Jer 26
26
X'och chaml 'a yib'n̈ Jeremías
1A yic x'el yich ya'n Joacim win yunnal Josías reyl 'a Judá, ata xpaxtin pax Jehová 'ayn an Jeremías in tic. 2'Ix yaln 'ixtic: Ata tzach 'aj lin̈n 'a yamq'uil watut, tzlajw cha, tzaln smasnil tas tzwac' al 'a smasnil eb' 'anma tzcot 'a Judá, yic tzwul ya'nc 'ejm sb'a eb' 'a watut an Jehová in. May junc paxti chi matz ala. 3Toq'ue tzchaj eb' yab'i', ax yactn can eb' stu b'eyb'al. To 'ixta', man̈x 'oj wa' cot yailal xin nalb'ej wa'n 'och 'a yib'n̈ eb' yuj smaysch'olnilal cha. 4Tzal 'a eb', chajtlto an Jehová in, an tzwal 'a eb' 'ixtic: Ax tic ma'ix e chaj eyab' in paxti', ma'ix eyiclj smasnil cuynb'il 'ix wal 'ayex. 5Ma'ix e chaj eyab' pax tas xwac' yal eb' in checab', caw niwn 'ejm yaljnac eb' 'ayex, atn jun tzo'n̈ an̈ja matz e chaj eyab' ticnec. 6Toto an̈ja ma'oj eyicloc, to 'ixta', 'ixtc 'oj wutc can watut 'icha wutjnac jun in cajnub' 'a Silo. 'Oj wa' cot catb' 'a yib'n̈ jun chon̈b' tic 'a scal smasnil nacion̈ 'ay yolyib'n̈q'uinl tic, xchi Dios, xa chi 'a eb', xchi 'ayin.
7A eb' ya'mal 'och sti eb' 'anma 'a Dios, yet' eb' tzyalch sb'a schecb'oc Dios, yet' smasnil eb' chon̈ab', 'ix yab' eb' waln jun tzo'n̈ paxti cha, yic 'ayn 'ec' 'a yamq'uil yatut Dios. 8A yic xlajw waln 'el smasnil tas 'ix 'ajx wal yuj Jehová, in syamn cot eb'. 'Ix yaln eb' 'ixtic: Wal a cham tic, 9¿tas wal yuj xa te'wtzej a b'a aln 'a sb'i Jehová, chajtlto a jun yatut Dios tic, lajn 'oj 'ajcn 'icha 'ajnc jun scajnub' 'ay 'a Silo? 'Ix aln paxi to 'oj lajwc 'ejm jun chon̈b' tic, man̈x 'a junc 'anma 'oj can cajn 'a 'a, xchi eb'. Smasnil eb' chon̈b' cha, 'ix jaw eb' 'a yatut Dios cha, 'ix 'och oyn̈joc eb' yac' owl wet'oc.
10A yic 'ix yab'n eb' yajl yaj 'a chon̈b' Judá yuj tas 'ix uji, 'ix cot eb' 'a sdespacho win rey, 'ix 'at eb' 'a yatut Dios. A 'a jun puerta 'a'to, ata x'em wocn eb'. 11Xlajw cha, ax eb' ya'mal 'och sti eb' 'anma 'a Dios, yet' eb' tzyalch sb'a schecb'oc Dios, 'ix yaln eb' 'ixtc 'a eb' yajl cha, yet' 'a eb' chon̈b' chi smasnil: A wal jun winc tic, yowlal 'oj chamoc, yujto 'ix yala, to 'ay tas tu 'oj jawc 'a yib'n̈ qui chon̈b'ec tic. Ax tic caw 'ix eyab' tas 'ix yala, xchi eb'.
12Xlajw cha, in paxtin 'a eb' yajl cha, yet' 'a eb' chon̈ab', 'ix waln 'a eb' 'ixtic: A Jehová x'a'n wal jun tzo'n̈ xeyab' waln 'a eyib'an̈ yet' 'a jun yatut Dios tic, yet' 'a yib'n̈ jun chon̈b' tic. 13B'oc e b'eyb'al, yiclum tzeyutj e b'a 'a Jehová qui Diosalec, sec ma'oj ya' cot jun tzo'n̈ yailal xwal-l 'a eyib'n̈ cha. 14Aln pax an tic, 'ayn 'ec' a' yol e c'ab'. Tztac' e b'on tas tze nib'j e b'o 'ayin. 15Palta 'ojquejec 'el wal jun tic si'mb'il: Toto ax tic yet' eb' 'anma tic, tzin e mil chamoc, 'oj 'och jun tic e muloc, yujto tze mil cham jun mach to may jac smul. Yujto caw yel, a Jehová x'a'n wal-l smasnil jun tzo'n̈ paxti xwala, xin chi.
16Yuj cha, 'ix yaln eb' yajl cha, yet' eb' chon̈b' chi 'a eb' ya'mal 'och sti eb' 'anma 'a Dios, yet' 'a eb' tzyalch sb'a schecb'oc Dios: Man̈ smojc tzcham jun winc tic, yujto a 'a sb'i Jehová qui Diosalec 'ix paxtin 'ayn̈ec, xchi eb'.
17'Ay jun tzo'n̈ eb' yichmtac wincal chon̈ab', 'ix q'ue wan lin̈n eb', 'ix yaln eb' 'a eb' chon̈b' yamn yaj chi ta', xyaln eb' 'ixtic: 18A 'a yol stiempoal Ezequías sreyl Judá, a Miqueas 'aj Moreset, 'ix paxtin 'el 'a sb'i Jehová 'a smasnil eb' chon̈b' 'a Judá, 'ix yaln 'ixtic:
A Jehová, tztac' yuj smasnil, a tzaln 'ixtic: A chon̈b' Sión tic, 'oj cancn lum yico'oc munljel. A Jerusalén jun b'uln̈ 'oj 'aj slan̈chj can 'ejmi, ax jun tzaln 'aj b'ob'il watut, waymtac xoj 'oj 'ajcni, xchi Dios, xchi Miqueas cha.
19Toc yuj cha, 'ix milx cham Miqueas yuj win rey Ezequías, yet' yuj smasnil eb' chon̈ab'. A yic eb', to 'ix xiw eb', 'ix leslwi eb' 'a Jehová, sec tz'o'ch sc'ojl 'a eb'. Yuj cha, man̈x 'ic ya' cot Jehová jun yailal tox 'ix alx 'el 'a yib'n̈ eb' cha. Toto an̈ec tic, 'oj qui milc cham Jeremías tic, caw 'oj jawc yailal 'a quib'n̈ec, xchi eb'.
20(An̈jtona pax win schecb' Dios tzcuch Urías, yunnal Semaías 'aj chon̈b' Quiriat-jearim, a 'ix paxtin 'el 'a sb'i Jehová 'a jun chon̈b' tic, yet' 'a jun nacion̈ tic, 'icha wal xyutj paxtinc sb'a Jeremías tic. 21A win rey Joacim, yet' smasnil eb' yit yajlil, yet' eb' niwc yel'ch yopiso, 'ix yab' eb' tas xyala. Yuj cha, caw 'ix snib'j win rey chi smil chamoc. Ax yic xyab'n sb'a Urías 'a jun cha, 'ix 'at 'eloc, axta xc'och 'a Egipto. 22Yuj cha, 'ix schecn 'at win rey Joacim chi schecb' 'a Egipto cha, atn Elnatán yunnal Acbor, yet' jun tzo'n̈ xo eb' winac. 23Ax eb' x'at 'i'nc Urías cha, 'ix wul ya'nc eb' 'a yol sc'ab' rey Joacim. Ax win x'a'n milxoc chamoc, xya'n win julxoc 'ejm sniwnal 'a yol xab' 'a 'aj tzmucx eb' comn 'anma'.)
24Palta ax pax Ahicam yunnal Safán, a xya'ch sb'a wet' an Jeremías in tic. Yuj cha, ma'in 'ajx 'och 'a yol sc'ab' eb' chon̈ab' yic tzin milx cham yuj eb'.
ప్రస్తుతం ఎంపిక చేయబడింది:
Jer 26: CSS
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Biblia Chuj San Sebastian © Sociedades Bíblicas Unidas, 1999.