पेरेरित 7
7
इस्तिफनसके सन्देस
1तउ सबति बन्ना पुजारि इस्तिफनसकेहें पुछनें, “का तुम्हिन दोस लगाइल बात सहिके आहे?”
2इस्तिफनस जबाफ दहति कहनें, “हे मोर दादाभइया आउर बाबाभर, मोर कहल बात सुनो! हम्मर पुरखा अब्राहाम हारान कहना जगामे जइनाति अग्दे मेसोपोटामियामे बइठें, जहाँ महिमाके परमेस्वर उनके दरसन दहनें। 3तउके परमेस्वर उनके कहनें, ‘तुम अपना देस आउर घर परिबारकेहें छोरके जउन देस मइ तुम्हिन दिखइमु उहि देसमे जाउ।’#उत १२:१ 4उहिकमारे अब्राहाम कल्दिभरिनके देसमहति निकरके हारानमे बइठे लगनें। अब्राहामके बाबा मरलपाछुक उ जगामहति परमेस्वर उनके हिंयाँ लइनें, जहाँ तोइनें अब्भे बइठल बाटो।#उत ११:३१; १२:४ 5उ बखत परमेस्वर अब्राहामकेहें इ देसमे गोर धरना जगा फेक नाइदहनें। पर परमेस्वर ‘इ देस तुम्हिन आउर तुम्हर सन्तानकेहें दहमु’ कहिके बाचा करनें। इ बाचा करे बखत अब्राहामके एकठोर सन्तान फेक नाइरेहें।#उत १२:७; १३:१५; १५:१८; १७:८ 6परमेस्वर अब्राहामकेहें कहनें, ‘तुम्हर सन्तान अउरेक देसमे जाक बइठहें। हुँका मनइभर ओइन दास बनइहें आउर चार सउ बरसतक बहुते दुख दिहें।’ 7‘पर तुम्हर सन्तानभरिन दास बनइया मनइभरिन मइ दन्ड दहमु। तउके तुम्हर सन्तानभर उ देसमहति निकरहें आउर यिहि जगामे आक मोर आराधना करहें।’#उत १५:१३-१४ #पर्स ३:१२ 8तउके परमेस्वर अब्राहामकेहें खतना करेक परता कहिके करार बन्धनें। उहिकमारे अब्राहामके लउँरा इसहाक जल्मलपाछुक अब्राहाम अपना लउँरा इसहाकके अठँमा रोजमे खतना करदहनें। इसहाक अपना लउँरा याकुबके खतना करदहनें आउर याकुब अपना बारा जनें लउँराभरिन फेक खतना करदहनें। अब येनहें हम्मर बारा कुलके पुरखाभर आहें।#उत १७:१०-१४; २१:२-४; २५:२६; २९:३१—३५:१८
9“याकुबके लउँरा योसेफसँघ आकुर दादाभइयाभर हेंख करें। ओइनें योसेफकेहें मिस्र देसके मनइभरिनतिरा बेंचदहनें आउर उ दास हुइगिनें, पर परमेस्वर उनकासँघ रेहें।#उत ३७:११,२८; ३९:२,२१ 10परमेस्वर योसेफकेहें सब कस्टमहति छुटकारा दहनें आउर मिस्र देसमे फारो राजाके आगे उनका मन जितेक तहन अनुगरह आउर गियान दहनें। उहिकमारे फारो राजा योसेफकेहें सब मिस्र देसमे आउर अपना दरबारमे सासक बनइनें।#उत ४१:३९-४१ 11ओहकापाछुक सब मिस्र देस आउर हम्मर पुरखाभर बइठना कनान देसमे अकाल परलकेमारे बहुते दुखमे परनें आउर हम्मर पुरखाभर खाइक तहन कुछु फेक नाइपइनें।#उत ४२:१-२ 12जब याकुब मिस्र देसमे अनाज आहे कहना बात सुन्नें, तउ उ अपना लउँराभरिन अनाज खरिदेक पहिला दाउँ उ देसमे पठइनें। 13ओइनें दुसरा दाउँ अनाज खरिदे गिनेंत योसेफ अपनकेहें दादाभइयाभरिन चिन्हइनें आउर उहिबखत फारो राजा फेक योसेफके घरानक बारेमे पता पइनें।#उत ४५:१,१६ 14तउके योसेफ अपना बाबा याकुबकेहें अपना परिबार लइके मिस्र देसमे आइक तहन खबर पठइनें। उ बखत उनका परिबारमे पचहतर जनें रेहें।#उत ४५:९-१०,१७-१८; ४६:२७ 15तउ याकुब मिस्र देसमे गिनें आउर हुँये उनका मिरतु होइल। उस्तेकरके हम्मर पुरखाभरिनके फेक हुँये मिरतु होइल।#उत ४६:१-७; ४९:३३ 16ओइन लहास सकेममे लइजाक अब्राहाम हमोरके लउँराभरिनति दाम तिरके खरिदल चिहानमे धरनें।#उत २३:३-१६; ३३:१९; ५०:७-१३; यहो २४:३२
17“जब परमेस्वर अब्राहामसँघ करल बाचा पुरा हुइना बखत लिग्घे आइल, मिस्र देसमे हम्मर इस्राइलि मनइभरिनके सँख्या ढेरे हुइगेल रेहे। 18तउ मिस्र देसमे योसेफकेहें नाइचिन्हइया अउरे राजा राज्य करे लगनें।#पर्स १:७-८ 19उ हम्मर पुरखाभरिनके बिरुधमे जाल रचके नाइबरहिया बिउहार आउर अत्याचार करनें। उ इस्राइलि मनइभरिनके भरखर जल्मल लरकाभरिन मारेक तहन जल्मति केल जबरजत्ति बाहिर फिंकाइ लगामें।#पर्स १:१०-११,२२ 20उहि बखत मोसाके जलम होइल आउर उ परमेस्वरके नजरमे बहुत सुग्घर लरका रेहें। उनका दाइ-बाबा उनके तिन महिनातक घरमे लुकाक पल्नें।#पर्स २:२ 21पर जब ओइनें लुकाइ नाइसिक्के घर बाहिर लइजाक छोरदहनें, तउ फारोक लउँरिया पइनें आउर अपना लउँरा बनाक पल्नें।#पर्स २:३-१० 22मोसाकेहें मिस्रिभरिनके सब गियानमे सिछ्छा दहलगेल, तउके मोसा बोलि बचनमे आउर काममे सक्तिसालि हुइनें।
23“जब मोसा चालिस बरसके पुगनें, उ अपना इस्राइलि दादाभइयाभरिन भिटना इच्छा करनें। 24एक रोज मोसा एक जनें मिस्रि मनइ एकठोर इस्राइलि मनइकेहें पिटत दिखनें। तउ मोसा उ इस्राइलिक रछ्छा करनें आउर बदला लइके मिस्रि मनइकेहें मारदहनें। 25परमेस्वर मोहके इस्राइलिभरिन छुटकारा देहेक तहन पठइले आहें कहना बात अपना दादाभइयाभर बुझ्हें कहिके मोसा सुचले रेहें। पर ओइनें उ बात नाइबुझ्नें। 26अउरे रोज मोसा दुइ जनें इस्राइलिभरिन मारपिट करत दिखनें। उ ओइन मिलइना कोसिस करति कहनें, ‘तोइनें दुनु जनें अक्के जातिके दादाभइया होक फेक काहिक मारपिट करतो?’ 27पर अपना परोसिकेहें अन्याय करइया इस्राइलि मोसाकेहें ढकेलत अइसे कहल, ‘हम्मरउप्पर सासन आउर नियाय करेक तहन तुम्हिन कउन बनाइल? 28तुम कल्ह उ मिस्रि मनइकेहें मारल ढार का मोहके फेक मारेक खुजतो?’ 29इ बात सुनके मोसा मिस्र देसति भाजके मिधान कहना देसमे गिनें आउर हुँये बइठे लगनें। हुँये बेह करके दुइ जनें उनका लउँराभर फेक जल्मनें।#पर्स २:११-१५#पर्स १८:३-४
30“चालिस बरस पाछुक, एक रोज सिनइ परबतके लिग्घे उजार जगामे बरतिरहल झुङ्ग्लिके अरफमे एकठोर स्वरगदुत मोसातिरा देखा परनें। 31उ देखके मोसा अचम परनें आउर बरहियसति देखेक तहन लिग्घे गिनेंत परमपरभुके अइसन अबाज सुन्नें, 32‘मइ तुम्हर पिता पुरखा अब्राहाम, इसहाक आउर याकुबके परमेस्वर आहुँ।’ इ सुनके मोसा डरकामारे थरथराइ लगनें आउर दिखना हिम्मत फेक नाइकरनें। 33तउ परमपरभु मोसाकेहें कहनें, ‘तुम्हर जुता निकारो, काहिक्कि जहाँ तुम ठरहेल बाटो, उ पबित्र जगा आहे। 34मिस्र देसमे रहल मोर मनइभरिनके दुख कस्ट मइ अपनें आँखिलइक दिखले आहुँ आउर ओइन चित्कार सुनले आहुँ। मइ ओइन छुटकारा देहेक तहन आइल आहुँ आउर अब इ कामके तहन मइ तुम्हिन मिस्र देसमे पठइमु।’#पर्स ३:१-१०
35“यिहि मोसा आहें, जेहके अपना जातिक मनइभर ‘हम्मरउप्पर सासन आउर नियाय करना तुम्हिन कउन बनाइल?’ कहिके इन्कार करले रेहें। पर बरतिरहल झुङ्ग्लिमे यिनकेसँघ स्वरगदुतति परमेस्वर मोसासँघ मन्कनें आउर मोसाकेहें इस्राइलिभरिनके सासक आउर छुटकारा दहना बनाक पठइनें।#पर्स २:१४ 36मोसा इस्राइलिभरिन मिस्र देसमहति बाहिर निकारके परमेस्वरन बाचा करल देस लइगिनेंत मिस्र देसमे, लाल समुन्दर आउर उजार जगामे चालिस बरसतक अचमके काम करनें आउर चिन्हाभर दिखइनें।”#पर्स ७:३; १४:२१; गन्ति १४:३३ 37“यिहि मोसा इस्राइलिभरिन अइसे कहले रेहें, ‘परमेस्वर तोइन अपनें मनइभरिनति मोर ढार एक जनें अगम्जानि तोइनतिरा पठइहें।’#बेबस १८:१५,१८ 38यि उहि मोसा आहें, जउन उजार जगामे जमा होइल हम्मर पुरखाभरिनसँघ रेहें। उ हम्हिन देहेक तहन जिति बचन पइनें जउन बचन उनके सिनइ परबतमे स्वरगदुत कहले रेहें।”#पर्स १९:१—२०:१७; बेबस ५:१-३३
39“पर हम्मर पुरखाभर उनका बातकेहें नाइमन्नें। ओइनें मोसाकेहें इन्कार करनें आउर फेर मिस्र देसमे लउटके जइना बिचार करनें। 40उहिकमारे ओइनें मोसाके दादा हारुनकेहें अइसे कहनें, ‘हम्मर तहन डगर दिखइना देबताभरिन बनादेउ, काहिक्कि मिस्र देसमहति निकारके लइना मोसा मरल कि भाजल, हम्हिन पता नाइआहे।’#पर्स ३२:१ 41ओहकापाछुक ओइनें बछराके एकठोर मुरति बनइनें आउर ओहका आगे बलि चरहइनें। ओइनें अपना हाथलइक बनाइल मुरतिके तहन खुसेलि मनइनें।#पर्स ३२:२-६ 42उहिकमारे परमेस्वर ओइन त्याग दहनें, आउर बदरिक दिन, जोन्हा आउर ताराभरिन पुजेक ओइन छोरदहनें, जइसे अगम्जानिभरिनके किताबमे लिखल आहे,
‘ए इस्राइलिभर, तोइनें चालिस बरसतक उजार जगामे
जउन बलि चरहइलो,
उ ते मोर तहन नाइरेहे।
43तोइनें मोलेख कहना देबताके तम्बु बोंकके लइलो
आउर रेफन देबताके ताराके मुरतिकेहें फेक लइलो।
उ मुरतिकेहें पुजा करेक तहन अपनें बनइले रेहें।
उहिकमारे अब मइ तोइन बेबिलोनति फेक दुर कइदि बनाक पठइमु।’”#आमो ५:२५-२७
44“उ उजार जगामे हम्मर पिता पुरखासँघ ‘परमेस्वरके उपस्थिति दिखइना’ पबित्र तम्बु रेहे। मोसा उ पबित्र तम्बु परमेस्वरन दिखाइल नमुना ढार बनइले रेहें।#पर्स २५:९,४० 45ओहकापाछुक परमेस्वर इ देसमे बइठइया अउरे जातके मनइभरिन निकार दहनें। तउके यहोसु इ देस जितके लइनेंत, ओइनें उ पबित्र तम्बु फेक अपनसँघ लइनें, आउर उ तम्बु राजा दाउदके पालातक ओइनसँघ रहल। 46राजा दाउद परमेस्वरके दया पइनें आउर याकुबन आराधना करल परमेस्वरके तहन एकठोर मन्दिर बनाइक पाउँ कहिके बिन्ति करनें।#२ समु ७:१-१६; १ इति १७:१-१४ 47पर दाउदके लउँरा सोलोमन परमेस्वरके तहन उ मन्दिर बनइनें।”#१ राजा ६:१-३८
48“पर सबति महान परमेस्वर ते मनइभरिन बनाइल मन्दिरमे बास नाइकरतियाँ जइसे अगम्जानि फेक कहले आहें,
49परमेस्वर कहतियाँ,
‘स्वरग मोर राजगद्दि आहे धरति मोर पाउदान आहे।
तोइनें मोर तहन कइसन मेलके मन्दिर बनइबो?
मोर सहिंतइना जगा कहाँ आहे?
50इ सब चिझ मोरे बनाइल नाइआहे का?’”
51तउ इस्तिफनस कहनें, “तोइनें हटठि यहुदि अगुवाभर, तोइनें अपना मन परमेस्वरकेहें नाइदहले बाटो आउर तोइनें उनके कबु नाइसुन्लो। पबित्र आत्मा तोइन जा कहतियाँ उ तोइनें सदा बिरोध करतो। तोइन पुरखाभर उसते करनें आउ तोइनें फेक ओइनेंहेन ढार बाटो।#यसइ ६३:१० 52का तोइन पुरखाभर नाइसताइल कुइ अगम्जानि हुइहें का? परम धरमि जन आइत आहें कहिके खबर सुनइया अगम्जानिभरिन पकरके ओइनें मरनें। तोइनें भर उ परम धरमि जनकेहें धोखा दइक मरलो।#मत्ति ५:१२ 53तोइनें स्वरगदुतभरिनके हाथति परमेस्वरके बेबस्था ते पइले रोहो, पर ओहका पालन नाइकरलो।”
इस्तिफनसकेहें पथ्रालइक मारलगेल
54इस्तिफनसके बात सुनके महासभामे मनइभर बहुते दिक्काक दात किटकिटाइ लगनें। 55पर इस्तिफनस पबित्र आत्मालइक भरपुर होक स्वरगघइन दिखनें आउर परमेस्वरके महिमा दिखनें आउर परमेस्वरके दहिनापाँजर येसुकेहें ठरहेल दिखनें। 56इस्तिफनस ओइन कहनें, “देखो, मइ स्वरग उघरल आउर मनइक लउँरा येसुकेहें परमेस्वरके दहिना पाँजर ठरहेल देखत आहुँ।”
57इ सुनके सब जनें चिल्लइति अपना-अपना कान बन्द करनें आउर इस्तिफनस उप्पर हमला करनें। 58ओइनें इस्तिफनसकेहें सहरति बाहिर घसिटत लइजाक पथ्रालइक मारे लगनें। उ बातके साछिभर अपना लत्ता साउल नाउँ रहल एक जनें जोंन लउँरक गोरतिरा धरनें। 59ओइनें पथ्रा मरति रहल बखत इस्तिफनस अइसे पराथ्ना करनें, “हे परभु येसु, मोर आत्मा लइलेउ।” 60ओहकापाछुक इस्तिफनस ठिहुनि गारके जोरति कहनें, “हे परभु, इ पापके दोस येन नालागे।” अत्ता कहिके उ अपना परान छोरदहनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.