Оятҳои маъмули Инҷил аз Romanos 3

Паҳн кунед

Daiñi, Diuxi sïïrhikïdï kïï tuiga dai kïï tiodi dai bïïxi óídakami ïr soimaaxi buadami dai mai ajïi Diuxi. Dïï gia Suxi Kristo taata gïgïbidaragai gïr bïïtarï mos ïï kïï tuigakatai Diuxi. Kïïgakïrï gïr bubaitu ïgai gïr soimaaxkamiañdïrï. Aatïmï maiti gïr táí Diuxi tomarhi ïmo ixtumaxi. Suxi Kristo ïgai dai aa namïki bïïxi aïkatai ixtumaxi gïr bïïtarï.

Diuxi kïïgakïrï nïidi bïïxi odami bhaiyoma ix makïdï kïïgakïrï buaboitudai Suxi Kristo tomaxi ïr judiukagi ïgai xi maiti ïr judiukagi ïpï. Mos arhi ïmaduga boi bïïxi óídakami bïïtarï.

Mukukai Suxi Kristo kuruxiana Diuxi gïr tïtïgidi ixtuma gïgïbidaragai gïr ajïakatadai soimaaxi buadatai aatïmï. Ami kuruxiana Suxi aaxi ïradï bai oigïrhixikami biïna bïïxi buaboitudadami. Dai Diuxi gïr tïtïïgidi xïï sïïrhi aatabuadana ïgai ïïki abhiadïrï ïpï dai mai otoma bhamukuitai ïgai nïiditai soimaaxkami ix makïdï ibuadana óídakami ïkioma dai mai otoma gïgïbituldatai ïpï. Xibi Diuxi gïr tïtïïgida ïrhidi sai ïgai apia kia bïïxkïrï ibuayi ixtumaxi ïr sïïrhi. Gïgïbitudai ïgai ix makïdï soimaaxi ibuayi dai kïïgakïrï nïidi ïgai ix makïdï buaboitudai Suxi Kristo.

Odami mai bhaiga xi kïïgakïrï ïïgiadagi Diuxi sïïrhikamigadï tudu. Kaxkïdï maatiga maaxi sai Diuxi mai kïïgakïrï nïijada agai tomarhi ïmadutai mos ïïgiditai ïgai sïïrhikami. Ïgaikïdï gï mamaatïrïi bhaiyoma saidi ïr soimaaxi buadami aatïmï.

Diuxi ñokidï ikaiti, Mai tipu tomarhi ïmadutai ix makïdï sïïrhi aatabuayi. Mai tipu xorai maatïkagi ixtumaxi ïr sïïrhi, dai tomarhi ïmadutai mai gaagai urabaragai Diuxi ïmadï. Bïïxkatai kuga iji odami dai ka maiti ïr soiñi ïgai. Mai tipu xorai ibuadagi ixtumaxi ïr sïïrhi, tomarhi ïmadutai.

Kïïga maatiga maaxi tudu sai Diuxi kïïgakïrï nïidi odami buaboidaitai ïgai dai mai xu ïïgiditai ïgai go sïïrhikami.

Xadïrï maiti duna Diuxi idukatai aagagi ïgai. Diuxi mai yaatagïi tomaxi odami gia ïr yaatabogami bïïxkatai. Podukai tudu agai Diuxi ñokidï. Ami ikaiti sai, Bïïxkïrï buaboi aagai Diuxi. Xudu jaa gïpiïrï buaja ïrhiadagi Diuxi, ïgai gatïtïïgiada agai sai mai soimaaxi buayi ïgai, ikaiti go ojai.