Оятҳои маъмули Инҷил аз Romanos 8

Паҳн кунед

Kïï maatï aatïmï sai Diuxi bïïxi aïkatïrï aatabuayi dai kïïga ibuayi aatïmï gïr bïïtarï ix makïdï oigïdai Diuxi. Aatïmï gïr bïïtarï tudu ix makïdï Diuxi ïkobai gïr báí xi aatïmïkïdï gï ibuadagi ix tumaxi ïgai ipïrhidi.

Kïïga maatï aanï sai mai tipu ixtumaxi sobhidagi bai ka maiti gïr oigïdadagi Diuxi. Tomaxi koi aatïmï xiïpï xi apia óídakagi aatïmï modukai mai sobhidamu gobai. Tomarhi Diuxi tïtïañikarudï dai tomarhi go diabora tïtïañikarudï, xiïpï go gubukadagai bipiakami tïbagiïrï óídakami mai sobhidamu. Tomarhi ix tumaxi oidaga xibi dai tomarhi ix tumaxi oidaka agai gokiïrioma, tomarhi ix makïdï tïkadïrï daja tomarhi ix makïdï utadïrï daja, tomarhi ïmo ixtumaxi ix makïdï idui Diuxi ixtuidimu xi sobhidagi bai ka maiti gïr oigïadagi ïgai. Suxi Kristo Gïr Nukadakami ka bhai dui gïr bïïtarï dai xibi ka mai tipu ixtumaxi sobhidagi bai ka maiti gïr oigïadagi Diuxi. Ka bïïna daraja aatïmï Suxi Kristo Gïr Nukadakami kaxkïdï.

Daidi Diuxi Ibhïadï gïr soikïi ïpï xïïxkdï mai gubuakagi aatïmï. Ïïmo imidagai mai tïtïgai aatïmï ix tïiyagi aatagaitai Diuxi ïmadï. Dïï gia Diuxi Ibhïadï aijiïgïi daanïitai Diuxi gïr bïïtarï. Aagai ïgai naana maaxi ix makïdï mai tipu ñoki ixtukïdï aagagi ïmoko.

¿Ix tïiya ïrhidi aidï gïr bïitarï idi ix makïdï gïn aagidimi aanï idi ojiïrï? Diuxi ïgai dai gïr abhana kïïka dai gïr soikïi ¿aba? ¡Xadïrï ixtuidïna gïr buidïrï bïïtïkami gïr bui aidï!

Aa gia ïr buaboi gobai ix makïdï gïn aagidi aanï. Kaxkïdï xibi ka mai tipu gïgïbidaragai odami bïïtarï ix makïdï bïïnakami bii Suxi Kristo.

Gïr ïkidadï tïgibudagai go ïï mukigami gïr buapai xïxkadï gïr tïgito ajiopada aatïmï gobai. Dïï gia xïxkadï gïr tïgito ajiopada aatïmï ixtumaxi Diuxi Ibhïadï ipïrhidi aidï gia kïïgakïrï óídakana aatïmï dai kïïga ibhïxtakan taadakana.

Dïï gia tomax pobï buadagi gobai aatïmï tomax dukai gamaitïkami gïr oigïdaitai Suxi Kristo.

Kïïga maatï aanï sai bïïxi go soi ïrhiaragai ix makïdï taataimi aatïmï xibi maiti ïr ixtumaxi bhaitoma maatïkatai sai Diuxi gïr maaki agai ïmo bhai ïrhiaraga ix makïdï mai bhaiga xi aiyagi gïr tïgibudagai xi maatiagi.

¿Ix tuma sobhidana aidï bai ka maiti gïr oigïdadagi Suxi Kristo? ¡Tipu tomarhi ïmo ixtumaxi ix makïdï gasobhidagi bai ka maiti gïr oigïdada ïgai! Daiñi, tomaxi gïr aiyagi soi ïrhiaragai kabami, dai tomaxi soimaaxi taatagi aatïmï, dai tomaxi soi gïr buidadagi jaa gïr kïdaitai, tomax dukai tomaxi pobï gï buadagi bïïxkïrï mai sobhidamu gobai ix gïr oigïdada Suxi Kristo. Dai tomaxi taata aatïmï bhiugigai, dai tomaxi mai yukusukagi aatïmï, dai tomaxi gïr kodadagi omarhigami, tomax dukai mai sobhidamu ïgai bai ka maiti gïr oigïdadagi Suxi Kristo.

Diuxi kïï maatï ix tïtïitoi odami dai kïi maatï ïpï ix tïiya ïrhidi Diuxi Ibhïadï daanïitai gïr bïïtarï. Diuxi Ibhïadï daanïi ixtumaxi Diuxi ipïrhidi gïr bïïtarï tudu.

Bïïxi odami ix makïdï ïïgidi Diuxi Ibhïadï ïr Diuxi maamaradï.

Odami ix makïdï ïïgidi gïn ïkidadï tïgibudagai mosïkaxi gobai gïn tïgito ajiopaiña. Mos ïr pipioñigadï gïn dukamikana ïgai gïn ïkidadï tïgibudaga. Dïï gia ix makïdï ïïgidi Diuxi Ibhïadï, ïgai gia gïn tïgito ajiopaiña ixtumaxi gïn tïanïi Diuxi Ibhïadï.

Daiñi, Diuxi mai tudayitai gatïïgi ïïgi maradï sai mukuna gïr bïïtarï. Kaxkïdï kïïga maatï aatïmï sai gïr maakimu ïgai bïïxi aïkatai go gaa ixtumaxi ix makïdï bia ïgai gïr bïïtarï ïpï.

Xibi gïr iibhïdaga gïr aagidimi xi aatïmï ïr maamaradï Diuxi dai Diuxi Ibhïadï gïr aagidimi ïpï xi gia ïr buaboi gobai. Maamaradï aatïmï Diuxi tudu. Kaxkïdï xibi bïïxi go bhai ïrhiaraga ix makïdï Diuxi bhai darasakami bia Suxi Kristo bïïtarï ïr aatïmï gïr bïïtarï ïpï. Dïï gia gï agai xi soimaaxi taatagi aatïmï ïpïan dukai ix dukatai taata Suxi bai podukai gïr aiyagi ïmo xadutudaragai ïgai ïmadï ïpï.

Daiñi, Diuxi buidïrï bïïtï odami ix makïdï gïn tïgito ajiopai gïn ïkidadï tïgibudagai. Gïr ïkidadï tïgibudagai tomarhi ïmo imidagai mai ïïgidi Diuxi sïïrhikamigadï tudu. Maiti ixtutuidikïi gobai xi ïïgiadagi tudu.

Xibi bïïxi aïkatai ix makïdï Diuxi idui mos nïnïraka xi aiyagi ixtuigako xi Diuxi gatïtïïgiadagi ix maaxi ka agai maamaradï.

Kïi maatï aatïmï tudu sai bïïxi aïkatai ix makïdï ïr Diuxi duñidï mos aijiïgïi kia xibi dai kokokan taadakana ïpïan dukai ïmo oki xuduku buapa agadagi ïmo xïïñi.