Оятҳои маъмули Инҷил аз Apokalipsis 14

Паҳн кунед

Daidi kaï aanï xi ño ixtumaxi tïbagiañdïrï daidi pobai in tïtïdai, —Iduindañi ïmo ojai dai adukai oja, —Xibi bhaitiakoga kïïga bhai gïn ïrhiadamu odami ix makïdï koiyagi bïïna darakatai Suxi Kristo, podukai oja aapi— antïtïdai. Dai Diuxi Ibhïadï ikaiti, —Ïjï kïïga ïr buaboi gobai. Ix makïdï koiyagi bïïna darakatai Suxi Kristo kaxi gïn iibhïxta agai. Ka mai tipukamu bïïtïkami aaduindagai ïgai bïïtarï. Kaxi aatadui ïgai tudu dai buimu ïgai go aaduindagai maitïkidï. Ka maiti gï agadamu bamioma aaduindagai tudu— ikaiti Diuxi Ibhïadï.

Dai go buaboitudadami óídaga saagida go gaa ix makïdï xadutudai go kïixi dai kaxkïdï gï agai buaboitudadami xi bhai gïn dukagi dai gïn kabakadagi sai mai dagitokai ïïgiada ïgai Diuxi dai sai apia buaboitudada ïgai Suxi Kristo.

Dai gïgïrï ñokimi aagaitai sai, —Xadutuadabïrai Diuxi mos ïï gïdukatai ïgai. Dai abïr aagada xïïxi ïr gïdukami ïpï. Karhioga ayi ix tuigako Diuxi maakiagai gïgïbidaragai soimaaxi ibuadami tudu. Dai kaxkïdï abïr oigïda ñokada Diuxi bui aagaitai xïï kïï tuiga. Ïgai tudu idui tïbagi dai oidigi dai go gïgïrï susudagi dai asta bïïxi go bapabiki xajadïrï busanïi go sudagi. Bïïxi aïkatai idui ïgai tudu kaxkïdï gï agai xi odami xadutuadagi ïgai— ikaitimi go Diuxi tïañikarudï.

Dai gokiïrï imïi go kugatïrï tïañikarudï Diuxi dai ïgai gïgïrï ñokai ïpï daidi ikaitimi, —Diuxi kabami gïgïbitulda agai xorai xadutuadagi go gïï kïixi xiïpï go ubixi ix makïdï ïpïamaaxi go kïixi. Gïgïbituldamu ïgai xorai gï dagitoagi xi gï tïpaltudagi kobadïrï xiïpï ïkadïrï. Diuxi soimaaxi taatamitulda agai ïgai kabami bhamukatai ïgai bui. Kïïga taatamu ïgai Diuxi bhamudadï tudu. Dai Diuxi bhamudadï mai biïna imimu toma lïïchi bhai ïrhiaragai aidï. Ïpïan taadakamu gobai xïïxkadï ïmo odami biakagi ix iiyagi ïmo iidagai kabami xibukami mai bïnaidikami toma lïïchi yoobikami. Kïïga taatamu ïgai Diuxi bhamudadï tudu. Diuxi soimaaxi taatamitulda agai táíkïdï dai asufre mïjïdamikïdï. Dai Diuxi tïtïañikarudï ïmadï go Arhi Kañiru bïïxi nïijadamu. Ami xako soimaaxi taatamitulda agai ïgai mos apia kubhusai bïïxkïrï bïïtarï. Dai ami mai tipu ibhïxtaragai. Apia imïdamu gïgïbidaradï bïïxkïrï bïïtarï tudu. Po maaxi ïgai bïïtarï ix makïdï xadutuadagi go kïixi xiïpï go ubixi ïpïamaaxkami go kïixi dai xorai gïn dagitoagi ix tïpaltudagi ïpï tïtiaradïkïdï xiïpï numerogadïkïdï— ikaitimi. Podukai aiturhi ñoki tïañikarudï Diuxi go óídakami aipakoga oidigi daama.

Dai bhodïrï tïï aanï go Arhi Kañiru agaikïdï xi kïïka go gidiana xako Sión tïgidu gidi. Dai ïmadï gukatadai mui odami ix makïdï kokobadïrï ojixi tïtiaradï go Arhi Kañiru dai tïtiaradï Ogadï ïpï. Ïmo ciento dan gokobhai dan maakoba mirhikatadai ix makïdï ami guka.

Dai bhodïrï tïï aanï ïmo Diuxi tïañikarudï xi tïkabi tïbagiañdïrï daigigi. Mïkadïrï imïdami ïgai dai aitulda agai ïmo bhai ïrhiaragai ñoki go óídakami oidigi daama. Aitulda agai go ñoki bïïxi go naana maaxi ñokadami ix makïdï bïïxi aipakoga oidaga oidigi daama tudu. Dai go ñoki ix makïdï aagai ïgai bïïxkïrï bïïtarï kïïgaduka agai.

Daidi gokiïrï imïi ïpï ïmai tïañikarudï Diuxi dai idi gïgïrï ñokai ïpï daidi ikaitimi, —Ka xia tui go gïï Babilonia kiiki. Ami óídakami gia pupuirugakana. Sïïrhikïdï ojoidi ïgai xi adaimudagi soimaaxi dai abïnakidiña odami bïïxi apakoga oidigi daama óídakami sai urabana soimaaxi ibuadatai. Ïpïan buadana ïgai ïmo iitïrakami xïxkadï abïnakidada ïgai jaa sai soiña yïïdana iidagai— ikaitimi ïgai.