Popular Bible Verses from 1 Corintios 12

Паҳн кунед

Ja̧'hua̧ta̧nö̧ Espíritu Santo o'ca toi'önärö adiunä kö̧ pä'ö huo̧juȩtö̧ Dios, jahuätörö adihua pä'ö.

Ja̧'hua̧ ja̧'a̧ ucutumä o'ca toi'önä ji̧nä̧ yo̧mȩtȩ Cristo jä̧ttä̧pä̧ya̧ huotöjä. Ja̧'hua̧ta̧nö̧ ka̧ra̧'i̧nä̧, ka̧ra̧'i̧nä̧ aditö, Cristo jä̧ttä̧pä̧ya̧ hua̧ ja̧'a̧nä̧.

Ja̧'hua̧ta̧nö̧ korottö jättäpäyotöttö barauttumä, o'ca juiyönä barahua'a. Ja̧'hua̧ta̧nö̧ korottö jättäpäyotöttö adiu jȩttö̧ttö̧mä̧, o'ca juiyönä esehua'a.

Espíritu Santomä ka̧ra̧rö̧ rö̧ȩnä̧ huo̧ju̧nä̧ ucuocuäcuähuä iyö. Ja̧'hua̧ta̧nö̧ ja̧u̧tä̧ Espíritu Santomä ka̧ra̧rö̧ huo̧ju̧nä̧ ucuocua pä'ö iyö. Ja̧'hua̧ta̧nö̧ ka̧ra̧rö̧ adiu eseta pä'ö iyö ja̧u̧tä̧ Espíritu Santo. Ka̧ra̧rö̧ na̧'ä̧chä̧tö̧rö̧ aditö icua pä'ö iyö. Ka̧ra̧rö̧ koro juäi ttö̧ja̧ ttieru juäi jȩtta̧ pä'ö iyö. Ka̧ra̧rö̧ adihuä huȩnȩ, Dios iyähuä huȩnȩ, jiähua pä'ö iyö. Ja̧'hua̧ta̧nö̧ ka̧ra̧rö̧ iyö adiu u̧huo̧juä̧cua̧'a̧nö̧ espíritus suropätörö'inä, Espíritu Santo, iso päi'önä hua̧rö̧'i̧nä̧. Ka̧ra̧rö̧ iyö koro ieru huȩnȩnä̧ ucuocua pä'ö. Ja̧'hua̧ta̧nö̧ ka̧ra̧rö̧ iyö ja̧u̧ huȩnȩ ttucuocuäji o'ca'a, jiähua pä'ö ttucuocuäjimä.

O'ca juiyö pi̧yȩmä̧ iyö ya̧tȩtä̧ ji̧yȩä̧cuȩtä̧ Espíritu Santotä. Ja̧u̧tä̧ ka̧ra̧rö̧'i̧nä̧, ka̧ra̧rö̧'i̧nä̧ churutä pä̧huä̧ rö̧jo̧mȩnä̧ iyö, adiu jȩttä̧cua̧'a̧nö̧.

O'ca juiyönä jättäpäyotö jähuä yoräteunä tta̧tä̧rä̧cuä̧hua̧ pä'ö aditinödo. O'ca juiyönä jättäpäyotö jähuä ji̧nä̧ yo̧mȩtȩnä̧ adiu jȩpö̧ ttö̧ja̧cua̧ pä'ö aditinödo.

Iso päi'önä ujutumä ka̧ra̧'i̧nä̧, ka̧ra̧'i̧nä̧ i̧mi̧cu̧nä̧ ȩmä̧tö̧jä̧ Espíritu Santo iyähuä. Juhuorö'inä i̧mi̧cu̧nä̧ tȩmo̧mȩnä̧, ya̧tȩtä̧ ja̧'a̧ Espíritu Santomä ujuturu iyömä. Korotö i̧mi̧cu̧nä̧ aditätöjä. Ja̧'hua̧nö̧ tadita'anä, ya̧tȩrö̧tä̧ Tu̧ru̧hua̧rö̧tä̧ amöcuädö aditätöjä. Ja̧'hua̧ta̧nö̧ korotö i̧mi̧cu̧nä̧ jȩpä̧tö̧jä̧ o'ca juiyönä. Juhuorö'inä ya̧tȩtä̧, Diostä iyö o'ca toi'önärö adiu jȩtta̧ pä'ö.

Ja̧'hua̧nö̧ ja̧'a̧ttö̧ Dios pa̧'a̧nö̧ hue'inödo iglesia ruhuärö. Äcuomenä Jesús hue'ähuotörö hue'inödo. Ja̧u̧nu̧ o'ca'a, Dios i̧huȩnȩ Diosttö ȩmä̧huä̧ ji'ähuätörö hue'inödo. Ja̧u̧nu̧ o'ca'a, Dios i̧huȩnȩ huo̧juȩtä̧tö̧rö̧'i̧nä̧, ttö̧ja̧ ttieru juäi jȩpä̧tö̧rö̧'i̧nä̧, na̧'ä̧chä̧tö̧rö̧ aditö icuätörö'inä, korotörö ppä'ädätörö'inä, korotö ä'canä amöcuädö, jȩpö̧ ppä'ädätörö'inä, korotö ttieru huȩnȩ ucuocuätörö'inä hue'inödo Dios.

Iso päi'önä ujutu jättäpäyotömä ji̧nä̧ ji̧yȩtȩtä̧mä̧ ko̧ca̧'a̧. Rö̧ȩnä̧ ka̧'a̧.

Ja̧'hua̧nö̧mä̧cö̧. Koromä ujututtu jättäpäyotö jähuämä yoröiso juiyuhua'a pä'ö tamöcuädomenä, ja̧u̧tä̧ iso päi'önä juruhua'a ujuturu kä̧cuä̧huä̧nä̧.

Iso päi'önä ujutu jättäpäyotö ji̧yȩä̧cuȩtä̧ tö'äre jö̧ttö̧mä̧, ¿tta̧'a̧nö̧ pä'ö tä̧ju̧cua̧'a̧jä̧ttö̧? Ja̧'hua̧ta̧nö̧ ujutu jättäpäyotömä ji̧yȩä̧cuȩtä̧ tä̧ja̧ jö̧ttö̧mä̧, ¿tta̧'a̧nö̧ pä'ö 'cö̧tä̧cua̧'a̧jä̧ttö̧? Dios ujutu jättäpäyotömä churutä pä̧huä̧ rö̧jo̧mȩnä̧ aditinödo. Iso päi'önä o'ca juiyönä ji̧yȩä̧cuȩtä̧ jö̧ttö̧mä̧, ujutu jättäpäyotömä jui'ajatöjä.