Оятҳои маъмули Инҷил аз Tito 1

Паҳн кунед

Po kaitiña ïgai sai buaboitudai Diuxi dïï maatiga maaxi sai maiti ïr buaboi nïiditai ixtumaxi ibuayi. Mai ïïgidaraga ïgai tudu dai maiti ixtutuidikïi xi ibuadagi ixtumaxi ïr kïïga. Kaxkïdï go ïï tukuragai dukai nïidi Diuxi ïgai.

Daiñi, bïïxi buaboitudadami ibhïgadï ka kïï buañixi dai tomarhi ïmo ixtumaxi mai bhaiga xi tukurhimagi ïpamu. Dïï gia odami ix makïdï kia tukuraga ibhïgadï mai buaboidaitai Suxi Kristo ïgai gia bïïxi aïkatai ixtumaxi ibuadagi bamioma tukurhidi iibhïadï. Kaxkïdï tudu bïïxi tïgibudadï tukuraga asta xako ka mai maatï taata ïgai ixtumaxi ïr soimaaxkami.

Xïxkadï darasa agadagi aapi buaboitudadami bhaitï gukakamigadï gï agai xi kïïga gïn tïgito nïijada sa bhai buaboitudai ïgai go buaboikïdï aatagi ix makïdï gatïtïïgidi aatïmï. Ix kïïga buaboitudagi ïgai ix tumaxi ïr buaboi aidï gia bhaigakamu ïgai xi kïïga maakadagi ñoki go gaa buaboitudadami dai bhaigakamu xi abïnakidadagi go gaa ïpï sai kïïga oijadana gïr buaboidaraga. Dai podukai ïpï xi go bhaitï gukakami kïïga buaboitudagi ixtumaxi ïr buaboi aidï gia bhaigakamu ïgai xi mamaakadagi ñoki xorai buidïrï bïïtïkagi ixtumaxi ïr buaboi.

Daiñi, go buaboitudadami bhaitï gukakamigadï bia ïmo sïïrhikami. Diuxi nukaturhi ïgai Diuxi maamaradï kaxkïdï gï agai xi kïïgakïrï óídakagi go bhaitï gukakami sai podukai mai tipukagi ixtukïdï gïpiïrï bupadagi go jaa óídakami. Maiti gï agai xi ïmo gïdukami gï ïrhiadagi ïïgi ïgai tudu dai maiti gï agai xi omarhigakagi tomarhi xi nabaamutïrïkagi tomarhi xi kokoatïrïkagi. Dai maiti gï agai xi mukiñdadï tuigakagi ïpï. Gï agai bhaiyoma xi kïïga miadïgidarakagi ïgai xïïxkadï daibiadagi odami. Dai gï agai xi ojoidagi ïgai ibuadagi ixtumaxi ïr kïïga. Gï agai xi maatïkagi ïgai ix tuma tïgibudagai ïgai daidi ïr soiñi dai ïgai bhïiyagi. Gï agai xi ïr sïïrhi ibuadamikagi. Gï agai xi bïïxi aïkatïrï ipïrhiada ïgai xi bhai ïrhiatuda Diuxi dai gï agai ïpï xi gï kabakadagi ixtumaxi maiti ïr soiñi bïïtarï.

Dai go bhaitï gukakami ix makïdï darasagi aapi gï agai xi ïr kïkïïrhikagi ix makïdï kïï buañixikami dukai óídaga. Podukai mai biakamu jaa ixtukïdï gïpiïrï bupadagi. Gï agai xi ïmadugakagi oñigadï tudu. Dai gï agai xi maamaradï ïr buaboitudadamikagi. Dai gï agai xi mai oidakagi ix tukïdï jaa pokaitadagi sai maamaradï ïr pupuirugami. Dai gï agai ix mai tipukagi ïpï ixtukïdï pokaitadagi jaa sai mai ïïgidi dïïdïdï.