मूल स्यूस्स्यायूजे कामजे किताब 25
25
फेस्तसजे खूम्ने पावलजे मुद्दा
1फेस्तस रङ्से नेने रदेबे सोम्म्या ङ्येदे कैसरियादे यरूशलेम गीलीदे। 2केन् पूस्र्यायू मेस्ये यहूदीयूजे मूख्य मीयूदे पावलजे विरुद्धने दोष लैदीदे, 3मेस्ये पावलने यरूशलेम कूल्बी यदेबे बिन्ती चैर्दीदे। चेनेयलो थमयूदे पावलने लम्ने रेनूबने सेब योजना बन्दीन ख्य। 4फेस्तसदे थमयूने जवाफ पीन्दे, “पावल कैसरियानेने स्योप्ये ख्यङ्, मेस्ये ङ रङ्सेये छ्योट्टोने होने ल्वाबीन ख्यङ्। 5नमयू नङ्जे नेतायू हैयाने ङैप्रे प्रस्य, मेस्ये पावलने चत्या अन्ज्य खराब ख्यङ्यलो ङूने दोष लैदीस्य।”
6थमयूप्रे ङू येर्या-च्यूर्या दिनयली थेप् अन्टूङ्लाबे कैसरिया ल्वारदे, मेस्ये हम्बजे नैदेरेदेने न्याय चीप्प टूङब नेने टूङ्देबे ङूदे पावलने रेब हुकुम चीत्दे। 7पावल मेस्ये यरूशलेमदे रब यहूदीयू ङूजे तीला-छोला मेर्स्ये पीन्दे, मेस्ये पावलजे विरुद्धने थर्-थर्जे दोष लैदीदे, थमयूदे हम्बजे प्रमाण पीन अन्खू।
8पावलदे रङ्से पक्षने क्यम्देबे यदे, “ङैदे यहूदीयूजे नियमजे विरुद्धने मन्दिरजे विरुद्धने, मेस्ये कैसरजे विरुद्धने चैत्याये अपराध अन्चीक्क।”
9तर यहूदीयूने सूग्ला चेस्ये मन्देबे फेस्तसदे पावलने यदे, “न यरूशलेमने प्रदेबे हैयाने ङैजे खूम्ने अम्ब पोजे बारेने इन्साफ चीस्य मन औं?”
10तर पावलदे यदे, “कैसरजे न्याय-चीप्प टूङब नेजे खूम्ने ङ मेर्न ख्यङ्, हैयाने ङैजे इन्साफ क्यूरपर्तीय। ङैदे यहूदीयूने अन्ज्य चैत्याये अन्चीक्क, हम्ब नदे चेलाबे थाने ख्यङ्। 11कादेये ङ अपराधी ख्यङ्, मेस्ये सेब दण्ड प्रेब खालजे काम ङैदे चीक्क ख्यङ् यलो सीबने ङ तयार ख्यङ्। तर कादेये थमयूदे ङैने लैदेब दोष तम्दम् त्वोदे यलो ङैने थमयूजे लाने सूदेये सूम्दीबे अन्खू। ङ कैसर ट्याने बिन्ती चीक्क्य।”
12होर्दे फेस्तसदे मोतो पीनब मीयूप्रे मोतो चीत्देबे यदे, “नदे कैसरजे ट्याने बिन्ती चेर्दीय यदे। होरेक्यूत्देबे ङ नने कैसर ट्याने कूल्बीय।”
मूरूम् अग्रिपासप्रे फेस्तसजे मोतो
13तेदिन ङ्येदे मूरुम् अग्रिपास मेस्ये ङूजे स्यङ् बरनिकी फेस्तसने स्वागत चेने कैसरिया रदे। 14थमयू होने कूम दिन टूङमेस्ये फेस्तसदे पावलजे मुद्दा मूरुम्जे खूम्ने येरे यदेबे स्योत्दे, “फेलिक्सदे कैदने स्य्वोप्देबे हीदेब मीत्या येने ख्यङ्, 15अम्बजे बारेने, ङ यरूशलेमने ख्यङ्ब, पूस्र्या केन्यूप्रे यहूदीयूजे धर्म-गुरुयूदे ङूजे विरुद्धने दोष लैदीदेबे ङूने दण्ड पीन पर्दीय यदेबे बिन्ती चे ख्य।
16“तर ङैदे थमयूने यदे, ‘मीने दोषी अन्ठर्दीतासेमे रोमी सरकारजे दण्ड पीनब चलन त्वो। दोष लैदेब मीदे दोष प्रेब मीजे खूम्दे रङ्से पो स्य्वेब मौका प्रेपर्दीय।’ 17कन्छ्वाब थमयू फूङ् क्यूत्देबे अने रदे, ङैदे अन्कलाबे नैदेरेदेने न्याय चेब टूङब नेने टूङ्देबे ङूने अने सीक यदेबे हुकुम पीन्दे। 18कन्छ्वाब दोष तनब मीयू मेर्दे ङैदे मनप्र ङूजे लागि थमयूदे अन्ज्य पो चैत्याये तन अन्खू। 19तर थमयूजे सेम् लो अम्मील्ले क्यूरब पोब थमयूजे धर्म मेस्ये सीयेब येशूजे बारेने टोङ्, पावलदे अझ येशू सोम्बो ख्यङ् यदेबे पक्क चेख्यङ्। 20होरेक्यूत्देबे अम्ब पोजे जाँच चेब बारेने ङ अल्मल् क्यूत्देबे अम्बजे बारेने छलफल चेने यरूशलेमने प्रतीङ् रइर यदेबे ङूने ङैदे लोत्दे। 21तर पावलदे कैसरजे फैसला अन्क्यूत्दासेमे स्योप्देने येन यदेबे बिन्ती चेब कारणदे ङूने मूरुम् कैसरट्याने अन्कूल्बीदासेमे ङूने लेब सीन्त्री येनब हुकुम पीन्दे।”
22हन्छ्वाब अग्रिपासदे फेस्तसने यदे, “अम्ब मीजे पो ङैदेये ङीन प्रेल्लो क्यूर ख्यङ्दे।” होर्दे ङूदे यदे, “नैदे नदे ङ्यीन प्रेक्क्य।”
पावल अग्रिपासजे खूम्ने
23नैदेरेदे अग्रिपास मेस्ये बरनिकी बेस्से केन् गेसेन् प्रेत्देबे रदे। थमयू सिपाईजे मी केन्यू मेस्ये सहरजे मूख्या मीयूप्रेप्रे सभा-कीम्ने टूङ्दे। होर्दे फेस्तसजे हुकुम प्रेत्देबे पावल सभाने रेत्दे। 24फेस्तसदे यदे, “मूरुम् अग्रिपास मेस्ये यैयाने ख्यब भलादमी मीयू, नमयूदे अम्ब मीने तङ्न ख्यङ्, ङूजे बारेने पूरा यहूदीयूदे ‘अम्ब मी जेम्से सोम्बो येन खल्जे त्वो’ यदेबे यरूशलेमने मेस्ये अन्-यानेये ङैप्रे बिन्ती चे ख्य। 25तर ङैदे अम्ब मीने ज्यान सजाइ पीन खल्जे दोष चैत्याये त्व अन्खू। तर ङू रङ्सेदेने कैसर ट्याने बिन्ती चेब कारणदे ङैदे ङूने कैसर ट्याने कूल्बेब पक्क चीत्दे। 26अम्बजे बारेने ङैदे ङैजे मूरुम्ने लिख्देने पर्देब पोयू चैत्याये अन्तङ्। होरेक्यूत्देबे ङैदे ङूने नमयूजे खूम्ने, मेस्ये खास रूप्ने, ओ मूरूम् अग्रिपास, नैजे खूम्ने रे ख्यङ्, ङीदे अम्बजे जाँच चीक्कमेस्येब ङैदे चत्या लिख्देब पो प्रेक्की यब आशा चेख्यङ्। 27चेनेयलो कैदने टूनब मीजे विरुद्धने दोष चैत्याये अन्स्योत्तासेमे ङूने सीत्तीने झ्यालखानने कूल्बेब ङैने ज्य अन्थे।”
Айни замон обунашуда:
मूल स्यूस्स्यायूजे कामजे किताब 25: सर् कबुल
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Ghale New Testament © Nepal Bible Society, 2011.