Yenesis 5

Tọọñọ ke Adam Tutu Asịm Nua

1Ami ado mbʌk se ewet ebaña ubon Adam.

Ke ini Abasi akebotto awo, anye akebot ammọ ke mbid Abasi. 2Anye akebot ammọ awodeen ye awonwaan, anyʌñ adiọñ ammọ. Anye akesio ammọ anyịñ, “Ubonawo”#5:2 Ke usem Hibru ado Adam idaha anye akebotto ammọ.

3Ke ini Adam amaakedu uwem isua ikie mme edịb mme duob (130), anye amaanie ayịn awodeen ke mbid idem amọ; anye amaasio anye Sed. 4Ke Sed amaakemana, Adam amaadu uwem isua ikie itiaita (800), anyʌñ anie nditọ ideen ye nditọ ibaan mfen. 5Ke afịd, Adam akedu uwem isua ikie usʌkkeed mme edịb mme duob (930), ndin anye akpa.

6Ke Sed amaakedu uwem isua ikie mme ition (105), anye amaakappa ado ete anọ Enos. 7Ke anye amaakebon Enos, Sed amaadu uwem isua ikie itiaita mme itiaba (807), anyʌñ anie nditọ ideen ye nditọ ibaan mfen. 8Ke afịd, Sed akedu uwem isua ikie usʌkkeed mme duob mme iba (912), ndin anye akpa.

9Ke ini Enos amaakedu uwem isua anaañ mme duob (90), anye amaabon Kenan. 10Ke anye amaakebon Kenan, Enos amaadu uwem isua ikie itiaita mme duob mme ition (815), anyʌñ anie nditọ ideen ye nditọ ibaan mfen. 11Ke afịd, Enos akedu uwem isua ikie usʌkkeed mme ition (905), ndin anye akpa.

12Ke ini Kenan amaakedu uwem isua ata mme duob (70), anye amaabon Mahalalel. 13Ke anye amaakebon Mahalalel, Kenan amaadu uwem isua ikie itiaita mme aba (840), anyʌñ abon nditọ ideen ye nditọ ibaan mfen. 14Ke afịd, Kenan akedu uwem isua ikie usʌkkeed mme duob (910), ndin anye akpa.

15Ke Mahalalel amaakedu uwem isua ata mme ition (65), anye amaabon Yared. 16Ke anye amaakedo ete Yared, Mahalalel amaadu uwem isua ikie itiaita mme edịb mme duob (830), anyʌñ anie nditọ ideen ye nditọ ibaan mfen. 17Ke afịd, Mahalalel akedu uwem isua ikie itiaita mme anaañ mme duob mme ition (895), ndin anye akpa.

18Yared akedu uwem isua ikie keed mme ata mme iba (162), ndin anye amaabon Inọk. 19Ke anye amaakebon Inọk, Yared amaadu uwem isua ikie itiaita (800), anyʌñ anieñe nditọ ideen ye nditọ ibaan mfen. 20Ke afịd, Yared akedu uwem isua ikie usʌkkeed mme ata mme iba (962), ndin anye akpa. 21Ke ini Inọk amaakedu uwem isua ata mme ition (65), anye amaabon Metusela. 22Ke anye amaakebon Metusela, Inọk amaasaña mfọn-mfọn ye Abasi isua ikie ita (300), anyʌñ abon nditọ ideen ye nditọ ibaan mfen. 23Ke afịd, Inọk akedu uwem isua ikie ita mme ata mme ition (365). 24Inọk amaasaña mfọn-mfọn ye Abasi; ndin anye ikibaaha aba, sia Abasi amaaben anye asio.

25Ke Metusela amaakedu uwem isua ikie mme anaañ mme itiaba (187), anye amaabon Lamek. 26Ke anye amaakebon Lamek, Metusela amaadu uwem isua ikie itiaba mme anaañ mme iba (782), anyʌñ anie nditọ ideen ye nditọ ibaan mfen. 27Ke afịd, Metusela akedu uwem isua ikie usʌkkeed mme ata mme usʌkkeed (969), ndin anye akpa.

28Ke Lamek amaakedu uwem isua ikie mme anaañ mme iba (182), anye amaanie ayịn awodeen. 29Anye akesio anye Nua#5:29 Nua akaiba nte idọñesịd ke usem Hibru anyʌñ abo, “Anye ayaidọñ ñnyịn esịd ke utom ubọk ñnyịn ye mbiaak ufen ubọk ñnyịn a-atooho ntak A-Abọọñ amaakesuuñọ isọñ.” 30Ke Nua amaakemana, Lamek amaadu uwem isua ikie ition mme anaañ mme duob mme ition (595), anyʌñ anie nditọ ideen ye nditọ ibaan mfen. 31Ke afịd, Lamek akedu uwem isua ikie itiaba mme ata mme duob mme itiaba (777), ndin anye akpa.

32Ke Nua amaakeyọhọ isua ikie ition (500), anye amaabon Sem, Ham ye Yafed.

Айни замон обунашуда:

Yenesis 5: ICB

Лаҳзаҳои махсус

Паҳн кунед

Нусха