Оятҳои маъмули Инҷил аз Romanos 5

Паҳн кунед

Dïï Kristo gia muu gïr bïïtarï aidïxi kia ïr soimaaxi ibuadamikatadai aatïmï dai podukai gïr tïtïgidi Diuxi xïï kïïga gïr oigïdai ïgai.

Dai xi buaboidaitai nïnïrakagi aatïmï xi Diuxi kïïgakïrï gïr bubiadagi aidï gia mai soi gïr ïrhiadamu aatïmï. Dai ïkobïrakoga Diuxi gïr maa Diuxi Ibhïadï dai ïgai gïr maatïturhimi gïr iibïdagïrï ix xïï kïïga gïr oigïdai Diuxi.

Dai xudu gïr aiyagi soi ïrhiaragai aatïmï mos bhai gïr ïrhidiña. Maatï aatïmï sai taatakai soi ïrhiaragai bamioma mamaatïrïi aatïmï xi dukatai mai dagitoagi xi gïr maitiagi soi ïrhiaragai. Dai xudu mai dagito aatïmï xi gïr maitiagi soi ïrhiaragai, aidï gia Diuxi pokaiti sai kïï odan tutuiga aatïmï. Dai xudu Diuxi potïiyagi sai kïï odan tutuiga aatïmï aidï gia bhai ïrhiarakïdï nïnïraka aatïmï xi Diuxi kïïgakïrï gïr bubiadagi.

Kïïga maatï aatïmï aidï sai Diuxi kïïgakïrï gïr nïidi buaboidaitai aatïmï. Suxi Kristo Gïr Nukadakami bhai dui gïr bïïtarï sai xioma uraba óídakana aatïmï Diuxi. Buaboidakai aatïmï Suxi Kristo baa aatïmï ïmo gïdukami bhai ïrhiaragïrï ix makïdï gïr maa Diuxi gïr oigïdaitai. Dai xibi bhai ïrhiarakïdï nïnïraka xi urabagi aatïmï Diuxi xudu gï maaxitudagi ïgai xïïxi ïr gïïdukami.

Suxi Kristo muu gïr bïïtarï aidïxi kia ïr gïpiïrï bïïtïkamikana aatïmï dai mai biakana aatïmï soiñi. Diuxi podukai dáí sai aidïpïrï mukiagi ïgai aidïxi kia ïr gïpiïrï bïïtïkamikana aatïmï.

Suxi Kristo aaxi ïradï gïr bïïtarï kaxkïdï xibi Diuxi kïïgakïrï gïr nïidi. Dai xi Diuxi kïïgakïrï gïr nïidi aidï gia ka maiti gïr ayimu gïgïbidaragai.

Go Adankaru soimaaxi ibuadami bia bïïxi óídakami tudu mai ïïgidakai ïgai Diuxi. Dïï Suxi Kristo gia ïïgidi Diuxi dai podukai bhai dui sai Diuxi kïïgakïrï nïijadana kïïga mui odami.

Dai ïkobïrakoga xibi Diuxi ïgai daidi ïr gïr bhai ïrhiaraga, ka bhai dunakai Gïr Nukadakami Suxi Kristo xi biakagi aatïmï urabaragai ïmadï Diuxi.