Popular Bible Verses from YAHYA 15

Паҳн кунед

Tiang niki lolo anggur, dait side pade pémpang-pémpangne. Dengan saq tetep ndot léq dalem Tiang, dait Tiang léq dalem ie, ie bebuaq luwéq; séngaq lamun ndéq léq dalem Tiang, side ndéq tao piaq napi-napi.

Tetep ndot léq dalem Tiang dait Tiang éndah tetep ndot léq dalem side pade. Pade maraq pémpang ndéqne iniq bebuaq léman diriqne mésaq, kecuali lamun ie tetep léq lolone. Maraq nike éndah halne side pade ndéq gen bebuaq, lamun side pade ndéq ndot léq dalem Tiang.

Lamun side pade ndot léq dalem Tiang dait manik Tiang ndot léq dalem side, pade tunas napi juaq saq side mélé, dait side gen nerimaq ie.

Ndéq side pade saq miléq Tiang. Laguq Tiang saq miléq side pade dait Tiang sampun netepang side pade lumbar dait ngasilang buaq dait buaqde nike ndéq iniq binase, adéq napi saq side tunas tipaq Bapa kadu aran Tiang, icanin-Ne tipaq side.

Ndéq araq kasih saq beléqan léman kasih sopoq dengan saq réde nyerahang nyawene umaq sahabat-sahabatne.

Sebilang pémpang saq araq léq Tiang saq ndéq bebuaq, peleng-Ne dait sebilang pémpang saq bebuaq tekurangin daunne dait persiq-Ne adéq luwéqan malik buaqne.

Niki préntah Tiang: Pade kasihin sopoq kance saq lain, pade maraq Tiang ngasihin side pade.

Lamun side pade bebuaq luwéq, Bapa Tiang temulieang; dait siq care nike side tetu-tetu pengiring Tiang.

Deside Isa bemanik malik, “Tiang lolo anggur saq sejati, dait Bapa Tiang nike penggarapne.

Dengan saq ndéq tetep ndot léq dalem Tiang, gen tetetéh maraq pémpang, beterus jari gero. Pémpang-pémpang saq maraq nike gen tekumpulang dait tetetéh ojok dalem api, beterus tesedut.

Selapuqne niki Tiang sampéang tipaq side pade, adéq sukecite Tiang araq léq dalem aténde, dait sukecitende jari sempurne.

Lamun side pade turut préntah-préntah Tiang, side pade gen ndot léq dalem kasih Tiang, pade maraq Tiang sampun turut préntah-préntah Bapa Tiang dait ndot léq dalem kasih-Ne.

Niki préntah Tiang léq side: Pade kasihin sopoq kance saq lain.”

Seandéne side pade léman dunie side pade gen tekasihin siq dunie jari dowéne. Laguq Tiang sampun piléq side pade léman dunie niki, jari side pade ndéqne malik dowén dunie. Keranaq nike dunie meriq léq side pade.