Оятҳои маъмули Инҷил аз 1 Juan 4

Паҳн кунед

Gin aaduñi, Diuxi ïmadï aatïmï aipakoga gïr ojoigïdai dai kaxkïdï mai tipu duadimudagai gïr bïïtarï. Xadïrï duduadikuiña aatïmï gïr oigïdatai Diuxi tudu. Dïï gia xi ïmoko ïbhiadagi Diuxi gobai itïiya ïrhidi sai ïgai po gï ïrhidi sai Diuxi gïgïbitulda agai. ¿Ïma dukai ix tuixidï ïbhïidiña ïgai Diuxi? Ix ïbhiadagi ïmoko Diuxi gobai itïiya ïrhidi sai mai kïïgakïrï oigïdai ïmoko tudu.

Gin aaduñi, maamaradï aapimï Diuxi dai kïïga gïn oigïdai aanï. Dai maiti gïn dagito aapimï ix gïn bupuirumadagi go gatïtïïgiadami yaatagi. Mai bhïiyi aapimï buaboidaradï ïgai tudu. Diuxi gïn ïmadï daja kaxkïdï. Dai ïgai bamioma gubuka xi bhai ïgai ix makïdï ïmadï daja go odami ix makïdï mai buaboitudai. Bamioma gubuka Diuxi xi bhai go diabora tudu.

Daiñi, Diuxi ka ïïki abhiadïrï gïr oigïdaiña kaxkïdï oigïdai aatïmï ïgai ïpï dai kaxkïdï oigïdaiña aatïmï gïr aaduñi Diuxi amadïrï ïpï.

Gin aaduñi, kïïga gïn oigïdai aanï dai ipïrhidi aanï saidi gïn ojoigïadagi aapimï aipakoga ïpï. Daiñi, mosïkaxi Diuxi ïgai dai buaboikïdï oigïdai jaa dai mosïkaxi Diuxi ïgai dai gamamaakai gubukarhigai óídakami saidi gïn ojoigïadagi ïgai ïpï. Kaxkïdï gï maatï saidi ïr maamaradï Diuxi go odami ix makïdï buaboikïdï oigïadagi jaa. Dai podukai gï maatï ix bhai kïïga maatï ïgai Diuxi ïpï.

Kïïga gï maatï tudu saidi odami ix makïdï mai oigïdai jaa mai maatï Diuxi. Diuxi ïgai dai buaboikïdï oigïdai óídakami kaxkïdï.

Tomaxi mai oigïdaitadai aatïmï Diuxi ïgai gia bïïxkïrï gïr oigïdai dai otoi Maradï sai mukuna ïmo daxdaragai dukai. Podukai gïr buañidi ïgai gïr soimaaxkamiga tudu. Agia gïr oigïdai Diuxi dai pomaaxi idui gïr bïïtarï.

Kïïga gïr oigïdai Diuxi tudu gin aaduñi. Dai kaxkïdï gï agai ix aipakoga gïr ojoigïadagi aatïmï ïpï.

Daiñi, mos arhi ïmaduga go Maradï Diuxi dai bïïxkïrï otoi Diuxi tami oidigi daama sai bhai buadana ïgai ixdukatai kïïgakïrï óídakagi aatïmï bïïxkïrï bïïtarï. Podukai gïr tïtïïgidi Diuxi xïïxi kïïga gïr oigïdai ïgai tudu.

Ix pokaitadagi ïmoko sai oigïdai ïmoko Diuxi dïï gia ix kïïdadagi ïgai aaduñdï Diuxi amadïrï aidï gia yaatagïi ïgai dai maiti ïr buaboi ix oigïdai ïgai Diuxi. Mai oigïdai ïgai tomarhi go aaduñdï ix makïdï kïïga nïnïidiña ïgai tudu. Dai kaxkïdï ¿ixdukatai oigïdaiña ïgai Diuxi ix mai nïidi ïgai tomarhi ïmo imidagai di?

Dai bïïxkatai ix makïdï pokaitadagi sai Suxi ïr Diuxi Maradï ka urabaka Diuxi dai Diuxi ïgai ïmadï daja.

Diuxi gïr maa ïmo sïïrhikami tudu ix makïdï ikaiti sai, —Odami ix makïdï oigïdai Diuxi gï agai ix oigïdada aaduñdï Diuxi amadïrï ïpï— ikaiti go sïïrhikami.

Gin aaduñi, mui odami aipakoga óídakami ikaitiña sai ïgai ïr ñiñokituldiadamigadï Diuxi dai yaatagïiña ïgai. Maiti gï agai sai buaboitudadagi aapimï tudu. Gï agai bhaiyoma sai kïïga gïn tïgito kaïkagi aapimï dai maatïkagi xorai tïgibudadïkïdï ñokai ïgai. Ix bhai Diuxi Ibhïadïkïdï ñokai ïgai xi ïmai tïgibudadïkïdï ïpï. Gïn aagidamu aanï ix dukatai maatïkagi aapimï ix bhai Diuxi Ibhïadïkïdï ñokai ïgai. Daiñi, gï agai ix gatïtïïgiadagi ïgai goka ñoki. Gï agai ix gatïtïïgiadagi ïgai saidi Suxi Kristo ïr Diuxi otosadï, dai gï agai ix gatïtïïgiada ïgai ïpï sai kïïga gï tukugatu Suxi gïr ïpïan dukai. Ix podukai gatïtïïgiadagi ïgai aidï gia gï maatï sai Diuxi Ibhïadï podukai aagidi ix gatïtïïgiadagi ïgai.

Dïï gia xi pokaitadagi ïgai sai Suxi Kristo maiti ïr Diuxi otosadï aidï gia bia ïgai tïgibudadï go buidïrï kaatïkamigadï Suxi Kristo. Kaxi kajioma aapimï saidi dibiagai go buidïrï kaatïkamigadï Suxi Kristo tudu. Dai aanï agai sai ka aimïrai ïgai tami oidigi daama.