Оятҳои маъмули Инҷил аз Apokalipsis 9

Паҳн кунед

Gïïpi naana maaxi daibusai soimaaxi tudu dai mui óídakami koi dïï modukai mai ïma dukai gïn tïtïgito go odami ix makïdï bitadai kia. Apia xadutudaiña ïgai ixtumaxi ibuadana ïïgi ïgai dukami oro dai plata dai bhronse dai odai dai asta uxi duñixikami uubixi. Xadutudaiña ïgai go diabora tïtïañikarudï tudu pomaaxi xadutudaitai uubixi maaxi ix makïdï mai duduaka. Go maaxi uubixi mai nïayi tudu dai mai kaidaga dai mai bhaiga imidagai ïpï. Dïï bïïxkïrï go odami maiti ipïrhi xi dagitoagi go uubixi dai Diuxi xadutuadagi bhaiyoma. Bhaiyoma ipïrhi ïgai xi apia gïn kodadagi aipakoga dai gaatabuidadagi dai gaïmadï bopodagi aipakoga dai gaïxiadagi jaa buxtuidadï. Tomaxi gïïpi soimaaxi daibusai modukai maiti ipïrhi ïgai xi ïma dukai gïn tïtïgitoagi tudu.

Dai abhai kubhuxiañdïrï bubuaka soosoyi dai tïapai oidigi daama mïtai maa ïgai gubukarhigai ix kïkïiya ïgai odami naakasorai dukai. Dïï gia ix makïdï maatadai gubukarhigai daidi xi soi buadagi odami ix makïdï ïr Diuxi tuidadï biakatai Diuxi seyogadï kobadïrï. Daidi ïgai xi soi buada ïgai tomax tuma tïdoidagai oidigi daama ïpï. Mai biakatadai ïgai oigaragai xi soi buadagi tomarhi ïmo uxi xiïpï basoi tudu. Mosïkaxi biakatadai ïgai oigaragai xi soi buadagi odami ix makïdï mai biakatadai Diuxi seyogadï kobadïrï.

Dai bhodïrï iba ïpï ïmo Diuxi tïañikarui trompetagadï dai aidïpïrï nïidi aanï ïmo xabugai xi oidigi daama daja. Gïitadai ïgai tïbagiañdïrï mïtai maa ïgai yabigadï go maixakarui ix makïdï ïr ïmo gïï tukabakami dïgai.

Biakatadai ïgai oigaragai xi kabami soimaaxi taatamiturhiadagi óídakami taama masadai kïïkai dai kïidï ïpïan taadaga naakasorai kïidï. Po buadamu go soosoyi dïï gia mai biakamu ïgai oigaragai xi kodagi odami.

Dai ïgai ix makïdï tïanïi go soosoyi ïr go galbaaxi ix makïdï gatïanïi go gïï dïgai ix makïdï ïr ïmo maixakarui. Abadón tïgidu ïgai Hebreokïdï dai Apolión tïgidu griegokïdï ix makïdï itïiya ïrhidi sai ïgai ïr gamuakami.