Sailm Dhaibhidh 148
148
Salm 148
1Molaibh-se Dia. Ard-mholaibh fòs
Iehòbhah mòr gu bràth,
O nèamh nan speur; molaibh-se Dia,
sna h‑ionadan as àird'.
2Uil' ainglean Dhè, mòr-mholaibh e:
molaibh e, 'shluagh gu lèir.
3O ghrian 's a ghealach, molaibh e,
's a reultan glan nan speur.
4O nèamhan àrd' nan uile nèamh,
is uisgeachan a tha
An còmhnaidh shuas os cionn nan speur,
molaibhse Dia a‑ghnàth.
5Thugadh iad cliù is moladh binn
do ainm Iehòbhah thrèin;
Oir chuir e 'àithne mach le neart,
is rinneadh iad da rèir.
6Do rinn e fòs an daingneachadh
a‑chum bhith buan a‑ghnàth:
Is chuir e statuin orra siud
nach tèid air chùl gu bràth.
7On talamh fòs a tha fo nèamh,
molaibh Iehòbhah treun;
Uil' dhràgonan ro‑uamhasach,
's a dhoimhneachdan gu lèir.
8Tein'-adhair agus clach-shneachd chruaidh
an ceò thèid suas, 's an sneachd;
Gaoth dhoineannach a' coileanadh
a bhriathar-san gu beachd;
9Na slèibhtean farsaing atmhor mòr',
's na tulaich fòs le chèil':
Gach craobh bheir toradh agus blàth,
's na seudair àrd' gu lèir.
10Gach beathach, ainmhidh, is gach dùil
a shnàigeas air an làr,
'S gach eunlaith sgiathach iteagach,
tha 'g itealaich gu h‑àrd.
11Gach rìgh air thalamh, làidir mòr,
's gach poball fòs air bith;
Na prionnsan is luchd breitheanais
tha thar gach tìr fa leth.
12Na h‑òigearan tha calma deas,
's na maighdeannan le chèil';
Na seanairean tha eòlach glic,
's gach leanabh òg gu lèir.
13Ainm Dhè àrd-mholadh iad, oir tha
'ainm-san a‑mhàin ro‑mhòr:
Os cionn na talmhainn is nan nèamh,
air àrdachadh tha ghlòir.
14Adharc a shluaigh leis àrdaichear,
seadh cliù a naomh gu lèir;
Sluaigh Israeil, tha dhàsan dlùth.
Molaibh Iehòbhah treun.
Айни замон обунашуда:
Sailm Dhaibhidh 148: SD1992
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Comann Bhìoball na h-Alba (Scottish Bible Society) 1992.