Оятҳои маъмули Инҷил аз 1 Juan 2

Паҳн кунед

Gin aaduñi, maiti abïr ïpïan tïtïïgitoda go gaa oidigi daama óídakami ix makïdï mai buaboitudai. Maiti abïr po gïn ïrhiada sai tïïgimu aapimï gïn bhai ïrhiaragai oiditai tïgibudadï ïgai tudu dai maiti abïr adaimuda ixtumaxi oidaga tami idi oidigi daama tudu. Daiñi, odami ix makïdï pobuadagi mai oigïdai Diuxi. Tami oidigi daama óídakami bhaibitukami biaka ïrhidiña naana maaxi ixtumaxi dai naana maaxi ibuada ïrhidiña ïpï. Mos nïidiña ïgai ixtumaxi dai ka biaka ïrhidiña tudu. Dai bhodïrï gïgïrdukïdï gïn ïrhidiña ïgai biakatai naana maaxi ixtumaxi. Dïï gobai gia maiti ïr tïgibudadï Diuxi. Oidigi daama óídakami tïgibudadï gobai bhaiyoma.

Daiñi, ugiti agai go oidigi ïmadï modukai bïïxi ixtumaxi oidaga oidigi daama ix makïdï biaka ïrhidiña óídakami. Dïï gia xorai ïïgiadagi Diuxi ïgai gia mai ugiti agai dai bhaiyoma oidaka agai bïïxkïrï bïïtarï.

Ix pokaitadagi ïmoko sai urabaka Diuxi aidï gia gï agai sai ïpïandukai oidakagi ïgai Suxi Kristo ïma dukai yaatagïi ïgai tudu.

Aapimï gin maamara Diuxi amadïrï, gïn soiña in ïrhidi aanï sai mai soimaaxi ibuada aapimï dai kaxkïdï gïn otoxdi aanï idi ojai. Dïï gia xïduñada soimaaxi ibuadagi ïmadutai aatïmï, aidï gia kïïga maatï aatïmï sai bia aatïmï xorai gïr soiñagi dai gïr ñokituldagi Diuxi buitapi. Ïgai ïr Suxi Kristo ix makïdï kïïga buañixi ibhïadï.

Yaatagi tudu ix pokaitadagi ïmoko sai kïïga maatï Diuxi daidi mai ïïgiadagi.

Daiñi, bïïxi odami ix makïdï kïïga maatï Diuxi dai kïïga bia urabaragai ïgai ïmadï kïïga ïïgidiña ïpï. Dai ix mai ïïgiadagi ïgai, aidï gia gobai itïiya ïrhidi sai mai kïïga maatï dai mai kïïga urabaka ïpï. Podukai gï maatï ix bhai kïïga maatï ïmoko Diuxi dai ix bhai kïïga bia urabaragai ïgai ïmadï tudu.

Daiñi, xi po kaitiadagi ïmo odami saidi kïïga kudaidaka maaxi oidakaradï dïï gia ix mai oigïdadagi ïgai aaduñdï Diuxi amadïrï, aidï gia apia kia tukapi dukai oidaga ïgai bhaiyoma. Ïgai mai maatïkana ix dukatai oijadagi oidakaradï tukapi dukai kaatïkatai bogïdï. Dïï gia xorai oigïadagi aaduñdï Diuxi amadïrï, ïgai gia ïr kudagiïrï dukai oidakami. Ïgai gia tomarhi ïmo imidagai maiti ibuadana ixtumaxi ixtukïdï gïpiïrï gïxiagi dai tomarhi maiti ibuadana ïgai ixtumaxi ixtukïdï gïpiïrï surhigidagi ïgai jaa ïpï.

Dai kïïga ïr yaatabogami ïgai ix makïdï pokaitadagi sai Suxi Kristo maiti ïr go Tïanïdami ix makïdï otoi Diuxi tami oidigi daama. Buidïrï bïïtïkamigadï ïgai Suxi Kristo tudu ix makïdï pokaitadagi sai Suxi Kristo maiti ïr Maradï Diuxi. Ix pokaitadagi ïgai aidï gia gobai itïiya ïrhidi sai mai buaboitudai ïgai Suxi Kristo dai tomarhi Ogadï ïpï.

Bïïxi odami ix makïdï pokaitadagi sai Suxi Kristo maiti ïr Maradï Diuxi ïgai mai urabaka Diuxi. Dïï gia xorai maaxiko aagagi sai buaboitudai ix Suxi Kristo ïr Maradï Diuxi, ïgai gia urabaka Diuxi.