Оятҳои маъмули Инҷил аз Hebreos 4

Паҳн кунед

Daiñi, bïïxi ñoki ix makïdï aagadagi Diuxi kïïga bia gubukarhigai sai bapakiagi gïr ïrana dai kïïga iduñagi aaduindagai. Bamioma kïïga bapakïi gobai gïr ïrana xi bhai ïmo kuxirui tomaxi bïï goka padïrï biakagi go kuxirui mumukahigadï. Ïmo kuxirui kïïga mukakami bhaiga xi bakiagi odïrï ukami dai maigobai dasagi asta obagadï. Dïï gia Diuxi ñokidï gia bapakïi gïr ïrana dai ajïi gïr ibhïdagïrï ukami dai gobai gïr aagidi ix bhai kïïgadu gïr tïgibudaga. Diuxi ñokidï gïr aagidi ïpï ix bhai kïïgadu ixtumaxi ibuada ïrhidiña aatïmï.

Dai kaxkïdï ïpï gï agai xi mai duduadikoitai daanïda aatïmï Diuxi kïïga ïïmadan dukai. Kïï tuiga ïgai gïr bïïtarï tudu dai daanïkai aatïmï gïr tïïgidamu ïgai xïï soi gï ïrhidi ïgai gïr bïïtarï gïr soikïitai xïïxkadï tïgitokagi aatïmï.

Daiñi, aatïmï óídakami sïïrhikïdï mai gupuka go soimaaxkami buidïrï. Dai kaxkïdï tïgito aatïmï xorai gïr soikïdagi. Dai Suxi Kristo ïgai dai gïr soikïi gabhaitïkïakami dadaxdamikatai ïgai. Dai ïgai kïïga maatï xïï mai gupuka aatïmï. Kïïga maatï ïgai ix taadaga xïïxkadï gïr tïgibudaga gïr abïnakiadagi ix mai kïïga ïïgiada aatïmï Diuxi tudu. Bïïxi taata ïgai gobai ix xïïxi taatamaiña aatïmï tudu. Dai tomaxi pomaaxi taata ïgai bïïxkïrï mai soimaaxi idui ïgai tomarhi ïmo imidagai. Dai bïïxkïrï ïgai tomaxi mai soimaaxi idui bïïxkïrï soi gïlda gïr nïidiña ïgai mai gupukatai aatïmï. Ïmo oidigi daama oidakami odami ïgai ïpï kaxkïdï.

Mai tipu ixtumaxi ïxtokikagi Diuxi buitapi tudu. Bïïxi aïkatai mos maaxiko kaatïkana Diuxi buidïrï. Dai ïgai buitapi bia aatïmï xi aagadagi ix tumaxi dui aatïmï tami idi oidigi daama.

Dïï gia Suxi Kristo ïr gabhaitïkïakami dadaxdadami gïr bïïtarï, ïgai tudu ix makïdï ïr Diuxi Maradï. Dai ka ayi ïgai amïka buidïrï Diuxi dai ami bhai dui gïr bïïtarï mai kïï ibuadatai aatïmï. Kaxkïdï gï agai xi mai ugutai aagada aatïmï gïr buaboidaraga aipakoga.

Gï agai xi kïïga gïr tïgito nïidagi aatïmï tudu daidi bhïiyagi go ibhïxtaragai ix makïdï bia Diuxi gïr bïïtarï. Tadu mai ïïgidi aatïmï Diuxi ïpïan dukai go Israelitas ïïki. Xi pobuadagi aatïmï aidï gia xia gïr duadamu aatïmï ïpï ïpïan dukai ïgai.