Marko 6
6
Etanyaki Yeso te lkerenket lenche oji Nasaret
(Matayo 13:53–58; Luka 4:16–30)
1Neipung Yeso aing'uaa inie, nelo lkerenket lenche, neirukurukore looiteng'eni lenyena. 2Kore pee ebaki mparri e Sabato, neng'asu aiteng'enicho taatua Sinagogi. Neinining ninye ltung'ana kumo, neing'asia nejo, <<Taaji pasa etumo ꞉ele tung'ani kuna baa? Naa aa ng'eno ana naichooki ninye, eji paa keas mbaa kutuaa e nking'asia naijo kuna taa nkaik enyena? 3Amaa, mara ilo aitibirani loo ntokitin ee nkeek ele, layieni le Maria nera sii lalache Yakobo o Yosep o Yuda o Simon? Metii dei nkanachera enyena atua iyioo?>> Negorokino ꞉ninche ninye.
4 #
Yoa 4:44
Nejoki Yeso ninche, <<Kore loiboni naa keichori ake nkanyit tae ng'oji pooki mara ake to lkerenket lenche o taatua lmarei lenye o ta nkang enye>> 5Naaku eitu eidim ninye ataasa hooyia mbaa e nking'asia teinie, mara ake lolo kuti tamoyia ooiteleka nkaik, neichiu ninche. 6Neing'asia tankaraki meata ninche nkurukoto.
Eitanapa ꞉Yeso neirruaaya loochi tomon oare
(Matayo 10:5–15; Luka 9:1–6)
Nemanaa Yeso taatua nkang'ite eiteng'enicho. 7Neipotu loochi ooiteng'eni lenyena tomon o oare, neng'asu airruaya ninche maa are are, neicho ninche nkitoria meitoria lairiruani.
8Neitanap payie,
menap hoo ntoki to nkoitiei mara ake sobua,
nemenap ndaa, anaa mbene anaa sii ropiyiani tee mbenia ee nkimeenteni enche.
9Kake payie eichop namuka, nemeichop nankan maare.
10Neitoki sii ajoki,
<<Kore nkaji pooki nijing'jing, entewuenie ana metabau nkata nimpung'pung aaing'uaa inie.
11 #
Asat 13:51
#
Luka 10:4–11
Naa kore teneatae ng'oji nemeitoomonieki tanaa nemening'ieki ntae, kore impung'utoto te inie, empiripiroi nterit ee nkejek inchi#6:11 Kore empiripiroi nterit ee nkejek inchi neitodolu ajo meatae ntoki naipirita lolo tung'ana naikenakini ninche, atuwuana echi tininang'aki ltung'ani nkaik tee Sampur., metaa nkitodolunoto tee ninche.>>
12Nepuo aaing'uaa inie aaliki ltung'ana metung'ai nkoitieii enche torrok aaibelekenyakino Nkai. 13#Yak 5:14Nearaa ꞉ninche lairiruani kumo meeipung'o, neelie ltamoyia kumo lata, neichiunyie ninche.
Lkiye le Yoana Laipatisani
(Matayo 14:1–12; Luka 9:7–9)
14 #
Mat 16:14; Mrk 8:28; Luka 9:19 Kore tankaraki natining'ie nkarna e Yeso, nejoito lbata loo ltung'ana, <<Ketipiwua Yoana Laipatisani too lootuata naa tankaraki inia payie easicho inia golon te ninye.>>
15Nejo lkulie, <<Kore ele tung'ani, naa lapa oiboni le Nkai oji Elija.>>
Neitoki lkulie ajo, <<Kera ninye likae oiboni le Nkai ana lolo oibonok le apa,>> nening sii Lkinkii oji Erode lolo omon lenyena.
16Naa kore pee ening, nejo, <<Yoana dei ilo, lapa tung'ani latudung'oyie nkue, otipiwua too lootuata.>>
17 #
Luka 3:19,20 Amu kore apa ꞉Erode naa keirruayie meibung'i Yoana. Neen, nepik jila tankaraki Erodias, nkitok e Pilipo lalache lenye, nawa ayem ewuon eichiu ninye. 18Amu kejokita apake ꞉Yoana ninye, <<Meichiaakino tee nkitanapat e Nkai tiniya nkitok e lalache lino.>> 19Kore Erodias, naa keiba Yoana, neyieu near metua. Kake eitu etumoki, 20amu keurie apa ꞉Erode Yoana, nerripito ninye, amu keyielo ajo kera ltung'ani loosipat naa sinyati. Nenyamalu oleng teneinining Yoana, kake kecham ainining'o ninye.
21Kore mparri nabo pee eitibir Erode sikukuu aachipakino inoto enye, neitoomono lkutuaa le sirkali enye o lkutuaa lenyena loo sikarini o larikok kutuaa le Galilaya, netum taa Erodias mpaach naasie inia nayieu. 22Kore etikii sikukuu, nejing'u ntito e Erodias nkaji eranyakita Erode o lomon lenyena. Neiting'id ninche ꞉ranyata e inia tito.
Nejoki ꞉Lkinkii inia tito, <<Toomonu pooki toki niyieu naa kaaicho.>> 23Neitoki anya lmumai eigil nkatitin kumo ejoki ninye, <<Kore ntoki pooki nikiomon naa kaaicho, ana metabaki orati e nkitoria ai teneitirisi.>>
24Neipung inia tito alo aiparichiere ng'otonye nejoki, <<Nyo dei aomonu?>> Newoliki ajoki, <<Nkue e Yoana Laipatisani.>>
25Nesiooyo nabokata achukokino lkinkii neomon ajoki, <<Kayieu nikincho tana kata nkue e Yoana Laipatisani, ta ncharaa.>>
26Neisinanio lkinkii oleng, kake kore tankaraki lmuma oatama duo o tankaraki ltung'ana ooboitiere te misa, naaku meyieu negil natiaka inia tito. 27Nereu nabokata sikarii jila, neitanap ninye meyau nkue e Yoana. Nelo ilo sikarii nedung'u nkue e Yoana te inie, 28neyau ta ncharaa neicho ntito, neicho ꞉inia tito ng'otonye. 29Kore pee ening looiteng'eni le Yoana nataase, nepuonu aaya sesen lenye, neiteper to nkurarei.
Eitiemua ꞉Yeso lewa nkalupuni imiet
(Matayo 14:14–21; Luka 9:10–17; Yoana 6:1–14)
30Nerrinyunyie lkipaareta aaiturrurro te inie netii Yeso, nenyaki ninye mbaa pooki naataasa o naaiteng'enichete. 31Kore tankaraki naruko ltung'ana epuonu inie netii ninche nepuo, naaku metum abaki ninche mpaach nanyayie ndaa. Nejoki Yeso ninche, <<Wootu erukurukoreeki maapetin ng'oji neliyio aa iyioo aapeny, eyeng'iyeng'ata peneu.>>
32Naaku taa, nepuo ninche aapeny te meli ng'oji neliyio. 33Kake nedol ꞉ltung'ana ninche epuoito, neyielou lkumo, nekuet aapuo inie ng'oji tee nkejek eing'uaa lkerenketi pooki neng'as inie tekue ninche. 34#Nki 27:17; 1Lki 22:17; 2Ng'a 18:16; Ese 34:5; Mat 9:36Kore pee edou Yeso te meli, nedol lturrur kitok, neing'erru ninche amu ketuwuana nkerra nemeata lchekut. Neng'asu aiteng'en ninche mbaa kumo.
35Kore emuto, nepuonu looiteng'eni lenyena netii ninye nejoki, <<Kore ene ng'oji naa loliyio, nemuto sii. 36Nchoo ltung'ana mechomo lchampai o nkang'ite naataana aanyiang'aki ate ntoki nanya.>> 37Kake neng'amaa ajoki, <<Enchoo ntae ninche ntoki nanya.>>
Neipar aajoki, <<Aa ikipuo aainyiang'u mukateni naawuana naanya ꞉laata e laisiaayiani ee mperot ip are pee ikincho metama?>>
38Nejoki, <<Aja mukateni niatata? Enchom eng'urai!>>
Kore pee eidip aateyielo, nejoki, <<Mukateni imiet o sinkirri oare.>>
39Neitanap Yeso ninche metiaaki ltung'ana pooki metowuana too lturrurri aajo siap too nkujit naanyori. 40Newueni ninche too lturrurri loo maa ip o loo maa onom. 41Nerrapu ninye nenia mukateni imiet o lolo sinkirri oare neing'or chumata, neicho Nkai nache. Kore nenia mukateni, neor, neicho looiteng'eni lenyena meichoo ltung'ana. Neitoki ꞉Yeso aoriki ltung'ana pooki lolo sinkirri oare. 42Nenya pooki neimu, 43nebosu looiteng'eni lenyena nkikapuni tomon o oare naabore ng'urrot ee mukateni o sinkirri. 44Kore lewa oaatama inia daa naa nkalupuni imiet.#6:44 Kebaki sii apa netii ntomonok o nkera, ng'ura Matayo 14:21.
Echomo Yeso te nkeper e nkare
(Matayo 14:22–33; Yoana 6:15–21)
45Kore ake payie eidip inia ataasai, neitirrichaki ꞉Yeso looiteng'eni lenyena metijing'a meli aaituruk aalang'aki Betesaida natii ildo kokun, esacharita ninye lturrur. 46Kore pee eidip aichoo ninche lesere, neing'uaa inie alo lowua aomon.
47Kore pee eaku teipa netabaka meli nkiji e mpaso, netii ake Yeso nkop apeny, 48nedol ꞉ninye looiteng'eni lenyena enyok aaikeeja aareu inia meli taa nkaik enche, tankaraki keochito ninche ꞉lkutati onang'are. Kore etinyikua nkakenya, nelo netii ninche epororita nkare, naa keyieu pee erepaa#6:48 Kore keyieu pee erepaa naa keidimi sii aibelekenya aajo kore pee elotu netii ninche. ninche, 49kake kore pee edol ꞉ninche ninye epororita nkare, nejo taa ltauja milika inia, nebuak aaichir, 50amu kore ninche pooki naa ketodua ninye, neiputukuny.
Neirorie taa ꞉Yeso ninche nabokata ajoki, <<Entogolo ltauja! Nanu dei, naaku emiurieicho!>> 51Nedir ninye inia meli natii ninche, neperoo lkutati. Neing'asia ninche katukul. 52Amu kore ninche naa ewuon ake eitu eibung naipirita napa bae e nking'asia ee mukateni, amu keitogoloki ltauja lenche.
Eichiunyie ꞉Yeso ltung'ana oomoyiaa te Genesaret
(Matayo 14:34–36)
53Kore pee elang ninche mpaso, nebaki inia kop e Genesaret, neitacheyie meli teinie. 54Kore pee edou ninche te meli, neyielou Yeso ꞉ltung'ana nabokata. 55Nekuet ltung'ana aaman inia kop pooki, neng'asu aayau ltamoyia too nchoonito ng'oji pooki nening aajo ketii ninye. 56Naa kore pooki nelo ninye, paa nkang'ite, tanaa lkerenketi, tanaa sii lchampai, neiteper ꞉ninche lolo tamoyia too ng'ojitin neemirichereki. Nelej ꞉ninche ninye meiseyie ake sarkudai le nanka enye. Kore ꞉pooki ooiseyie ninye, neichiu.
Айни замон обунашуда:
Marko 6: saq
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2021, Bible Translation and Literacy