Sakaraiya 9

Ubiereikpe Nnọọ Mme Asua Isrel

1Ikọ prọfesi Abọọñ a-abañake isọñ Hadrak,

adiinyʌñ ididoro isọñ Damaskọs,

sia anyen afịd awo ye afịd esiin Isrel

ese Abọọñ

2ye Hamad ñko, a-adiaññake adaña ye anye,

ye Tai ye Sidọn, akpesʌkado ammọ enekke enie ifiọk unam ñkpọ.

3Tai a-abọp akpọsọñ itie anịm anọ idem amọ;

anyʌñ akpuut silfa abok abon nte abu,

ye kold nte mbio ke mme efaak.

4Ado Abọọñ ayaabọi anye mme inie amọ,

anyʌñ abiat adudu amọ ke akpainyañ,

ndin ikañ ayaasobo anye.

5Askelọn ayaakịt anye anyʌñ adịkke;

Kasa ayaamiañña ke ndutʌhọ,

ye Ekrọn ñko, sia idodanyen amọ ayaakpa mfʌhọ.

Adidem Kasa ayaakpa

ñko awo idiidʌññọ ke Askelọn.

6Mme ñwaaha awo ediidʌñ ke Asdọd,

ñko ami ñyaanam ntañidem Filistia atre.

7Ami ñyaasịññe ammọ iyiib ke inua,

ñnyʌñ mfịppe mbubiam ndidia nsio ke ufañ eded ammọ.

Abasi ñnyịn adiinie mbon se iyọhọ isʌhọ,

enyʌñ ekappa edo esiin ke Yuda,

Ekrọn ñko adiiba nte mbon Yebus.

8Ado ami ñyaanam nnaaekọñ ke tembịd mmi

nọ ñkpeme anye mbaak mbon anwan se ikpọọrọ isaña.

Mbon ufiik ndomokeed idiibenne abio ikọd mmi aba,

sia ami ke idem mmi nsʌk ñkpekpeme anye idahami.

Adidi Adidem Saiyọn

9Nekke daara, Adiaha Saiyọn!

Adiaha Yeruselem, bọñ ñkpo!

Se, adidem mfo a-adi ubịne fiin,

asaña ye adinen ido ye adikan,

ke nsuukidem anye awat ke dọñki,

adoro ke abaak enañmbakara, ke ataa abaak dọñki.

10Ami ñyaakoono mme sariọd nsio ke Ifrem,

ñnyʌñ ñkoono mme enañmbakara unwana ekọñ nsio ke Yeruselem,

ndin utịgha ekọñ ayaabʌññọ.

Anye ayaakwọrọ emem anọ mme idịd.

Ukara amọ adiitọọñọ ke akpainyañ keed akewuọ mfen,

anyʌñ atọọñọ ke Inyañ#9:10 Inyañ ado Yufretis akewuọ mme utịd ederimbod.

11Amaado afo, ke ntak iyiib edioomo mmi ye afo,

ami ñyaasịññe mbon ñkpakọb mfo mfep ke ube unana mmọọñ.

12Itịmme inyọñọ akpọsọñ itie ndufo, ndufo mbon ñkpakọb idodanyen,

kpa idahami, ami mmesian mbo ke ñyaamaana inọ inie utịb itie iba se ekenenie.

13Ami ñyaanuuk Yuda nte nnuuk utịgha mmi,

ñnyʌñ mben Ifrem nsịn ñyọhọ ke anye.

Ami ñyaademme nditọ ideen ndufo, Saiyọn,

nọ enwana ye nditọ ideen ndufo, Kriis,

ñnyʌñ nnam ndufo eba nte akañkañ awo uko.

Abọọñ Ayaawuọ Ada

14Ndin Abọọñ ayaawuọ ada ke anyọñ ammọ;

idañ amọ ayaasem nte akebkeb.

Abọọñ Andikara ayaafịt adukpoñ;

anyʌñ asaña ke ayobio usuuk,

15ndin Abọọñ Andikponñkan ayaakwe ammọ.

Ammọ eyaesobo,

enyʌñ ekama itiad ikañakpọ ekan mme usua.

Ammọ eyaenwọñ enyʌñ ekuun nte mbon eyọhọke ye mmịn;

ammọ eyaeyọhọ nte bọwịd

e-ekamake esiime ñkpọ ke mme ñkpitʌñ itie uwa.

16 Abọọñ Abasi ammọ ayaanyaaña ikọd amọ ke usen ado

nte akpemeedọñ anyaaña udịmedọñ amọ.

Ammọ eyaeyamma ke isọñ amọ

nte mme nsọñudua itiad ke anyanya ubọọñ.

17Se naña ammọ ediifọọn inyʌñ iyaiya!

Ñkpasi ndidia ayaanam ñkparawa eseghe,

ñko ufa ukọd ayaanam ubọikpa eseghe.

Айни замон обунашуда:

Sakaraiya 9: ICB

Лаҳзаҳои махсус

Паҳн кунед

Нусха

Want to have your highlights saved across all your devices? Sign up or sign in

Adisana Ñwed Abasi ke Ikọ Ibibio Ayio Mfịn™

Enam ke emaekebọ Unyịmme. Emʌm afịd unen ekama ke afịd ederimbod.

Ibibio Contemporary Bible™

Маълумоти бештар дар бораи Adisana Ñwed Abasi ke Ikọ Ibibio Ayio Mfịn