛ́ ɓɛ́ dàa wóò wé hɔ́. Ɛ́ ɓɛ́ zɔn bie Dɔfĩn bienù yán fúu ɛ́ ɓɛ́ Zuifuɓɛ bìkuì àá ɓɛ́lɛ yí ɓɛ́ Zuifuɓɛ ɛ́ dũmuasɛ̃̀. 2Kɛ́ ɓɛ́ Zuifuɓɛ dɔ̀ ɛ́ pe pɛ̃́ ɛ́ yí dɛsĩ̀ wɛ̀; ɛ́ ɓɛ́ khie sùkúrɛ ɓɛ̀pe lɛ yí ɓɛ́ Zuifuɓɛ dɔ̀ ɛ́ ɓɛ́ wo ɛ́ hɔ̀ bɔ̀koohɔ́ ɛ̀ cɛ̀ àá ɓɛ́ ńdɛsĩ̀riè. 3Kɛ́ hɔ́pe sí míkùi hũn, kɛ́ Pooli àá Baranabaasi ɛ́ pɛ́wi kɛsí míɛ Yikoniɔmu hũn. Ɓɛ̀ hṹn Dɔfĩn bienù ɛ̀ bie kɛ́ ɓɛ́ fɔhĩ́ɛ ɛ́ tɛ́rɛ, ɛ̀ ɓɛ̀ bɔ̀ ɓɛ́ tĩɛ̀ Ɲunsɔ lɔ̀n. Ɛ́ Ɲunsɔ hṹn lɛ́ ɛ́ ɓɛ́ ɛ́ hɔ̀ yéréké bòo àá hɔ́ bɔ̀bɛ̃hɛ̃ ɛ̀ wé ɛ́ dàa ɛ́ zɛ̃́ní kɛ́ hɔ́ bòo lɛ ɛ́ ɓɛ́ ɛ́ bie ɔpe Ɲunsɔ hìi bòo hũn ɛ́ iè bòo lɛ ɛ́ bɔn. 4Ɛ́ ɓɛ́ lóo nìɛ ɛ́ wo sankɛa: ɓɛ̀dɔ̀ ɛ́ tɛ̀ ɓɛ̀ Zuifuɓɛ bòo, ɛ̀ ɓɛ̀dɔ̀ ɛ́ ɓiɛ̀ tɛ̀ à Yiezu tɔnkɛriè bòo. 5Ɛ́ ɓɛ́ Zuifuɓɛ àá ɓɛ́lɛ ɛ́ yí ɓɛ́ Zuifuɓɛ àá ɓɛ́ hándíe ɛ́ hṹn ɓɛ́te ɛ̀ sɛ́sɛ́kɛ ɛ́ nɛ ɓɛ ɛ̀ ɲínkɛ Pooli àá ɔ́ Baranabaasi, ɛ̀ ɓɛ́ ɛ̀ taa ɓɛ ɛ̀ ɓé àá hɔ́ sɛ̃̀nlɛ̀a. 6Ɛ́ hɔ́ lɛ ɛ́ Pooli àá Baranabaasi ɛ́ dũnɛ hɔ̀, ɛ́ ɓɛ́ zɔ̀ van àá Lisitere àá Dɛrɛbu àá hɔ́ lɔ́-ɓuà dɔ̀, hɔ̀ Likaoni pɛ̃̀hɛ̃ hũn. 7Ɛ́ ɓɛ́ van ɛ̀ lè Bentĩnu ɛ̀ buie yán.
Pooli àá Baranabaasi ɛ́ van wi Lisitere lóo hũn
8Ɛ́ nùún dɔ̀ ɛ́ hàarí wi Lisitere lóo hũn ɛ́ wóò kansí fúu iè hɔ̀ lɛ ɛ́ piè zehĩ́ ɛ́ lɛ̀. À tɔn vaá-lé ɛ̀ piè zehĩ́ ɛ́ lɛ̀ á wo ɛ́ yí dàń ɛ̀ hĩ́ní vɛ ɛ́ yí mi wɛ̀. 9Á hṹn tɛ́ mí ɲɛkɛ̃̀a ɛ́ Pooli bòo lɛ á bie ɛ̀ ɲí. Ɛ́ Pooli ɛ́ mɔ̀ mí yìe fɛ́ à ǹ ɛ́ ɔ̀ húi, á mɔn kɛ́ á dàa ńdɛsĩ̀nlɔ́ lɛ dɛ̀ ɛ́ lɛ́ á ɛ́ wɛ. 10Á zɔn bie lɛ́ à ǹ à tɛn-bɛhɔ́ ɛ́ nɛ làa: «Síɛ hĩ́ní yòó dìń kɔ́ zehĩ́ lɔ̀n!» Á nùún siɛ yénkie hĩ́nà yòó dɛ̃̀ mí zehĩ́ lɔ̀n à khie ɛ́ vɛ cɔ́. 11Ɛ́ hɔ́ lɛ ɛ́ ɓɛ́ nìzã̀amáa ɛ́ mɔn hɔ̀ bòo lɛ ɛ́ Pooli ɛ́ wɔ́, ɛ́ ɓɛ́ siɛ hóoniɛ ɓɛ́ tɛmu ɓá cɛ̃̀mɛ̀nɛ́ níi hũn lɛ iè pe Likaoni níi ɛ́ nɛ làa: «dɔfĩnɓɛ dɔ̀ ɛ́ zɛ̀niɛ ɓɛ́te ɛ́ wɔ́ nìnbirìe ɛ́ ɓɛrɛ siɛ kè viì.» 12Ɛ́ ɓɛ́ khie ɛ́ Baranabaasi ve nɛ Zeesi lɛ iè peɓɛ̀ wɔ̃̀n-bɛhɔ́ yèrè, à Pooli ɛ́ ɓɛ́ nɛ Hɛrɛmɛɛsi iè hɔ̀ lɛ ápe ɛ́ temu hṹn bie. 13Peɓɛ̀ wɔ̃̀hṹ Zeesi sɔ zũnù ɛ́ hàarí van lɔ́ wi le lóo zɔǹlén. Á Zeesi khɛ̃́ndàarɔ ɛ́ van dàa nɛ̀báaɓɛ́ dɔ̀ lɛ ɛ́ ɓɛ́ ɓíɛníkɛa hɔ̀ vɛ̃̀hɛ̃ ńmuunín nin ɛ́ dàa ɓɛrɛ lèpe Zeesi zũnù híɛhɔ́. Àpe khɛ̃́ndàarɔ àá ɓɛ́ nìzã̀amáa ɛ́ den hṹn wɛ ɛ́ ɓɛ ɓé ɓɛ́ nɛ̀báaɓɛ́ sɔ ɛ̀ wé àá miyiɛ́ ɛ̀ lɛ́ Pooli àá Baranabaasi ǹ. 14Ɛ́ ɓɛ́ tɔnkɛriè Baranabaasi àá Pooli ɛ́ ɲɛ́ hɔ́ ɛ́ ɓɛ́ hɛ̀ pɛ̃́ ɛ̀ ɓɛ̀ yòó khã̀akɛa ɓɛ́ tĩ̀zɔriè, ɛ̀ ɓɛ̀ khie zɔ̀ van zɔn ɓɛ̀ nìzã̀amáa hũn kɛ́ ɓɛ̀ ɛ́ bénkɛ ɛ́ nɛ làa: 15«Kìe pàáɓɛ́, hɔ ńɓùo ɛ́ mí dàa ɛ́ hɔ̀pe bòo sí ɛ̀ wé? Ké iè nìnbirìe kɛ̀a miɛ. Lè iè Bentĩnu ɛ́ ké dàa ɛ́ dàa ɓɛrɛ mì viì; ɛ́ ké ɛ́ bie àá miɛ nɛ mi fùansí hɔ́pe mì wɛ̃̀hɛ̃ sɔ lɛ iè bòo lɛ ɲún mí ɛ̀ mì lɛ́ míte Dɔfĩn lɛ iè lè mɛkɛ̃nì ɓàasɔ ǹ, Hɔ̀pe lɛ ɛ́ te hɔ hóohũn àá lé sṹsùnù àá hɔ́ ɲun-bɛhɔ́ ɛ́ mɛ́, àá hɔ́pe bòo lɛ ɛ́ zɔn wi pehɔ̀ hũn míkùi. 16Hɔ̀ pɛ̃̀hɛ̃ lɛ khie hũn, ɛ́ Dɔfĩn ɛ́ hàarí fùɛrɛ̀sí hɔ́ dàa míkùi nìɛ ɛ́ ɓɛ́ bɔ̀ ɓɛ́ wṹuhɛ̃ lɛ ɛ́ ɓɛ́ wɛ. 17Hɔ́rɔsí ɛ̀ Hɔ̀ lò den wóò zɛ̃́ní míte fúu àá hɔ́ bɔ̀tente lɛ ɛ́ Hɔ́ wóò wé ɛ̀ lɛ́ ɓɛ́ nìnbirìe ǹ: Hɔ̀ wóò lɛ́ ɛ̀ hɔ̀ hóo ɛ̀ tè, ɛ̀ Hɔ̀ lɛ́ ɛ̀ mì yí hɔ́ bɔ̀díe ɛ̀ mìí pehɔ̀ mìirɔ́ yìi hũn, ɛ́ Hɔ́ iè pe wo ɛ́ wóò lɛ́ hɔ́ dínlɔ́ miɛ ǹ kɛ̀amu, ɛ̀ Hɔ̀ lɛ́ lé tĩwiɛ̀ miɛ ǹ.» 18Ɛ́ hɛ̀rí ɛ́ hɔ́pe biehĩ́ sí ɛ́ Pooli àá Baranabaasi ɛ́ bie míkùi, kɛ́ ɓɛ́ den pɛ́wi lɔ̀n ɛ́ bɔn cɛ̃̀un ɛ́ dàa yú ɓɛ́ nìzã̀amáa ɛ́ sun ɛ́ ɓɛ́ dàa yí yí hɔ́ miyiɛ́ ɛ̀ yɛ peɓɛ̀ bòo hũn wɛ̀.
19Ɛ́ pehɔ̀ máahṹ, ɛ̀ ɓɛ̀ Zuifuɓɛ dɔ̀ lɛ ɛ́ van lɔ́ hɔ́ Antiɔsi lɛ wi hɔ Pisidi cɛ̃̀mɛ́nɛ́ hũn, ɛ̀ ɓɛ̀dɔ̀ ɛ́ lɔ́ Yikoniɔmu ɛ́ ɓɛrɛ. Ɛ́ ɓɛ́ ɓɛrɛ yú ɓɛ́ nìzã̀amáa ɛ́ vɛ́ ɛ́ ɓɛ́ khie tɛ̀ peɓɛ̀ bòo, ɛ́ ɓɛ́ khie taa Pooli àá sɛ̃̀nlɛ̀a ɛ́ ɓɛ ɛ̀ ɓé, ɛ̀ ɓɛ̀ vɛ́sie ɔ̀ ɛ́ van lɔ́ tɛ́vieniɛ lè lóo máahṹ, ɛ̀ ɓɛ̀ tĩì ɛ̀ ɓɛ̀ nɛ a húrun. 20Ɛ́ ɓɛ́ ńdɛsĩ̀riè ɛ́ van lɔ́ kírie ɔ̀ ǹ, á siɛ hĩ́nà ɛ́ khũà yòó zɔn lè lóo hũn.
Ɛ́ hɔ́ lɛ ɛ́ hɔ́ sí van tɛ̃un, ɛ́ Pooli hĩ́nà bɔ̀ɓán àá Baranabaasi ɛ́ van Dɛrɛbu.
Pooli àá Barabaasi ɛ́ khũ̀á van Antiɔsi lɛ wi hɔ Siiri cɛ̃̀mɛ̀nɛ́ hũn
21Ɛ́ Pooli àá Baranabaasi ɛ́ buie lè Bentĩnu hɔ̀ Dɛrɛbe lóo hũn, ɛ́ nìnbirìe bìkuì ɛ́ dũmuasɛ̃̀ Yiezu ǹ. Ɛ́ pehɔ̀ máahṹ ɛ̀ ɓɛ̀ khie khũ̀a van lɔ́ hɔ́ Lisitere àá hɔ́ Yikoniɔmu àá hɔ́ Antiɔsi lɛ wi hɔ Pisidi pɛ̃̀hɛ̃ hũn. 22Ɓɛ̀ hàarí ɛ́ ɓɛ̀ ńdɛsĩ̀riè tĩɛ̀ ɛ̀ hĩ̀iníkɛ ɛ̀ ɓɛ̀ ɛ́ hɔ̀ bérɛ́ ɛ̀ lɛ́ ɓà ǹ nɛ ɓɛ cɛ ɓɛ́ kuò ɛ̀ dìń hɔ́ ńdɛsĩ̀nlɔ́ hũn, kɛ́ ɓɛ́ ɛ́ bie lɛ́ ɓà ǹ ɛ́ nɛ làa: «Ké sãawi ɛ̀ kè khíi àá lé sɛ̃́ɲíi àá mí ɲúuhɛ̃ vé ɛ̀ dàá vɛ zɔ le Dɔfĩn bɛ́záanú hũn.» 23Ɛ́ hɔ́pe lóoniɛ sɔ míkùi ńdɛsĩriè tĩ́ihṹ ɛ́ Pooli àá Baranabaasi ɛ́ lenkɛa ɓɛ̀ nìkĩ́ɛ hũn ɛ̀ ɓɛ̀ lù ɓɛ́ ɲihĩ́ɛ ɛ̀ ɓɛ̀ hɛ̃nnɛ Dɔfĩn ɛ̀ ɓɛ̀ dɔ́ ɓɛ́ hándíe sɔ Ɲunsɔ Dɔfĩn núnú hũn, Hɔ̀pe lɛ ɛ́ ɓɛ́ dũmuasɛ̃̀nin. 24Ɛ́ pehɔ̀ máahṹ, ɛ̀ ɓɛ̀ khie cánkɛa hɔ̀pe Pisidi pɛ̃̀hɛ̃ sɔ ɛ́ van dɛ̃un hɔ̀ Panfili pɛ̃̀hɛ̃. 25Ɛ́ ɓɛ́ van buie lè Dɔfĩn bienù hɔ̀ Pɛrɛzee lóo hũn, ɛ̀ ɓɛ̀ siɛ ɛ́ van hɔ̀ Atali. 26Ɛ́ ɓɛ́ lɔ́ yán ɛ̀ ɓɛ̀ khie zɔn lè ɲumu wiè dɛ̀bɛhɔ́ ɛ̀ ɓɛ̀ kã́a hɔ̀ Antiɔsi lɛ ɛ́ wi hɔ Siiri cɛ̃̀mɛ̀nɛ́ hũn, lèpe lóo sɔ lɛ hũn ɛ́ ɓɛ́ dàa zɔǹ mɔ̀ ɓɛ̀ ɛ́ dɔ́ Dɔfĩn núnú hũn nɛ Hɔ wé hìi àá ɓɛ́ hɔ̀ tɔnlɔ́ lɛ ɛ́ ɓɛ́ tɛ́ bòo hũn. 27Ɛ́ bòo lɛ ɛ́ ɓɛ́ van dɛ̃un hɔ̀ Antiɔsi, ɛ́ ɓɛ́ vɔn ɓɛ̀ ńdɛsĩ̀riè ɓɛ́kùi ɛ́ koo ɓánlɔ̀n ɛ̀ ɓɛ̀ munkɛa hɔ̀ bòo lɛ ɛ́ Dɔfĩn ɛ́ wɔ́ àá ɓɛ́ míkùi ɛ́ lɛ́ ɓà ǹ, àá bòo lɛ ɛ́ Hɔ́ dàa hɛ́rɛ hɔ̀ ńdɛsĩ̀nlɔ́ wṹn ɛ́ lɛ́ ɓɛ́ nìnbirìe lɛ ɛ́ yí ɓɛ́ Zuifuɓɛ ǹ. 28Ɛ́ Pooli àá Baranabaasi ɛ́ wo kɛsí míɛ Antiɔsi hũn àá ɓɛ́ ńdɛsĩ̀riè.
Айни замон обунашуда:
Bɔ̀werà 14: bwj
Лаҳзаҳои махсус
Паҳн кунед
Муқоиса
Нусха
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation