Popular Bible Verses from 1 Timoteo 6

Паҳн кунед

Tjajo̱nko̱a kaín ti nkehe jehya jína la ko kaín a̱sán tinkachónkia Ìnchéni kixin tsjacha tsꞌayéhé ti kjuachón nkochríxín kixin xi̱kaha kꞌuéyaha Díos la ó tsíchro̱nka chꞌan kixin tsinkachónkia Ìnchéni la ó kuíhin ko kꞌuíkon itsjé chojni.

Kixin ti imá tsotjinkaoni ti chichaon la tíha tsji̱xi̱n kaín ti nkehe jínahña, la nkojín sin la imá tjenka̱yáxin sin tsochónta sin itsjé chichaon ndá xi̱kaha sákjuichroe sin, í tinkáchónkihya sin Ìnchéni la tíha mé kjuasótexín sin.

Chaxín ti tinkáchónkini Ìnchéni la tsjachani ijnko nkehe imá tjete, kjánchó kjuaxróxin chrókꞌuejóni kjónté ti nkehe chóntani ó.

Kixin ti kꞌokjíhini la ninkehó kjuikohyani chjasintajni, la ko ti ó itsꞌeni la ninkehó nkehe xrokuahya sátsji̱koni.

A̱ndá ti sin chónta itsjé nkehe tjete, la ndáche sin kixin sinchenkehya sin, la ko tétue̱hén sin kixin tsjenka̱yáxinhña sin kixin ti nkehe tjete chónta sin tsaáxin sin kixin nkochríxínhña tsochónta sin tíha. Ícha jína chrókuinkáchónki sin Díos tjechón kixin jehe chꞌan tsjajon chꞌan kaín nkehe kixin tjinkaon chꞌan kjuaxróxin tsꞌejóni.

Kixin ti sin tjinkaon tsochónta itsjé nkehe tjete la tsjachahya sin tsꞌatsínka sin ti kjuaxróxinhña itsi la xi̱kaha sátjichroe sin la tsꞌitsínka sin kixin itsjé nkehe jehya jína tjinkaon sin, la tíhi tsꞌitjáñaxín sin.

La ndáche sin kixin tsjenka̱yáxin sin ti nkehe jína, la ko sichꞌe sin ixra̱ jína, la tsjinki̱tsa sin ti nkexro chóntahya la ko chrókꞌóxika̱yehe sin ti nkehe chónta sin. Ndá xi̱kaha chrókjuacha sin ti nkehe tjete kixin chrꞌéxi̱n la jína chrókꞌuejó sin la chrókjuacha sin chróchónta sin ti kjuachón nkochríxín.