Is 60
60
A jun 'ac' Jerusalén
1A Jehová a 'ix aln can 'ixtic: Ex 'aj Jerusalén, a ticnec q'uen̈ec pax wa'an, caw wach' eyico' yujto tzcheclj pax chan̈ in sacq'uinlal yet' in tzictznil 'a e cal.
2Ax jun tzo'n̈ nacion̈ 'a yolyib'n̈q'uinl tic, a q'uic'q'uinl 'oj 'ochcn oyn 'a eb'. Ax xo pax ax tic, an 'oj wac' in sacq'uinlal 'a eyib'an̈, 'oj checljoc 'el in tzictznil 'a e cal.
3A jun tzo'n̈ nacion̈ cha, 'oj jawc eb' 'ayx yuj jun sacq'uinl cha, ax eb' rey, 'oj jawc eb' 'ayx yuj in tzictznil 'oj checljoc chan̈ 'a e cal.
4Tzlajw cha, ax eyiln 'at 'a najat, tzex laj 'ec' q'uel-loc, to a smasnil eb' eyit chon̈ab', 'oj laj syamx sb'a eb', ax sjapx eb' 'ayex. 'Oj eyil scot eb' eyunnal 'a najat, mec'b'il eb' eyisil ax wul yajx can pax eb' 'ayex.
5A yic 'oj eyilnc to 'ixta 'oj 'aj jun tzo'n̈ cha, caw 'oj jawc e tzaljc'ojlal. 'Oj niwtjoc chan̈ tzaljc'ojlal 'a e cal. 'Oj laj yi' cot eb' nacion̈ sricoal, ax wul ya'nc eb' 'ayex, ax eb' cajn 'a sla'nil sti a mar, 'oj yi' cot pax eb' yico'.
6Ax eyilni to til wal 'oj jawc eb' 'anma 'ayx yet' scameyo: 'Ay eb' 'oj cot 'a Madián. 'Ay eb' 'oj cot 'a chon̈b' Efa, 'oj jawc smasnil eb' 'aj Sabá. Caw 'al yaj eb' yet' yicatz ax sjaw eb', yet' eb' q'uen oro yet' incienso. 'Oj yaln eb' swach' paxti 'ayn an Jehová in, yujto satjub'tac yilx tas tzin b'o yil eb'.
7Smasnil no calnelu 'ay 'a Cedar, 'oj eyico'oc no', ax e no mam calnelu 'ay 'a Nebaiot, a e no 'oj e c'anlb'oc yic 'oj eya'nc tz'a e no xajmb'al-l 'a yib'n̈ yet'l xajmb'al to wic yaji. 'Oj in cha e no eyofrendaoc. 'Ixta 'oj wutoc, sec 'ay yel'ch watut chi 'a e sat.
8A yic cha, ax eyaln 'ixtic: ¿Mach laj eb' tzjaw 'icha sb'ey 'asn cha, 'icha pax sb'ey e no 'uch tzpax wayc 'a swaynub'? 'oj e chioc.
9A jun tzo'n̈ 'oj eyil cha, atn te barco tzcot 'a jun tzo'n̈ xo chon̈b' 'ay 'a sti a mar, b'ab'l eb' te yic Tarsis yuj eb' te'. Ata ajun eb' eyit chon̈b' yet' eb' 'anma cha, yet' eb' oro, yet' eb' plata, yuj yi'nb'ilc chan̈ in b'i an Jehová in. An e Diosal in, to Cojxn In Ton Dios In, an 'ixta 'oj wutc ex wa'n b'inaxc paxi.
10A eb' chuc chon̈b'al, a eb' 'oj b'onc pax smuroal e chon̈b' jun 'ejm xo, ax eb' sreyl eb', a eb' 'oj 'och eya'malc servil. Wach'xam yuj yowl in c'ojol, 'ix wa'n 'och eyailal, palta ax ticnec, yuj swach'l in nab'en, tz'o'ch pax in c'ojl 'ayex.
11A spuertail e chon̈ab', jacnn̈ej ax yec' c'u, ax yec' 'ac'wal. Ma'oj macchjoc sec wach' yijx cot eb' sreyl jun tzo'n̈ nacion̈ chi 'ayx yet' sricoal.
12Palta ax jun tzo'n̈ nacion̈ ma'oj yal sc'ojl ex ya'n servil, c'uxn 'oj lajwc 'el eb'.
13A smasnil tas wach' 'ay 'a lum Líbano, 'oj 'ijxoc coti, ax wul scan 'ayex: Atn te taj, te c'u'taj yet' te q'uisis. 'Oj 'och eb' te yelwnub'loc watut sec wach' yilxi, caw niwn yel'ch wet'l chi 'aj tzin 'aji.
14A smasnil yin̈tl eb' ex laj 'ixtn cha, 'oj jawc eb' wul yic' 'ejm sb'a 'ayex. Smasnil eb' xlaj chichnc 'och 'ayex, 'oj wul yal sb'a eb' 'ayex, ax yaln eb' eyu'uj to in chon̈b' ex. A chon̈b' Sión Yicn̈ej Jehová Yaji, atn jun Dios To Cojxni, 'oj schic eb'.
15Man̈x 'oj e can e ch'ocoj, man̈xtoc chacb'ilx 'eli, palta to 'oj wac' in wach'c'ojlal 'ayx 'a jun 'ejmn̈ej, yuj cha, to 'ayn̈j tzaljc'ojlal 'a smasnil tiempo.
16Ax eb' nacion̈ cha, 'oj yac' eb' tas wach' 'oj e c'uxu'. 'Oj ex yac' servil eb' rey yet' tas wach' 'ay 'a 'a, 'icha tzyutj junc 'ix nunb'il ya'n chuw yune'. 'Ixta 'oj ex yutc eb' rey chi ex ya'n servil, ax eyojcan 'eli, to an Jehová in, e Diosal in to tztac' wuj smasnil, e Colmal pax waji.
17Yuj cha, a tas 'ay 'ayex, 'oj in jela': a q'uen bronce, a q'uen oro 'oj wac' sjeloc; ax q'uen hierro, a q'uen plata 'oj wac' sjeloc; ax te te', a q'uen bronce 'oj wac' sjeloc; ax q'uen q'ue'en, a q'uen hierro 'oj wac' sjeloc. A eb' eyajlil 'oj wac'a', 'oj yac' eb' yajlil 'a stojlal sec 'ay junc'ojlal 'a yol e chon̈ab'.
18Man̈x b'a'n̈ 'oj 'ab'xoc speclal smilx cham 'anma 'a e lum cha, man̈x 'a mach 'oj satxoc 'el 'a yol e macb'en. A e colnb'il xwac'a, a chi 'icha muro yajch oyn 'ayex, ax e b'inab'ilal, a chi 'icha spuertail e chon̈b' yaji.
19Ata', man̈x 'a tz'och yoc c'u eyuj 'a c'ual, man̈x 'a tz'och yoc 'uj eyuj 'a 'ac'wal, yujto an Jehová in, an 'oj wac' in sacq'uinlal 'ayx 'a jun 'ejmn̈ej; an e Diosal in tic, an 'oj ex wac' b'inaxoc.
20A jun sacq'uinl tzwac' 'ayx cha, a 'oj 'och sjelc yoc c'u yet' yoc 'uj. A jun cha, may b'a'n̈ 'oj tupoc, yujto an Jehová in, an sacq'uinl waj 'ayx 'a jun 'ejmn̈ej. Ax e cusc'ojlal 'aj 'ayx 'eq'ui, 'oj lajwc 'ec' 'a jun c'u cha.
21A smasnil eb' eyit chon̈b' 'a jun tiempoal cha, caw wach'n̈j 'oj 'aj snab'en eb'. 'Oj yico'oc pax eb' lum e lum chi 'a jun 'ejmn̈ej. Lajn wal eb' 'icha swol junc 'awb'ente', sec tzin b'inax yuj eb'.
22A jun c'aj eb' 'anma tic, caw jaywn̈ej wal sb'isl eb', palta 'oj wac' q'uib' sb'isl eb', smil-l xo 'oj 'aj eb'. Jaywn̈ej wal eb', palta 'oj 'ochx eb' niwquil nacion̈al, caw wal te'n 'oj yutc sb'a eb'. An Jehová in, an tzwala to a yic 'oj c'och stiempoal, an 'oj wac' 'el'choc jun tzo'n̈ tic muc'uc, xchi Dios.
ప్రస్తుతం ఎంపిక చేయబడింది:
Is 60: CSS
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Biblia Chuj San Sebastian © Sociedades Bíblicas Unidas, 1999.
