Popular Bible Verses from जोहन्‍ना 6

Паҳн кунед

ईशू बोलअ तिन्‍नां लै, “हुंह आसा ज़िन्दगी दैणैं आल़ी रोटी, ज़ुंण मुंह सेटा एछे, सह निं कधि भुखअ रहणअ, अर ज़ुंण मुंह दी भरोस्सअ करे, सह निं कधि नचिशअ रहणअ।

“आत्मां आसा ज़िन्दगी दैणैं आल़ी, देही करै निं कोई फाईदअ, ज़ुंण गल्‍ला मंऐं तम्हां का बोली तिंयां आसा आत्मां बी अर ज़िन्दगी बी।

“खतम हणैं आल़ी रोटी लै निं मैन्थ करा। पर तैहा रोटी लै करा मैन्थ ज़ुंण सदा रहणैं आल़ी ज़िन्दगी तैणीं रहा। ज़ुंण तम्हां लै मुंह मणछे पूता दैणीं। किल्हैकि बाब परमेशरै आसा मुंह दी ई मोहर लाई दी।”

“ज़ुंणी हुंह संसारा लै छ़ाडअ, सह च़ाहा इहअ कि ज़ुंण पूता भाल़े, अर तेऊओ विश्वास करे, तेऊ लोल़ी सदा रहणैं आल़ी ज़िन्दगी भेटी। मुंह करनअ सह प्रल़या हणें धैल़ी खिरी भिई ज़िऊंदअ।”

ईशू बोलअ तिन्‍नां लै, “तम्हां लै आसा परमेशरो एक्‍कै काम कि ज़ुंण तेऊ छ़ाडअ द आसा, तेऊ दी करा विश्वास।”

ज़हा मेरअ बाब परमेशर मुल्है दैए, सह एछणअ मुंह सेटा लै, तेऊ निं हुंह कधि बागै काढदअ।

तेखअ शमौन पतरासै ईशू लै ज़बाब दैनअ, “हे प्रभू, हाम्हैं कहा सेटा लै च़ाल्‍लै डेऊई? सदा रहणैं आल़ी ज़िन्दगीए गल्‍ला आसा ताह सेटा ई।

“ज़िन्दगी दैणैं आल़ी रोटी ज़ुंण स्वर्गा का आसा आई दी, सह आसा हुंह। ज़ुंण बी ऐहा रोटी का खाए, सह रहणअ सदा ज़िऊंदअ अर ज़ुंण रोटी मुंह संसारे ज़िन्दगी लै दैणीं, सह हणअ मेरअ मास्स।”

मुंह सेटा निं ताऊं तैणीं कोहै एछी सकदअ ज़ांऊं तैणीं मेरअ बाब परमेशर तेऊ मुंह सेटा लै नांईं आणे, ज़ुंणी हुंह छ़ाडअ द आसा। ज़ुंण मुंह सेटा एछे, सह करनअ मुंह खिरीए धैल़ी ज़िऊंदअ।

“किल्हैकि परमेशरे रोटी आसा सह ई ज़ुंण स्वर्गा का होथी संसारे मणछा लै ज़िन्दगी दान दैआ।”

ज़िन्दगी दैणैं आल़ी रोटी आसा हुंह।

ईशू ढाकी रोटी आपणैं हाथै संघा बांडी परमेशरो शूकर करी लोगा लै घेहल़ी अर म्हाछ़ली बी बांडी ज़ेतरी तिंयां च़ाहा तै। ज़ांऊं लोग खाई करै रज्ज़ै, ईशू बोलअ आपणैं च़ेल्‍लै लै, “पिछ़ू बच़ी दी रोटी करा कठा, ढेक्‍का निं शोटी।”

तिंयां पुजै किश्ती च़लाऊंदी कोई च़ार पांज़ मील समुंदरा मांझ़ै। तिन्‍नां का शुझुअ ईशू समुंदरा मांझ़ै पाणीं प्रैंदै हांढदअ अर किश्ती बाखा लै एछदअ अर तिंयां डरै। पर ईशू बोलअ तिन्‍नां लै, “हुंह आसा, डरा निं आथी।”