Matiye 28
28
Yiezu Kirisa vìerɔ́ bòo
Mar 16.1-10; Lik 24.1-12; Zãn 20.1-10
1Ɛ́ hɔ́ lɛ ɛ́ ɓɛ́ Zuifuɓɛ ńvũùnín sí ɛ́ khie vɔ́, ɛ́ pehɔ̀ sí lɛ ɛ́ tĩ lɛ iè hɛtii, ɛ́ pehɔ̀ ɲɛǹbín dùdù, á Maari lɛ ɛ́ lé hɔ́ Makedala lóo àá ɔ́ Maari sí kɛ́ ɛ́ hĩ́nà van ɛ́ lè búi ɛ̀ húi. 2Ɛ́ lé sṹsùnù pan pan ɛ̀ lè síɛ zɛ̀ cɛ̃̀un, ɛ́ ɲúnsɔ mɛlɛkɛ dɔ̀ ɛ́ yòó lɔ́ hɔ́ hóohũn ɛ́ ɓen síɛ bìríkɛa lè sɛ̃̀n-bɛhɔ́ lɛ hṹn híɛ lè búi ɲunù ɛ́ khie bɔ̀sí à yòó kɛsí lé lɔ̀n. 3À mɛlɛkɛ sɔ híɛhɔ́ ɛ́ ɲiiníkɛ kɛ̀a ie hóo ɲiiníkɛà bòo sí, ɛ̀ piè tĩ̀ɛ ɛ́ ce pán pán kɛ̀a ńkúandí bòo sí. 4Ɛ́ ɓɛ́ sɛ̃̀nɛ̀dɔ́síɓɛ́ lɛ hṹn lè búi ɛ̀ hìenin ɛ́ hɛ̀ bɔ́hĩ́ lɔ́ ɛ́ zɛ̀ wɛ̀wɛ̀ ɛ́ yòó dɛ̃̀ kɛ̀a bìe lɛ ɛ́ húrunkɛ. 5Á mɛlɛkɛ ɛ́ zɔn bie lɛ́ ɓɛ́ hã́a ǹ ɛ́ nɛ làa: «Mìpe, mì bí zán wɛ̀. Ń dũ kɛ́ á iè ɔ̀ Yiezu lɛ ɛ́ ɓɛ́ ɓáa lè ɓáalén dãanù lɔ̀n ɛ́ mí ɛ́ cɛ̀. 6Á mí hũ̀nún wɛ̀, à vìé lɔ́ kɛ̀a bòo lɛ á dàa hàarí bie hɔ̀. Mì ɓen húi lé viì lɛ ɛ́ ɓɛ́ hṹn daaniɛ ɔ̀ hũn. 7Ɛ́ mí wo khíi zè lan vɛ bie lɛ́ piè kɛ̀ránzɛ̀ɓɛ̀ ǹ nɛ a vìé lɔ́, nɛ a mii dí peɓɛ̀ híɛhɔ́ ɛ̀ vɛ hɔ Kalile ɛ̀ vɛ hìé ɓɛ́ yán. Sí iè viì lɛ ɛ́ mí ɓén mi-ɛ nin. Sí iè pe bòo lɛ ɛ́ ń hṹn dàa ɛ́ nín bie àá miɛ.»
8Ɛ́ ɓɛ́ hã́a ɛ́ khie zɔ̀ lɔ́ lé búi lɔ̀n, ɛ́ lìɛkɛasí cɔ́ kɛ́ ɓɛ́ wɛ ɓɛ́te ɛ̀ ɓɛ̀ lò ɛ́ zánkɛ, ɛ́ ɓɛ vɛ bie hɔ bòo lɛ wɔ́ ɛ́ lɛ́ á Yiezu kɛ̀ránzɛ̀ɓɛ̀ ǹ. 9Ɛ́ ɓɛ́ húi, ɛ̀ Yiezu pan pan à ɓɛrɛ sɛ̃́ peɓɛ̀ híɛhɔ́ à bie lɛ́ ɓà ǹ ɛ́ nɛ làa: «Nín mì fòoní!» Ɛ́ ɓɛ́ van lúwiniɛ ɔ̀ ǹ ɛ̀ ɓɛ̀ zɛ̃nkɛa piè zehĩ́ ǹ ɛ̀ ɓɛ̀ ɓàaniɛ ɔ̀ ǹ. 10Ɛ́ Yiezu ɛ́ zɔn bie lɛ́ ɓà ǹ ɛ́ nɛ làa: «Mì bí zán wɛ̀; mì lan vɛ bie lɛ́ kìe zɛ̀ɓɛ̀ ǹ nɛ ɓɛ khíi vɛ hɔ Kalile. Sí iè viì lɛ ɛ́ ɓɛ́ ɓén mi mi hũn.»
Ɓɛ̀ sɛ̃̀nɛ̀dɔ́síɓɛ́ bòo lɛ ɛ́ ɓɛ́ bie
11Ɛ́ hɔ́ lɛ ɛ́ ɓɛ́ hã́a ɛ́ wi le wṹn lɔ̀n ɛ́ kã́a ɔ̀ Yiezu kɛ̀ránzɛ̀ɓɛ̀, ɛ́ ɓɛ́ sɛ̃̀nɛ̀dɔ́síɓɛ́ lɛ hṹn lè búi ɛ̀ hìenin tĩ́ihṹ, ɛ́ ɓɛ́dɔ̀ ɛ́ khie van zɔn lè fɔ́nú hũn, ɛ́ zɔn bie hɔ̀ bòo lɛ wɔ́ míkùi ɛ́ lɛ́ ɓɛ́ khɛ̃́ndàariè hándíe ǹ. 12Ɛ́ ɓɛ́ khɛ̃́ndàariè hándíe ɛ́ van koo ɓánlɔ̀n àá ɓɛ́ Zuifuɓɛ nìkĩ́ɛ ɛ̀ ɓɛ̀ lɔ̀ tɔ̀, ɛ̀ ɓɛ̀ khie lɛ́ hɔ́ mɛ̀-kuì ɓɛ̀ sɛ̃̀nɛ̀dɔ́síɓɛ́ ǹ, 13ɛ̀ ɓɛ̀ bie lɛ́ ɓà ǹ ɛ́ nɛ làa: «Mì bie nɛ a Yiezu kɛ̀ránzɛ̀ɓɛ̀ ɛ́ ɓɛrɛ kɛ̃̀mɛa piè nìheemu hɔ̀ sṹnúhũn kɛ́ mí dũmua. 14Hɛ̀rí kɛ́ á Kuvɛrɛnɛɛre ɛ́ ɲɛ́ hɔ́, ɛ̀ kè dũ bòo lɛ ɛ́ ké ɛ̀ bie lɛ́ à ǹ ɛ̀ mì ɲún ɛ̀ dàá bí zɔ bòo wɛ̀.» 15Ɛ́ ɓɛ́ sɛ̃̀nɛ̀dɔ́síɓɛ́ ɛ́ fɔ́ hɔ́ màa sɔ, ɛ̀ ɓɛ̀ wɔ́ kɛ̀a bòo lɛ ɛ́ ɓɛ́ khɛ̃́ndàariè hándíe àá nìkĩ́ɛ ɛ́ dàa bie hɔ̀ ɛ́ lɛ́ ɓà ǹ. Ɛ́ hɔ́pe bòo sɔ ɛ́ wo hĩ́nà saa zɔn ɓɛ̀ Zuifuɓɛ tĩ́ihṹ ɛ́ zɔn ɛ́ bie yán fúu ɛ̀ ɓen dɛ̃ zoòni.
Yiezu ɛ́ míte ɛ̀ zɛ̃́ní mí kɛ̀ránzɛ̀ɓɛ̀ ǹ
Mar 16.14-18; Lik 24.36-49; Zãn 20.19-23; Bɔw 1.6-8
16Ɛ́ Yiezu kɛ̀ránzɛ̀ɓɛ̀ pírú àá nìcóoní ɛ́ khie van hɔ̀ Kalile, lè ɓúkìe lɛ ɛ́ Yiezu zɔǹ bie lɛ́ ɓà ǹ nɛ ɓɛ vɛ lɔ̀n. 17Ɛ́ hɔ́ lɛ ɛ́ ɓɛ́ mɔn ɔ̀, ɛ́ ɓɛ́ ɓàaniɛ ɔ̀ ǹ. Kɛ́ ɓɛ́dɔ̀ ɛ́ den pɛ́wi ɛ́ titikɛ piè bòo hũn. 18Ɛ́ Yiezu ɛ́ van lúwiniɛ ɓà ǹ à zɔn bie lɛ́ ɓà ǹ ɛ́ nɛ làa: «Hɔ̀ pànkɛ́ míkùi ɛ́ lɛ́ mi ǹ bòo míkùi lɔ̀n hɔ̀ hóohũn àá lé sṹsùnù. 19Ɛ́ mí wo lan vɛ wé hɔ́ dàa míkùi nìɛ àá niǹ kɛ̀ránzɛ̀ɓɛ̀, ɛ̀ mì líiníkɛ ɓɛ hɔ̀ ɲumu hũn, à Yàá àá ɔ́ Zuú àá lé Mɛkɛ̃n-Sãanu yèrè lɔ̀n, 20ɛ̀ mì kɛ̀rán ɓɛ́ nɛ ɓɛ wóo wé hɔ́ bòo lɛ ɛ́ ń bie lɛ́ miɛ ǹ míkùi. Ɛ̀ mì dũń sãàní kɛ́ ń wi àá miɛ sítĩnlɔ́ míkùi hũn fúu ɛ̀ vɛ dɛ̃ le dímíɲɛ́ vénlɔ́.»
ప్రస్తుతం ఎంపిక చేయబడింది:
Matiye 28: bwj
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023 L’Association Nationale pour la Traduction de la Bible et l’Alphabétisation
