Оятҳои маъмули Инҷил аз Efesios 5

Паҳн кунед

Aapimï ïr maamaradï Diuxi dai kïïgakïrï gïn oigïdai ïgai. Kaxkïdï abïr ïpïan dukai ibuada Diuxi. Kïïga abïr oigïada jaa aidï. Daiñi, Suxi Kristo gïr oigïdai kaxkïdï ïïgi gï dagito ïgai sai gï muatudana ïmo daxdaragai dukai. Podukai bhai dui ïgai gïr bïïtarï soimaaxi idunakai aatïmï. Dai Diuxi kïï bhai ïlda tïï Suxi Kristo daxdaradï. Kïï xigian dukai ubagi ïgai.

Kaxkïdï abïr kïïga gïn tïgito nïida mïx dukatai óídaga. Maiti abïr ïpïan dukai óídaka pupuirugami ix makïdï mai maatï tomarhi ïmo ixtumaxi tudu. Bhaiyoma abïr óídaka kïïga sïïrhiñikami biakatai gïn tïgibudaga. Kabami abïr gïn aga ibuadatai ixtumaxi ïr kïïga. Arhiïxi ïr soimaaxi buadami xibi óídakami kaxkïdï.

Maiti abïr nabaakorïda. Gobai mos xia buayi odami. Bhaiyoma abïr gïn dagito xi gïn tïanïdagi Diuxi Ibhïadï. Dai xudu gïn aatagiadagi aapimï abïr aagada ix kaiti go Salmos nïidadï ïmadï jaa nïidadï Diuxi ïpï. Bïïxi gïn ibhïdagakïdï abïr ganïyi Diuxi bïïtarï oigïda ñokaitai ïgai bïïtarï. Bïïxkïrï dai bïïxi aïkatïrï abïr aagida Diuxi gïr Oga xïï bhai gïn ïrhidi aapimï ïgaikïdï. Daidi abïr aagada ïpï sai Suxi Kristo ïgai dai bhai dui gïn bïïtarï xi kaxkïdï aatagïi aapimï Diuxi ïmadï.

Maiti abïr bupuiruaka aidï daidi abïr gïn aajagïda dai maatiagi ix tumaxi ipïrhidi Diuxi xi buadagi aapimï.

Dai aapimï kïkïïrhi abïr oigïada gïn oñiga ïpïan dukai xi Suxi Kristo gïr oigïdai aatïmï ix makïdï ïr buaboitudadami. Ïïgi gï dagito ïgai xi gï muatudagi gïr bïïtarï gïr oigïdaitai tudu.

Ïkioma aapimï mos ïr ïï tukamudagaikana dïï xibi gia ïr kudagi aapimï buaboidakai Gïr Nukadakami. Kaxkïdï abïr bhai maaxkami dukai óídaka dai kïïga maaxituda xi gia ïr kudagiïrï óídakami aapimï xibi.

Aapimï buaboitudadami kïïga abïr bhai aagada aapimï ix gïn ïïgiadagi aapimï aipakoga. Kïïga xadutuadamu aapimï Suxi Kristo pobuadatai.

Aapimï oki abïr ïïgiada gïn kukuna maatïkatai sai podukai ïïgidimi aapimï Gïr Nukadakami.

Dïï go ñoki mai xu mosïkaxi aagadankaiti Suxi Kristo ïmadï aatïmï buaboitudadami. Aagadankaiti gobai aapimï kïkïïrhi ïpï dai gïr maatïturhi gobai sai gï agai xi oigïada aapimï gïn oñiga ïpïan dukai xi gïn oigïdai ïïgi aapimï. Dai podukai aapimï oki ïpï gï agai xi xadutuadagi gïn kukuna ïpï.

Kaxkïdï Diuxi ñokidïrï ikaiti sai, Kïkïirhi daadagitoi dïïdï dai ïmadï bipiïyi oki dai aidï abhiadïrï ïmo odami dukamikana ïgai, ikaiti Diuxi ñokidï.

Maiti abïr urapïkïda ix makïdï soimaaxi ibuayi. Ïgai ibuayi ixtumaxi maiti ïr soiñi dai aapimï maiti gï agai xi pomaaxi ibuadagi. Bhaiyoma abïr maakada ïgai ñoki dai kïï maaxiko biada ix makïdï ïgai buayi.