मरकुस 2
2
ईसु लखवान मांदला माणेह ने वारु करे
(मत्ती 9:1-8; लुका 5:17-26)
1थोड़ाक दाड़ा हय ज्या, अने अळतेण ईसु अळी कफरनहुम ह़ेर मे ज्यो, अने तां आखे खबर हय जी, के ईसु पासो घोर आय र्यो। 2घणा ढेरका माणहु ईसुन्तां आया, अने आखु घोर ठेह़ाम-ठेह़ भराय ज्यु, अने झापलान अगळ बी जागो नी र्यो। ईसु तीमने भगवान ना बोलु ह़ीकाड़वा बाज र्यो हतो। 3एक लखवा मे पड़ला माणेह ने च्यार जणा खाटलु मे उचलीन ईसुन्तां लाया। 4पण तीमने घोर मे, ईसुन्तां जवा जागो नी जड़्यो; करीन तीहया घोर पोर चड़्या, अने ईसु जां हतो तां तीनी ह़ुदवाये उपर घोर नो ह़ीवड़ो वेखड़्या, अने मांदलु ने ईसु नी अगळ खाटलु भेळ उतार देदा। 5अने तीहया ईसु पोर घणा जबर भरहो कर र्या, आहयु देखीन ईसु लखवा मे पड़ला माणेह ने केदो: “सोरा, तारा पाप माफ हय ज्या।”#लुका 7:48
6थोड़ाक युहदी-धरम ह़ीकाड़न्या बी तां हता; तीहया आह़फाम ना मन मे वीच्यार करवा बाज ज्या, 7“आहयु माणेह ह़ु करवा ईसम केतु हहे? आहयु ते भगवान नु नामबद्दी करे; पाप ते भगवान एतरो माफ करे।”#यसाया 43:25
8ईसु तीमना मन मे वाळी वात ने तत्यारुत जाण लेदो अने केदो, “तमु मन मे ईसम गलत वीच्यार ह़ु करवा कर र्या? 9आहयु मांदलु ने ह़ु केवा सरल से? के ‘तारा पाप माफ हय ज्या’ केवा वारु से, के तारु खाटलु उचलीन चाल, केवा सरल से? 10मे जे मनख्यान सोरो बणीन आहयी कळी मे आयो, मार पांह माणहुन पाप माफ करवान बी हक से।” अने ईसु लखवा ना मांदला माणेह ने केदो, 11“उठ तारु खाटलु चुटलीन घोर जत रे।”
12अने तीहयो तत्यारुत वारु हय्न उठ ज्यो, अने आखान देखणतो, खाटलु चुटलीन तां गेथो जत र्यो, ता आखा भंगलाय ज्या, “अने एला! आमु ईसम कदी नी देख्या ईसम केता जीन भगवान नी बड़ाय करता हता!”
ईसु लेवी ने बोलावे
(मत्ती 9:9-13; लुका 5:27-32)
13ईसु अळी गलील दर्या धेड़े ज्यो, अने तां बी माणहुन मेळो जी लाग्यो#मरकुस 1:45; लुका 5:15; युहन्ना 6:2। ईसु तीमने भगवान ना बोलु ह़ीकाड़वा बाज ज्यो। 14थोड़ीक वार मे ईसु दर्या धेड़े-धेड़े जवा बाज र्यो हतो, ता ईसु हलफाय ना सोरा लेवी ने जे फाळो लेवा वाळो हतो, फाळो लेवान नाका पोर बह रेलो देख्यो; ईसु तीने केदो, “मारो चेलो बणीन मार ह़ाते चाल।” अने तीहयो ईसु ह़ाते चाल पड़्यो।
15अळतेण, लेवी, ईसु ने अने तीना बीजा चेला ने पोरणा बोलायो तीहयो तीनीन तेवा घणा ढेरका फाळो लेण्यामने अने तीमनीन तेवा पापी माणहु ने बी पोरणा बोलायो, तीहया बी ईसु पोर भरहो कर लेदला, अने आखा मेळीन खावा बह्या। 16तत्यार फरीसी दलवाळा#2:16 ईसुन नेवताळान कामे अने थोड़ाक युहदी-धरम ह़ीकाड़न्या तीमनी ह़ाते ईसु ने खातलो देखीन, चेलाम ने पुछ्या, आहयो फाळो लेण्या अने तीमनी ह़ारका पापी माणहु ह़ाते काहा खाय र्यो?
17ईसु आहयी वात ह़मळीन तीमने केदो, “दाक्तर आरगला ने नी, पण मांदला ने जोवे। तेमेत मे धरमी ने नी, पण पापी माणहु ने बोलाव्वा आवलो से।”#लुका 19:10; 1 तीमुथीयुस 1:15
उपाह़ नो सवाल
(मत्ती 9:14-17; लुका 5:35-39)
18बपतीस्मा आपण्या युहन्ना ना चेला अने फरीसी दलवाळान चेला उपाह़ पाळत्ला, करीन थोड़ाक माणहु आवीन ईसु ने पुछ्या, “युहन्ना ना अने फरीसी दलवाळान चेला उपाह़ पाळे, पण तारा चेला उपाह़ नी पाळता?”
19ईसु तीमने केदो, जत्यार तक लाडो वरात्याम नी ह़ाते रेय, ता वरात्या उपाह़ पाळे ह़ु, कदी नी; जत्यार तक मे ईमनी ह़ाते रेम, तां तक तीहया उपाह़ नी पाळे। 20पण जे दाड़े मे ईमनी गेथो अलग हय जही,#लुका 17:22 ते दाड़े गेथा उपाह़ पाळहे।
21नवलु थीगळु जुन्ला लुगड़ा पोर कोय नी लगाड़े; कदीम ईसम करहु ता, तीहयु जुन्लु लुगड़ु धोवहे, ता तीहयु नवलु थीगळु उहटी जहे, अने जुन्ला लुगड़ा ने हापकीन जादा फाड़ देहे। 22नवलो अंगुर नो रोह, चामड़ान जुन्ला कवड़्या मे कोय नी भरे, पण भरहे ता चामड़ान कवड़्या ने वदाड़ीन फाड़ देहे। अने अंगुर नो रोह, अने चामड़ा नु कवड़्यु अने बेम बगड़ी जहे। करीन नवलो अंगुर नो रोह चामड़ान नवला कवड़्या मे भरे।
अराम ना दाड़ा नो मालीक
(मत्ती 12:1-8; लुका 6:1-5)
23अराम ना दाड़े, ईसु अने चेला खेतर मे हय्न जवा बाज र्या हता। तत्यार चेला ने भुक लागी। तत्यार तीहया उंब्या तोड़ीन चोळी-चोळीन खाता-खाता जता हता।#2:23 वेवस्थावीवरण 23:25 24ता फरीसी पंथवाळा ईसु ने केदा, “तारा चेला ने देख! अराम ना दाड़े कायदा ना मान सी एवु काम करवा ताले नी हय!”
25ईसु तीमने केदो, “जत्यार दावुद राजा ने भुक लागी, ता तीहयो ह़ु कर्यो, तीहयी वात तमु भण्या नी ह़ु? जत्यार दावुद राजा अने तीना सात देण्या एथान-एथा डंडवायता हता, अने तीमने भुक लागी, 26ता तीहयो भगवान ना घोर मे ज्यो अने चोखला रोट्ला खादो, अने दोस्तीदार्याम ने बी आप्यो! तीहया दाड़ाम अबीयातार भगवान नो डायलो पुंजारो हतो,#1 समुवेल 21:1-7; 2 समुवेल 8:17; 1 ईतीहास 24:6 तीहया रोट्ला खावा पुंजारा ने सोड़ीन कोय जुगु ताले नी हतु।”
27भगवान अराम नो दाड़ो माणहुन भलाय जुगु बणावलो से,#नीरगमन 23:12; वेवस्थावीवरन 5:14; कुलुस्यो 2:16 पण माणहु ने अराम ना दाड़ा वाटु नी बणायो। 28पण मे मनख्यान सोरो अराम ना दाड़ा नो बी मालीक से।
Айни замон обунашуда:
मरकुस 2: PPt2025
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025