Maika 4

Abod Abọọñ

1Ke mme akpatre usen

eyaewuuk ekamba abod tembịd Abọọñ

akoñ akan afịd mme ñkpoon abod;

eyaedịppe anye nọ akoñ akan mme ntək abod,

mbon awo eyaeyịre udịm ekaa do.

2Uwak mme idịd eyaedi edibo,

“Idi, yak ñnyịn idọọk ika ekamba abod Abọọñ,

ika tembịd Abasi Yekọb.

Anye ayaikpeep ñnyịn usʌñ amọ,

nọ ato do ñnyịn isaña ke mme usʌñ amọ.”

Mbed ayaato Saiyọn awuọ,

ikọ Abọọñ ayaawuọ ato Yeruselem.

3Anye ayaakpe ikpe anọ uwak mbon awo,

anyʌñ anam emem ke atu mme ñkpọsọñ idịd ke anyan usʌñ.

Ammọ eyaemia mme akañkañ ammọ nọ ekappa ñkpọ ukịmisọñ,

ye mme eduad ammọ nọ ekappa ekọb ukọññkpọ.

Mme idịd idiibenne akañkañ ibịne emọ-emọ idịd,

ammọ idiinyʌññọ ibọ ukpeeb ke naña enwana ekọñ aba.

4Adiido anie idak eto fain amọ atie,

anie idak eto fik amọ atie,

awo ndomokeed idiinamma ammọ efeghe ndịk,

sia Abọọñ Andikponñkan Abasi atañ.

5Afịd mme idịd ekeme isaña

ke anyịñ mme abasi ammọ,

ado ñnyịn idiisaña ke anyịñ Abọọñ

Abasi ñnyịn ke nsi-nsi nsi-nsi.

Uduak Abọọñ

6 Abọọñ abo ate, “Ke usen ado,

ami ñyaakoono mme mbʌñọ;

ñyaakoono mbon ntañmfeb mbok,

ye mbon a-ami nnọọhọ mfiomo.

7Ñyaanam mme mbʌñọ edo mme nsʌhọ mmi,

mbon ebịneke esio ekappa edo akpọsọñ idịd.

Abọọñ ayaakaara ammọ ke Abod Saiyọn

tọọñọ ke usen ado tutu ke nsi-nsi.

8Amaado afo, ufọkanyọñ ukpeme udịmedọñ,

akpọsọñ itie Adiaha Saiyọn,

eyaemaana eyaak ukara unọ;

adidem ayaamaana abịne Adiaha Yeruselem.”

9Nsoo ido nọ ndufo etua enyʌñ esio ñkpo idahami,

nte ndufo inieghe adidem?

Ado nte adaukara ndufo asobo,

nọ ubiak imʌm ndufo nte awonwaan a-abaaha ke ubiakuman?

10Adiaha Saiyọn, naa nwịne ke ubiak,

nte awonwaan a-abaaha ke ubiakuman,

idahami ana afo akpọñ abio

akena ke anwa esiin.

Afo ayaakaa Babilọn;

eyaekunyaaña ke udo.

Do ke Abọọñ aduufak fiin

isio ke ubọk mme asua mfo.

11Ado idahami uwak mme idịd

ediana keed edi ikọ ye afo.

Ammọ ete, “Yak esappa anye,

yak anyen ñnyịn eduọi Saiyọn!”

12Ado ammọ idiọọñọke

akikere Abọọñ;

uduak amọ inwañake ammọ,

ke anye awoppo ammọ nte mfañ abakpa akaa afe ubeek abakpa.

13“Dakka da nyʌñ kọk ñkpọ, Adiaha Saiyọn,

sia ami ñyaunọ nnʌk ukwak;

ñyaunọ ukodenañ brọns,

ndin afo ayaaboom uwak mme idịd ñkeñe-ñkeñe.”

Afo ayaakpọñ mme ndiọi inie ammọ anọ Abọọñ asaña-asaña,

e-ekpọñ inie ammọ enọ Abọọñ afịd ederimbod.

Айни замон обунашуда:

Maika 4: ICB

Лаҳзаҳои махсус

Паҳн кунед

Нусха

Want to have your highlights saved across all your devices? Sign up or sign in

Adisana Ñwed Abasi ke Ikọ Ibibio Ayio Mfịn™

Enam ke emaekebọ Unyịmme. Emʌm afịd unen ekama ke afịd ederimbod.

Ibibio Contemporary Bible™

Маълумоти бештар дар бораи Adisana Ñwed Abasi ke Ikọ Ibibio Ayio Mfịn