Sailm Dhaibhidh 91
91
Salm 91
1An neach sin tha na thàmh gach uair
an ionad uaigneach Dhè,
Fo sgàil an Uile-chumhachdaich
buan-chòmhnaidh nì gach rè.
2Their mi a‑nis mu thimcheall Dhè,
mo thèarmann e, 's mo neart;
Mo dhaingneach: cuiream dòchas ann:
mo Dhia, 's e Dia nam feart.
3Gu dearbh o rib an eunadair
nì esan fuasgladh ort,
Is nì do shaoradh mar an ceudn'
on phlàigh tha gràineil goirt.
4Le 'itich nì e d'fhalach fòs,
bidh d'earbsa fo a sgèith;
Is fhìrinn bidh na targaid dhut,
mar sgèith dod dhìon gach rè.
5Fa chùis an uamhais anns an oidhch'
cha bhi ort geilt no sgàth;
No fòs fa chùis na saighde bhios
a' ruith air feadh an là:
6Cha bhi maoin eagail ort ron phlàigh
tha triall an dorchadas:
No fòs fa chùis an uilc a bhios
mu mheadhon-là ri sgrios.
7Bidh mìle tuiteam sìos rid thaobh,
deich mìle fòs rid dheis;
Ach olc dhiubh siud cha tig ad chòir
no 'm fagas dhut am feasd.
8A‑mhàin led shùilean seallaidh tu,
is bheir fa‑near le beachd:
Droch-dhìol is tuarasdal nan daoi,
gun cheist do chìthear leat.
9A chionn gun d'roghnaich thusa Dia,
mar chòmhnaidh dhut gach àm,
An Dia ud tha na thèarmann dhomh,
's e 'n Tì as àirde th'ann:
10Aon olc chan èirich dhut; is plàigh
dod fhàrdaich cha tig dlùth.
11Oir bheir e àithn' da ainglean, chum
ad ròd gun dìon iad thu.
12Is togaidh iadsan thusa suas
gu h‑àrd air bhàrr am bos;
Eagal gum buailte leat air cloich,
aon uair air bith do chos.
13Air leòmhann is air nathair nimh'
gun dòrainn saltrar leat:
Pronnaidh tu 'n dràgon sìos led chois,
's an leòmhann òg led neart.
14A chionn gur ionmhainn leis-san mi,
sàr-fhuasgladh bheir mi dha;
Air m'ainm a chionn gur eòlach e,
àrdaicheam e gach là.
15Gairidh e orm, is freagram e:
na thrioblaid bitheam leis;
Onair is urram bheir mi dha,
is fuasglam air gu deas.
16Le saoghal fad is maireannach
sàsaicheam e gu leòr:
Mo shlàinte dhàsan mar an ceudn'
foillsichidh mi gu mòr.
Айни замон обунашуда:
Sailm Dhaibhidh 91: SD1992
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Comann Bhìoball na h-Alba (Scottish Bible Society) 1992.